१० वर्षमा १५ हजार मेगावाट बिजुली उत्पादन हुन्छ, बढी भएको भारतलाई बेचिन्छ : मन्त्री पुन

कात्तिक ३०, २०७५ शुक्रबार १८:०:१५ | नवीन गुरुङ

संखुवासभा – संघीय सरकारका ऊर्जा, जलस्रोत तथा सिंचाइ मन्त्री वर्षमान पुनले १० वर्षमा १५ हजार मेगावाट विद्युत्त उत्पादन हुने बताउनुभएको छ ।

शुक्रबार संखुवासभाको तुम्लिङ्गटारमा आयोजित सभालाई सम्बोधन गर्दै मन्त्री पुनले तीन वर्षमा तीन हजार मेगावाट, पाँच वर्षमा पाँच हजार मेगावाट र १० वर्षमा १५ हजार मेगावाट विद्युत्त नेपालकै खोलानालाबाट उत्पादन हुने दावी गर्नुभएको छ । उत्पादन भएको १५ हजार मेगावाट विद्युत्तमध्ये १० हजार मेगावाट विद्युत्त देशभित्रै खपत गर्ने वातावरण तयार गर्ने पनि उहाँले बताउनुभयो । त्यसपछि दुई अंकले आर्थिक वृद्धि हुने मन्त्री पुनको दावी थियो । मन्त्री पुनले भन्नुभयो, ‘अब देशभित्रै ८ देखि १० हजार मेगावाट विद्युत्त खपत गर्ने वातावरण बनाउन लागि पर्ने र बाँकी रहेको ५ हजार मेगावाट विद्युत्त क्षेत्रीय बजार भारततर्फ निर्यात गरिनेछ ।’

नेपालको बजार र कलकारखानाबाट बढी भएको पाँच हजार विद्युत्त छिमेकी देश भारत मात्रै नभएर उत्तरी छिमेकी राष्ट्र चीन र बंगलादेशमासमेत निर्यात गर्न सकिने मन्त्री पुनले बताउनुभयो । विद्युत्तमा आत्मर्निभर भएपछि विद्युत्तको सञ्जाल अथवा नेपाललाई विद्युत्तको हब नै बनाउन सकिने समेत मन्त्री पुनले दावी गर्नुभयो ।

नेपाल सरकारले १९ वटा जलविद्युत्त आयोजनाहरुको अध्ययन गरिरहेको जानकारी दिँदै सरकार आफैले उत्पादन गर्ने योजना बनाएको समेत मन्त्री पुनले जानकारी दिनुभयो । १९ वटा जलविद्युत्त आयोजनामध्येको संखुवासभाको अपर अरुण नेपाल सरकार आफैले बनाउने निर्णय गरिसकेको र यसमा विश्व बैङ्कले लगानी गर्ने सहमति भएको समेत कार्यक्रममा जानकारी दिनुभयो ।

कार्यक्रममा ऊर्जा सचिव दिनेश घिमिरेले आयोजना निर्माणका लागि प्रक्रिया सुरु भइसकेको जानकारी गराउनुभयो ।

जोगबनी—विराटनगर—किमाथाङका (कोशी राजमार्ग) सडक अन्तर्गत भोटेखोला गाउँपालिकाको गोला र वरुण बजारनजिकै आयोजनाको बाँधस्थल बस्नेछ । यो आयोजना अहिलेसम्म विश्वमै सस्तो रुपमा बन्ने आयोजना भएको बताइएको छ । शुक्रबार ऊर्जा, जलस्रोत तथा सिंचाइ मन्त्री वर्षमान पुन, अर्थ मन्त्री डा. युवराज खतिवडा, विश्व बैंकका उपाध्यक्ष हाटविग साफेर, ऊर्जा सचिव दिनेश घिमिरे, कुलमान घिसिङलगायतको टोली आयोजनास्थलको स्थलगत अध्ययन र अनुगमन गर्नुभएको हो ।

अपर अरुणबाट ७ सय मेगावाटभन्दा बढी विद्युत्त उत्पादन हुनेछ भने आयोजनामा ९० करोड अमेरिकी डलरको हाराहारीमा खर्च हुने अनुमान गरिएको छ । आयोजना निर्माण स्थलमा नदीको वार्षिक बहाव दर उच्च रहेकोले ऊर्जा बढी प्राप्त हुने र उच्च हिमाली क्षेत्रमा रहेका कारण खेतीयोग्य जमिन, मानव बस्ती कम भएकाले वातावरणीय प्रभाव कम पर्ने समेत बताइएको छ ।

कार्यक्रममा अमेरिकाका लागि नेपालका राजदूत अर्जुन कार्की, प्रतिनिधि सभाका सांसद राजेन्द्र गौतम, राष्ट्रिय सभाका विधान व्यवस्थापन समितिका सभापति पर्शुराममेघी गुरुङ, पूर्वस्वास्थ्य राज्यमन्त्री तारामान गुरुङलगायतका जिल्लाका राजनैतिक दलका प्रतिनिधि उपस्थित थिए ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

१० वर्षमा १५ हजार मेगावाट बिजुली उत्पादन हुन्छ, बढी भएको भारतलाई बेचिन्छ : मन्त्री पुन

शुक्रबार संखुवासभाको तुम्लिङ्गटारमा बोल्दै ऊर्जा मन्त्री वर्षमान पुन

तपाईको प्रतिक्रिया