विदेशको कमाई : खाइलाइ टुप्पी हल्लाई

जेठ २८, २०७५ सोमबार १३:१७:९ | सन्जिता देवकोटा

काठमाडौं – २०६० सालमा साउदी जाँदा रमेश ढकालसँग धेरै सपना थिए । कमाउने, घर बनाउने अनि परिवारलाई सुखले पाल्ने ।

तर साउदीको बसाइ उहाँले सोचे जस्तो पटक्कै भएन । खानका लागि ठिक्क पारेको भात कागले खाइदियो । अनि, भात खाएर उड्ने कागसँगै रमेशका सपना पनि उडे ।

सपना पूरा गर्न उहाँले ९० हजार रुपैयाँ ऋण काढ्नु भएको थियो । तर १८ महिना कागले जुठो बनाएको भात खानु पर्यो । ऋण तिर्न सक्नु भएन ।

काममा जाँदा रमेश प्लाष्टिकको झोलामा खाना बोकेर जानुहुन्थ्यो र एक ठाउँमा राखेर काम गर्नुहुन्थ्यो । झुण्ड्याएको खाना कागले कुनबेला आएर जुठो हाल्थ्यो, थाहा हुँदैनथियो ।

ठूलो जहाज चढेर जागिर खान जानेहरुको गाउँमा शान अर्कै हुन्थ्यो । विदेश जानेका बारेमा गाउँका मानिसले सोचेजस्तो, अनि रमेश आफैंले सोचेजस्तो पटकै भएन । ‘असाध्यै दुःख, गर्मी उस्तै, खाना पनि भनेको बेला पाइएन,’ रमेश साउदीमा पाएको दुःख सुनाउनुहुन्छ ।

१८ महिना दुःख गर्दा पनि ऋण तिर्न नसकेपछि रमेश घर फर्किनुभयो । गरिखाने अरु विकल्प थिएन । श्रीमती बिमला ढकाल र रमेशले एउटा विकासे गाई किन्नुभयो ।

काम खोज्दै जाँदा साउदीबाट फर्किएको एक वर्षपछि उहाँलाई युएईमा काम गर्ने अवसर आयो । एउटा गाई र घर व्यवहार श्रीमतीले धान्ने कुरामा ढुक्क भएर रमेश २०६३ सालमा दोस्रो पटक युएई जानुभयो ।

रमेशले विदेश गएपछि कमाइन्छ नै भन्ने आशा त मारिसक्नुभएको थियो । तर एक देशमा नभए अर्को देशमा कमाइ होला भन्ने झिनो आश भने बाँकी थियो । स्काफोल्डिङको काममा जानुभएका रमेशको युएईको बसाई पनि उस्तै भयो । कमाउन सक्नुभएन ।

गाउँमा श्रीमतीले गाईको दूध र तरकारी खेतीबाट आफूले युएईमा कमाएको भन्दा धेरै कमाएको सुन्दा उहाँलाई व्यर्थै विदेश आएछु भन्ने लाग्थ्यो । यस्तै कुराले उहाँको मन युएईमा अडिएन । श्रीमती बिमलालाई पनि जानकारी नै नदिई एक दिन रमेश युएईबाट काठमाडौं उत्रनुभयो ।

सल्लाहै नगरी श्रीमान् घर फर्किंदा त बिमलालाई अब के गर्ने होला भन्ने लागेको थियो । तर घर फर्केपछि गाई थप्ने सल्लाह भयो । गोठ बन्न थाल्यो । पाखोबारी हराभरा हुन थाल्यो । बारीमा तरकारी धेरै फल्न थाल्यो र कमाई पनि मज्जैले बढ्न थाल्यो ।

व्यवसायिक रुपमा २०६६ सालदेखि ढकाल दम्पतीले सुरु गरेको गाई गोठमा अहिले ३५ वटा गाई छन् । जातजातका गाईले दिनमा १ सय ५० लिटर भन्दा धेरै दूध दिन्छन् । अहिले श्रीमान् श्रीमती मिलेर काम गर्दा ढकाल दम्पतीको हातमा महिनाको चोखो ५० हजार रुपैयाँ पर्छ ।

रमेश र बिमलाको दैनिकी गाई पालन र तरकारी व्यवसायले बदलिएको छ । साउदीमा कागले जुठो हालेको भात खाएर १८ महिना कटाएका रमेश अहिले भैंसीको दूध खानुहुन्छ । गोठभरी गाई भएपनि ढकाल दम्पतीले दूध खान भैंसी पालेका छन् । रमेशलाई हिजोआज विदेश गएर समय मात्रै बर्वाद गरेछु भन्ने लाग्छ ।

अहिले बिमला र रमेशका दिन घर, गाईगोठ र तरकारी बारीमा बित्छन् । गोठभरी बाच्छाबाच्छी र गाई, महिनैपिच्छे ५० हजार नाफा कमाई ! रमेशको दिन बित्छ हिजोआज श्रीमती र छोराछोरीसित रमाई रमाई ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सन्जिता देवकोटा

उज्यालोमा कार्यरत सन्जिता देवकोटा वैदेशिक रोजगार र नेपाली महिलाका बिषयमा कलम चलाउनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्