सिन्धुलीका कारागारमा क्षमताभन्दा बढी कैदी

पुष २८, २०७५ शनिबार १३:५६:४३ | बाबुराम देवकोटा

सिन्धुली – क्षमताको झण्डै ६ गुणा बढी राखिएकाले कारागार कार्यालय सिन्धुलीमा रहेका कैदीहरु भेडाबाख्राझै बस्न बाध्य भएका छन् ।

२५ जनाको क्षमता रहेको कार्यालयमा अहिले कैदी र बन्दी गरी १४२ जना र एकजना आश्रित बालबालिका समेत गरी १४३ जना बस्दै आएका छन् । जनसङ्ख्या बृद्धिसँगै अपराधका घटना पनि बढेकाले कैदीको चाप बढेको कार्यालयले जनाएको छ ।

कार्यालयका अनुसार कारागारमा रहेका कैदीमध्ये अदालतले सजाय तोकेका ११० जना कैदी र पुर्पक्षका लागि थुनामा राखेका कैदीको सङ्ख्या ३२ रहेको छ । कैदीको सङ्ख्यामध्ये ११ जना महिला रहेका छन् ।

साँघुरो कोठामा क्षमताभन्दा बढी कैदी राखिएकाले कैदीले कठिनसँग रात काट्दै आएको अवैद्य गर्भपतनको अभियोगमा पुर्पक्षको लागि थुनामा रहेकी शारदा बुढाथोकी बताउनुहुन्छ ।

‘मेरो दुई वर्षको छोरीसहित १२ जना महिला एउटा साँघुरो कोठाभित्र बस्नु परेको छ’, उहाँले भन्नुभयो, ‘अचेलको जाडो यही हो, कोठाभित्र घामको मुख देख्न पाइँदैन । गेटमा म्याट ओछ्याएर नानी लिएर सुत्ने गरेकी छु ।’

सुत्नको लागि कैदीलाई खाटको समेत व्यवस्था नभएको उनीहरुको गुनासो छ । जाडोको मौसम भएकाले महिला कैदीलाई दैनिक रुपमा दिउँसो एक÷डेढ घण्टा घाममा निकालेर राख्ने गरिएको कारागार कार्यालयका इन्चार्ज प्रहरी नायब निरीक्षक सुरेशकुमार झाले बताउनुभयो ।

चौकीदार बिदुर कार्की पनि लागुऔषधका थुनुवाहरुका कारण कैदीबन्दीको चाप बढेको बताउनुहुन्छ । झट्ट हेर्दा कारागार अपराधिले सजाय भुक्तान गर्ने ठाउँको रुपमा देखिए पनि सुधार गृहको रुपमा कैदीले महसुस गर्दै आएका उहाँको भनाई छ ।

वि.स.२०२५ सालमा निर्मित भवन जीर्ण बन्दै गएको र भूकम्पले समेत चिरा पारेकोले नयाँ भवन निर्माणका लागि आठ करोड ८८ लाख रुपैयाँको लागतमा डाँफे कन्ट्रक्सन धुलीखेलले ठेक्का पाएको कार्यालय प्रमुख(जेलर) मात्रिकाप्रसाद पहाडी बताउनुहुन्छ । तीन वर्षभित्र उक्त नयाँ भवन निर्माण गरिसक्नु पर्ने उहाँको भनाई छ ।

कारागार कार्यालय सुधार गृहको रुपमा विकास हुँदै गएको जानकारी दिँदै उहाँले भन्नुभयो, ‘साँघुरो नहोस भनेर ट्रष्ट थपेर कैदीलाई राखिएको छ । भित्रको वातावरण, सरसफाई सबै राम्रो छ ।’

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

बाबुराम देवकोटा

बाबुराम देवकोटा सिन्धुलीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्