बीरू

फागुन ४, २०७५ शनिबार १३:९:२२ | बालकृष्ण कट्टेल

हरेक महिना
मेरो शरीरबाट बग्ने
रगतको रङजस्तै
राता गुलाफहरू
तिमी बसेको शहरमा
डुल्न थालेको खबर
मैले पनि सुनेकी छु!

तिमी पनि त
गयौ होला नि हैन
गुलाफ हेर्न
र, किन्छौ होला
एउटा थुङ्गा त
पोहोर साल जस्तै
तिमीले सडक छेउमा
दिनदिनै बेचेको
आलुचपबाट कमाएको
पैसा जोगाएर!

बीरू,
तिमीलाई त म
हरेक प्रहर
मसँग आएको देख्छु
कहिले स-शरीर
कहिले कल्पनामा
र, आएपिच्छे
तिमीले दिएको
मीठो मुस्कान र
तातो माया सम्झन्छु
सट्टामा म तिमीलाई
बिस्तारै स्पर्श गर्छु
मैले छुँदा
तिमी तातो हुन्छौ

त्यो बेला त म
तिम्रो अनुहार
गुलाफको रङभन्दा पनि
रातो देख्छु!
त्यही रङमा
म मायाको
नयाँ पाटो भेट्छु!

म त
भोलि बिहानै जानु छ
तल आरनमा
बुर्ते दाइसँग कोइला माग्न
र, दिए भने
त्यसलाई सल्काएर
सेक्नुछ आफैलाई
खै किन हो आजकल
तल्लो पेट दुखिरहन्छ।

यतिका वर्ष भयो
मैले त केही दिन सकिनँ
'भ्यालेन्टाइन डे'मा
तर, यस पटक
त्यही कोइलाले
कोर्नेछु एउटा गुलाफको चित्र
मेरो मुटुमा
र, राख्छु तिम्रो लागि
भ्यायौ भने
एकछिन आउन ल
सँगै हेरौंला!

आउने भयौ भने
खबर गर है!
म नाम लेखाइरहन्छु
नर्सको क्लिनिकमा
'एक्सरे' गर्नु पर्छ
मेरो मुटुको
नत्र त कसरी हेर्छौ र
मायालु हातले
तिम्रै लागि कोरेको
गुलाफको चित्र ?

'एक्सरे'ले त
अरू दाग पनि देखाउँछ होला
मेरो मनका
देख्यौ भने
भनिहाल्नु नर्सलाई -
'त्यसको पनि फोटो बनाइदिनू'
सङ्कलन गरेर
प्रदर्शन गर्नुपर्छ
माइतीघर छेउमा
देशलाई देखाउनु पर्ने
धेरै चोटहरू छन्
मेरो मुटुमा!

गुलाफको सट्टा
माया बाँड्नु नि -
गएर भन्नू पर्ने
धेरै छ तिम्रो शहरमा!!

* * * * * * *

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

बालकृष्ण कट्टेल

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्