ताप्लेजुङको आकाशमा अहिलेसम्म तीन मन्त्रीले गुमाए ज्यान

फागुन १५, २०७५ बुधबार १९:३७:३१ | केशवप्रसाद भट्टराई

ताप्लेजुङ – हिमाली जिल्ला ताप्लेजुङमा अहिलेसम्म भएका हेलिकप्टर तथा जहाज दुर्घटनामा तीन मन्त्रीहरुको निधन भएको छ ।

ताप्लेजुङमा १३ वर्ष पछि पुनः अर्को ठूलो हवाई दुर्घटना भएको हो । बुधबार (आज) भएको दुर्घटनामा संस्कृति, पर्यटन तथा नागरिक उड्डयन मन्त्री रवीन्द्र अधिकारीसहित सात जनाले ज्यान गुमाएका छन् ।

बुधबार भएको दुर्घटनामा बहालवाला पर्यटनमन्त्री रवीन्द्र अधिकारीसहित सात जनाले ज्यान गुमाएका छन् ।

देशमै चर्चित पाथीभराको दर्शन गरेर उडेको एकै मिनेटमा फुङलिङ नगारपालिका १० को फुरुम्बुको दारेभिरमा ठोक्किएर हेलिकप्टर दुर्घटना भएको जिल्ला प्रहरी प्रमुख डीएसपी सञ्जय सिंह थापाले बताउनुभयो । दुर्घटनामा मन्त्री अधिकारीसहित यति एयर लायन्सका मालिक आङछिरिङ शेर्पा, नेपाल नागरिक उड्डयन प्राधिकरणका उपनिर्देशक वीरेन्द्रप्रसाद श्रेष्ठ, नागरिक उड्डयन प्राधिकरणका इञ्जिनियर ध्रुव भोछिभोया, प्रधानमन्त्रीका स्वकीय सचिव युवराज दाहाल, क्याप्टेन प्रभाकर केसी र मन्त्री अधिकारीका सुरक्षा गार्ड अर्जुन अधिकारीको मृत्यु भएको छ ।

आज भन्दा १३ वर्ष अर्थात २०६३ साल असोज ७ गते कञ्जनजंघा संरक्षण क्षेत्र आयोजना समुदायमा हस्तान्तरण गर्न ताप्लेजुङ आइपुगेका तत्कालीन वन मन्त्री गोपाल राईलगायत चढेको हेलिकप्टर घुन्साको ढुङ्जे पहाडमा ठोक्किएर २४ जनाको मृत्यु भएको थियो ।

त्यतिखेर मृत्यु हुनेहरुमा मन्त्री राईसहित उहाँकी श्रीमती मिना राई, भूगोलविद हर्क गुरुङ, विश्व वन्यजन्तु कोष नेपालका प्रतिनिधि चन्द्रप्रसाद गुरुङ, वन सचिव दामोदर पराजुली, राष्ट्रिय निकुञ्ज विभागका महानिर्देशक नारायणप्रसाद पौडेल र पूर्व महानिर्देशक तीर्थमान मास्के, वन विभागका महानिर्देशक शरद राई, संरक्षणविद्हरु मिङ्मा नोर्बु शेर्पा, यशिछोडेन लामा, दावाछिरिङ शेर्पा, नेपालका लागि फिनल्याण्डका राजदूत पाउली मुस्टोनेन, यूएसएआईडीका उप–महानिर्देशक मार्गरे अलेक्जेन्डर, बिना आचार्य, विश्व वन्यजन्तु कोष यूकेका जील बोविङ र जेनिफर हेड्ली, म्याथ्यो पिरस र नेपाल टेलिभिजनका पत्रकार हेमराज भण्डारी र सुनिल सिंहका साथै ताप्लेजुङका व्यवसायी विजय श्रेष्ठको ज्यान गएको थियो ।

त्यति मात्र होइन, पञ्चायत कालमा ताप्लेजुङबाट नै प्रतिनिधत्व गर्दै पहिलो पटक राज्यमन्त्री बनेका चन्द्रबहादुर पालुवासमेतको हवाई जहाज दुर्घटनामा परि ज्यान गएको थियो ।

ताप्लेजुङको सुकेटारबाट उडेको केही मिनेटमा नै जहाज आकाशमै आगो लागेर दुर्घटना भएको र मन्त्री पालुवासँगै ११ जनाले ज्यान गुमाएको स्थानीयवासी बताउँछन् ।

अन्तिम अपडेट: मंसिर २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्