जन्मका आधारमा नागरिकता पाएकाका सन्तानले पाउन थाले वंशज नागरिकता

चैत २४, २०७५ आइतबार १७:३४:३९ | उज्यालो सहकर्मी

काठमाण्डौ - जिल्ला प्रशासन कार्यालय पर्साले जन्मका आधारमा नागरिकता पाएकाको सन्ततिलाई वंशजका आधारमा नेपाली नागरिकता दिन सुरु गरेको छ ।

आइतबार वीरगंज महानगरपालिका वडा नम्वर १३ का सुरेन्द्र साह सोनार र तारादेवी सोनारका जुम्ल्याहा सन्तान लाई वंशज आधारमा नागरिकता उपलब्ध गराएको हो ।

२० वर्षीया अनुकुमारी सर्राफ र विकासकुमार सर्राफले आइतबार जिल्ला प्रशासन कार्यालयबाट वंशजको आधारमा नागरिकता प्राप्त गर्न सफल भएका हुन् । यस्तै वीरगंज १३ कै महमद आलम र सवाना खातुनका छोरा १८ वर्षीय मोहमद शेष अरमान आलमले पनि वंशजका आधारमा नागरिकता पाएका छन् । तीनै जनालाई पर्साका प्रमुख जिल्ला अधिकारी नारायणप्रसाद भट्टराईले नागरिकता हस्तान्तरण गर्नुभएकाे थियाे ।

दुवै परिवारका बुवाले जन्मको आधारमा नागरिकता लिएका थिए भने आमाले वैवाहिक अंगिकृत नागरिकता लिएका थिए । जन्मका आधारमा नागरिकता पाएकाको सन्तानले वंशजका आधारमा नागरिकता पाउनुपर्ने माग विगत लामो समयदेखि उठाउँदै आएको भए पनि त्यो पूरा हुन सकेको थिएन ।

गृह मन्त्रालयले १९ चैतमा देशभरका ७७ वटै जिल्ला प्रशासन कार्यालयलाई परिपत्र गरी जन्मका आधारमा नागरिकता पाएका बाबुआमाका सन्तानलाई वंशजका आधारमा नागरिकता दिन निर्देशन दिएको थियो ।

परिपत्रपछि जन्मका आधारमा नागरिकता पाएका बाबुआमाका सन्तानलाई जिल्ला प्रशासन कार्यालयले वंशजका आधारमा नागरिकता उपलब्ध गराउन लागेको हो ।

जन्मका आधारमा नागरिकता पाएका बाबुआमाका सन्तानलाई वंशजका आधारमा नागरिकता दिने निर्णय सार्वजनिक भएपछि अहिले पर्सालगायत देशैभरका प्रशासन कार्यालयमा वंशजका आधारमा नागरिकता लिन आउनेहरुको भीड बढेको छ ।

आइतबार तीन जनालाई वंशजको आधारमा नागअधिकारी नारायणप्रसाद भट्टरिकता उपलब्ध गराउँदै अबदेखि जन्मका आधारमा नागरिकता पाएका सन्ततिलाई वंशजको नागरिकता दिने प्रकृया कार्यान्वयनमा ल्याइएको पर्साका प्रमुख जिल्ला राईले बताउनुभयो ।

गृहमन्त्रालयले संविधानको धारा ११ को उपधारा (३) बमोजिम जन्मका आधारमा नागरिकता पाएकाका सन्तानलाई वंशजका आधारमा नागरिकताको प्रमाणपत्र दिनु भनी परिपत्र पठाएको हुँदा त्यस्तो नागरिकता प्रदान गर्न शुरु गरिएको भट्टराईले बताउनुभयो ।

वि.संं. २०६३ मा नागरिकता टोलीले गाउँ–गाउँ पुगेर जन्मका आधारमा नागरिकता प्रदान गरेको थियो । जन्मका आधारमा नागरिकता पाएका बाबुआमाका सन्तान वालिग भइसक्दा पनि नागरिकता नपाउँदा पढाइ र रोजगारीको अवसरबाट वञ्चित हुनुपरेको भन्दै नागरिकता पाउनुपर्ने माग गर्दै आएका थिए ।

आइतबार नागरिकता पाउनुभएकी अनुकुमारी सर्राफले वंशजको आधारमा नागरिकता पाउँदा खुशी लागेको भन्दै अब जागिर खानका लागि ढोका खुलेको बताउनुभयो । नागरिकता नहुँदा सरकारी सेवामा आवेदन दिनबाट बञ्चित हुँदै आउनुभएको थियो । अब त्यो अवरोध भने हटेको भन्दै उहाँले खुशी व्यक्त गर्नुभयो ।

अन्तिम अपडेट: माघ ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्