खुला मञ्च भाडामा लगाउने ठेकेदारकाे ठगी लम्सुवाघाटमा पनि !

वैशाख २४, २०७६ मंगलबार २०:५१:२३ | नवीन गुरुङ

संखुवासभा – एक नम्बर प्रदेशको मुख्यमन्त्री शेरधन राईको गृह जिल्ला भोजपुर र संखुवासभाको सिमानामा रहेको लम्सुवाघाटको पुल नौ वर्षसम्म निर्माण नहुँदा आवतजावतमा समस्या भएको छ ।

संखुवासभाको तुम्लिङटार मनकामना हुर्दै मुख्यमन्त्री राईको गृहजिल्ला तर्ने लम्सुवाघाटको पुल निर्माण नहुँदा भोजपुरवासीले डुङ्गामा बाँधेर जोखिमपूर्ण रुपमा सवारीसाधान ट्याक्सी तारेका छन् । भोजपुर र संखुवासभाका स्थानीयहरु यसरी नै जोखिमपूर्ण रुपमा यात्रा गर्ने गरेका छन् । वर्षातको समयमा डुङ्गामा आवतजावत गर्दा खोला बढेर समस्या हुने गरेको स्थानीयहरुको दुखेसो छ ।

२०६७ सालमा लम्सुवाघाटको पुलको तत्कालीन उपप्रधान तथा भौतिक योजना तथा निर्माणमन्त्री विजयकुमार गच्छदारले शिलान्यास गर्नु भएको थियो । तर यो मोटर गुडाउने पुल नौ वर्ष बित्दा ३० प्रतिशत मात्रै काम भएको छ भने पुलको लम्बाइसमेत ८२ मिटर छोटो रहेको छ ।

१३ करोड ५ लाख रुपैयाँको लागतमा सम्पन्न गर्ने गरी पहिलो पटक सम्झौता गरिए पनि समय थप्ने क्रममा पिलरको डिजाइन परिर्वतन गरेसँगै यो पुलको लागत १६ करोड ६३ लाख पुर्‍याइएको छ ।

गृह जिल्ला लम्सुवाघाटमा डुङ्गामा तार्दै सवारी साधन

१ सय ६५ मिटर लम्बाइ रहेको यस पुलको निर्माण कार्य नहुँदा पुलसँगै जोडिने ९० मिटरको अर्को खण्डको पुलको ठेक्का लागाउन सकिएको छैन । खोलाको बहाव बढेपछि पुलको लम्बाइ नपुग्ने भएको हो । अब नयाँ ठेक्का लगाएर ८२ मिटर थप गरी २ सय ४७ मिटरको बनाउनु पर्ने सडक डिभिजन तुम्लिङटारका प्रमुख कृष्णराज अधिकारीले बताउनुभयो ।

नौ वर्षको अवधिमा ७ वटा पिलर मात्र ठड्याइएको छ । तीन वर्षभित्र निर्माण कार्य सम्पन्न गर्ने गरी स्वच्छन्द निर्माण कम्पनीले २०६७ साल असार २५ गते सम्झौता गरेपनि पिलर राख्ने र खाल्डो खन्ने क्रममा चट्टान भेटिएको भन्दै ठेकेदार कम्पनीले काम छोडेको थियो । स्वच्छन्द निर्माण कम्पनी खुला मञ्चको सार्वजनिक जग्गा भाडामा लगाउने मनोज भेटवालकै हो । पटक–पटक विभिन्न बहाना बनाएर उनको कम्पनीले पुल निर्माण कार्यमा ढिलाइ गरिरहेको छ ।

लामो समय निर्माण कार्य रोकिएपछि केही डिजाइन परिर्वतन गरेर समय पनि थपिएको थियो । ०७० असार २५ सम्ममा काम सक्नुपर्ने भए पनि विभिन्न कारण देखाउँदै काम नगरेपछि २०७४ असार २४ सम्म समय थप गरिएको थियो । ठेकेदारले यसरी थपिएको समयभित्र पनि निर्माण आयोजना सम्पन्न गर्न सकेन । त्यसपछि एक वर्षका लागि म्याद थप गरे पनि काम सम्पन्न गर्ने छाँटकाँट देखिएको छैन ।

करोडौँ रुपैयाँको लागतमा निर्माण हुने भनिएको पुल अहिलेसम्म नबन्दा स्थानीय नागरिक सास्ती भोग्न बाध्य छन् । गाउँ वारि र पारि देखिए पनि पैदल घुमेर हिँड्दा घण्टौँ लाग्ने गरेको स्थानीयहरुको गुनासो छ । हिउँदको समयमा जोखिमपूर्ण डुङ्गाको सहारा लिए पनि बर्षातको समयमा डुङ्गाको यात्रा पनि जोखिम हुने उनीहरुको भनाइ छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्