मलेसिया जान घरबाट हिँडेका श्रीमानको मृत्युको खबर आयो

जेठ ८, २०७६ बुधबार १२:५४:५८ | सुजता सुनुवार

इलाम – गएको आइतबार धादिङको आदमघाट नजिकै बन्छेटारको घुम्तीबाट त्रिशूली नदीमा खसेको बससँगै पवित्रा मगरको सपना पनि त्रिशूली नदीमा डुब्छ भन्ने के थाहा र !

‘राम्रो काममा लागि मलेसिया जाँदैछु, राम्रोसँग घर सम्हाल्नु’ भनेका श्रीमान् कहिल्यै नफर्कने बाटो लाग्छन् भन्ने कल्पनासमेत थिएन । तर दैवको अघिल्तिर के लाग्थ्यो र !

मृतक शेखर मगर

काकडभिट्टाबाट काठमाण्डौका लागि छुटेको ना ७ ख ४३८७ नम्बरको रात्री बस त्रिशूली नदीमा खस्दा मलेसिया जान त्यही बसमा चढेका पवित्राका श्रीमान् शेखर मगर पनि खस्नुभयो । घटनास्थलमा नै पाँच जनाको ज्यान गयो ।

घटनास्थलमै ज्यान गुमाउनेको सूचीमा पहिलो नम्बरमा नाम थियो, पवित्राका श्रीमान् शेखरको । मलेसिया हिँडेका इलामको माईजोगमाई गाउँपालिका वडा नम्बर १ लप्सिबोटेका शेखरको जीवन यात्रा त्यहीँ नै टुङ्गियो ।

झापाबाट गाडी चढ्नुअघि शेखरसँग पवित्राको फोनमा कुरा भएको थियो । फोनमा शेखरले भन्नुभएको थियो, ‘मेरो ४ः३० बजे गाडीको टिकट छ, यस वर्ष राम्रो कामका लागि विदेश जाँदैछु, म घरखर्चका लागि पैसा पठाइहाल्छु, बरु कृषि विकास बैंकमा खाता खोल्नु ।’

‘घर राम्रोसँग हेर्नु, बालबच्चाको ख्याल गर्नु भन्नुभएको थियो, म त काठमाण्डौ पुगेर फोन गर्नुहोला भन्ने सोचिरहेको थिएँ, एकैपटक बस दुर्घटना भएको खबर पो आयो,’ पवित्राले आँसु पुछ्दै भन्नुभयो ।

श्रीमान् चढेको बस त्रिशूलीमा खस्यो भन्ने खबर उहाँले आइतबार बिहान ९ बजेतिर सुन्नुभयो । आफन्तलाई शेखरको बारेमा बुझ्न लगाउनुभयो । सबैले ‘घाइते भएको र उपचार भइरहेको’ खबर दिए ।

कुन अस्पतालमा उपचार भइरहेको होला ? के के भएको होला ? पवित्राको मनमा आँधी चलिरहेको थियो । आफन्तले भने वीर अस्पतालमा उपचार हुँदैछ । उहाँ शुभ खबर सुन्न आतुर हुनुहुन्थ्यो ।

तर भोलिपल्ट उज्यालो नहुँदै उहाँको आशाको त्यान्द्रो चुँडियो । श्रीमानलाई जीवितै भेट्ने आश पालेर भगवान पुर्कार्दै बसेकी पवित्राले सोमबार बिहान उज्यालो नहुँदै घटनास्थलमै मृत्यु भएको खबर सुन्नुभयो ।

शेखरको यो मलेसियाको दोस्रो पटकको यात्रा थियो । २०६७ सालमा पहिलो पटक शेखर मलेसिया जानु भएको थियो । त्यसपछि साउदी पनि जानुभएको थियो ।

जेठ ९ गतेको थियो, उहाँको मलेसियाको उडान । सेक्युरिटीको काममा मलेसिया जान लाग्नुभएका ३८ वर्षीय शेखर र परिवारको सपना त्रिशूली नदीमै डुब्यो ।

बिरामी भतिज लिन गएका विशाल कहिल्यै नफर्कने भए

शेखरसँगै यात्रामा रहनु भएका इलाम कन्यामका अर्का एक युवाको पनि त्यही दुर्घटनामा ज्यान गयो । यसअघि हेटौंडामा भएको अर्को दुर्घटनामा घाइते भएका भतिजलाई भेट्न र सँगै लिएर आउन काठमाण्डौ हिँडेका विशाल गिरी (कुमार)ले भतिजलाई भेट्न पाउनुभएन । दुर्घटनामा घाइते भएका भतिजलाई भेट्न जाँदा दुर्घटनामै परेर विशालको ज्यान गयो ।

मृतक विशाल गिरी

गएको शनिबार काठमाण्डौबाट जनकपुरको लागि छुटेको ना ७ ख ९३६ नम्बरको बस र इलामको पशुपतिनगरबाट काठमाण्डौको लागि छुटेको ना ७ ख २०५७ नम्बरको बस हेटौंडामा एक आपसमा ठोक्किँदा दुर्घटना भएको थियो । त्यही परी वैदेशिक रोजगारीका लागि हिँडेका सरोज गिरी घाइते हुनु भएको थियो ।

दुर्घटनामा परी घाइते भएका भतिज सरोजलाई लिन गएका सूर्योदय नगरपालिका ७ कन्याम पाल्टागेका ३६ वर्षका विशालको मृत्युले गिरीको परिवार विक्षिप्त अवस्थामा छ । विशाल मलेसियाबाट दुई महिनाको छुट्टिमा आउनु भएको थियो ।

अन्तिम अपडेट: मंसिर १, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुजता सुनुवार

सुजता सुनुवार उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्