६४ वर्षपछि पहिलो पटक विश्वकपको क्वार्टरफाइनलमा पुग्ने लक्ष्यका साथ स्वीट्जरल्याण्ड

असार १९, २०७५ मंगलबार १४:५६:२५ | उज्यालो सहकर्मी

फुटबलको वर्तमान परिप्रेक्षमा स्वीट्जरल्याण्ड बलियो टोली होइन । तर, उसको आफ्नै विरासत छ । सन् १९२४ को ओलम्पिक उपविजेता स्वीट्जरल्याण्डको विश्वकप रेकर्ड भने राम्रो रहन सकेन ।

सन् १९३४, १९३८ र आफैंले आयोजना गरेको सन् १९५४ को विश्वकपमा उसले क्वार्टरफाइनलमा मात्र पुग्न सकेको थियो ।

त्यही स्वीट्जरल्याण्ड ६४ वर्षपछि पहिलो पटक विश्वकपको क्वार्टरफाइनलमा पुग्ने लक्ष्यसहित पूर्व उपविजेता स्वीडेनसँग रुसको सेन्ट पिटर्सवर्ग रंगशालामा उत्रँदैछ ।

सन् १९५८ को उपविजेता तथा सन् १९९४ मा तेस्रो भएको स्वीडेनमा नाम चलेका स्टार खेलाडीहरु छैनन् । तर, उसको एकीकृत टिम गेमले समूह एफमा जर्मनीलाई पछि पार्दै उसले समूह विजेताको ताज पाएको थियो ।

समूह चरणमा मेक्सिकोविरुद्धको अन्तिम खेल उसका लागि अविष्मरणीय रह्यो ।

स्वीस स्ट्राइकर ब्रील एम्बोलोले अपेक्षा राखेका छन् कि सेन्ट पिटर्सवर्गमा स्वीडेनलाई हराएर विश्वकपको क्वार्टरफाइनलमा पुग्ने सपना साकार पार्न सकियोस् ।

एम्बोलो समूह इको अन्तिम खेलमा कोष्टारिकाविरुद्ध २–२ को बराबरी भएलगत्तै आफ्नी नवजात छोरी भेट्न स्वीट्जरल्याण्ड पुगेका थिए ।

उनकी श्रीमतीले गएको बिहीबार छोरीलाई जन्म दिएकी थिइन् ।

‘यो एकदमै सही समय हो ।’ जर्मन क्लब शाल्केका युवा स्टार एम्बोलोले भने, ‘म सिधै एयरपोर्टबाट अस्पताल पुगेँ र ठीक समयमा पुगेँ ।’

‘म धेरै खुसी छु किनभने नालियाको जन्म मेरो जीवनको सबैभन्दा खुसीको क्षण हो ।’

‘अब म आशा राख्छु कि हामी छिट्टै स्वीट्जरल्याण्ड फर्कनेवाला छैनौं, हामी रुसमा केहि हासिल गर्न चाहन्छौं ।’

एम्बोलोले रुसमा स्वीट्जल्याण्डका लागि दुई खेल सब्स्टिच्युटका रुपमा खेले भने एक खेलमा प्लेइङ सेटमा अटाए । तर, प्रशिक्षक भ्लादिमिर पेटकोभिचका लागि सेन्ट्रल फरवार्डको रुपमा एम्बोलो उत्तम बिकल्पको रुपमा देखिएका छन् ।

स्ट्राइकरहरु ह्यारिस सेफेरोभिक, मारियो गाभ्रानोभिक दुवै रुसमा आफूलाई प्रमाणित गर्न असफल रहे ।

‘२१ वर्षीय एम्बोलोले भने, ‘स्वीडेन एक बलियो टिम हो । तर, हामी राम्रोसँग तयार छौैं, हामी क्वार्टरफाइनलमा पुग्नका लागि जे गर्न पनि तयार छौं ।’

‘दुई वर्ष पहिला हामी युरो २०१६ को अन्तिम १६ मा पोल्याण्डसँग हारेका थियौं । त्यहाँबाट हामीले सिकेका छौं ।

तथ्य हो छ कि रुसमा हामी दुई पटक पछि परेको स्थितिबाट माथि उठ्न सफल भएका छौं । हामी देखाउन चाहन्छौं कि हामी अधिक तयार छौं ।’

दुई पहेँलो कार्डको प्रतिबन्धका कारण स्वीडेनका मिडफिल्डर सेबास्टियन लार्सन आजको खेलमा हुने छैनन् । यसको अर्थ मिडफिल्डमा गुस्ताव सेभेन्सनले सुरुआत गर्नेछन् ।

यता स्वीट्जरल्याण्डका दुई रक्षात्मक जोडी स्टेफन लिचस्टेनर र फावियन सारले पनि दुई पहेलो कार्डका कारण आजको खेल गुमाउनेछन् ।

लिग खेलजस्तो फुटबलको माध्यमबाट मनोरञ्जन दिने समय नकआउट चरणमा हुँदैन ।

स्वीडेनका प्रशिक्षक जेने एण्डरसनले अपेक्षा गरेका छन् कि उनका अग्रपंक्तिले पनि रक्षात्मक फुटबल खेल्नेछन् ।

उनले पत्रकार सम्मेलनमा भनेका छन्, ‘मुख्य कुरा के हो भने मैदानमा रहेका हरेक खेलाडी एक डिफेण्डर हुन् । मार्कोस वर्ग र ओला टोबोनन्ले त्यही अनुसार गरिरहेका छन् पनि ।’

प्लेयर्स टू वाच

एमिल फोर्सवर्ग, स्वीडेन

ज्लाटन इब्राहिमोबीचले अन्तर्राष्ट्रिय फुटबलबाट सन्यास लिएपछि उनको उत्तराधिकारीको रुपमा हेर्न थालिएका क्षमतावान प्लेमेकर हुन् फोर्सवर्ग ।

आरबी लिपजिगका यी स्टार अहिलेसम्म जारी विश्वकपमा स्वीडेनका लागि त्यति प्रभावशाली बन्न सकेका छैनन्, जति उनीबाट अपेक्षा गरिएको छ ।

तर, उनले आफ्नो गुमेको लय खोज्ने यो सबैभन्दा उत्तम अवसर हुनसक्छ ।

जर्दान साकिरी, स्वीट्जरल्याण्ड

समूह चरणमा सर्वियाविरुद्ध अन्तिम समयमा विजयी गोल गरेपछि भावुक बनेर आलोचित भएका शाकिरी रुसमा शानदार खेलिरहेका छन् ।

आफ्नो दिन चलेको बेलामा विष्फोटक गेम चेञ्जरको रुपमा रहने साकिरीबाट स्वीट्जरल्याण्डले आज त्यस्तै अपेक्षा गरेको छ ।

म्याच फ्याक्ट्स

– स्वीट्जरल्याण्डले विश्वकपमा गरेका पछिल्ला १४ मध्ये ११ गोल दोस्रो हाफमा सम्भव भएको छ । यही विश्वकपमा पनि ५ मध्ये ४ गोल स्वीट्जरल्याण्डले दोस्रो हाफमा गरेको थियो ।

– जारी विश्वकपमा स्वीडेनका लागि इमिल फोर्सवर्गले २१ र मार्कोस वर्गले ३७ शट प्रहार गरेका छन् । आश्चर्यजनक रुपमा दुवै खेलाडी अहिलेसम्म गोलविहीन छन् ।

– स्वीट्जरल्याण्ड सन् १९५४ पछि विश्वकपको क्वार्टरफाइनलमा पुग्न सकेको छैन । ठूला प्रतियोगिताको नकआउट चरणमा गोल गर्ने जर्दान साकिरी अहिलेको टिमका एक्ला खेलाडी हुन् ।

– स्वीट्जरल्याण्डबिरुद्धको आजको खेल स्वीडेनका लागि विश्वकपको ५०औं खेल हो । मात्र ११ टिमले यो कोशेढुंगा पार गर्न सकेका छन् । तीमध्ये मेक्सिकोले मात्र अहिलेसम्म विश्वकप जित्न सकेको छैन ।

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्