विराटनगर–इटहरी ६ लेन सडकको लापरवाही: अन्तत: सडक बीचका पोल उखेलिने

जेठ ९, २०७६ बिहीबार १७:२६:५४ | सुमन तिमल्सिना

माेरङ - रानी–विराटनगर–इटहरी–धरान ६ लेन सडकका बीचमा रहेका बिजुलीका खम्बाहरु उखेलिने भएका छन् ।

नमुना व्यापारिक मार्ग निर्माणको काम एक त ढिला भएको छ भने भएको काममा पनि मनलाग्दी हुन थालेको समाचार उज्यालो अनलाइनमा आएपछि विद्युत् प्राधिकरणकाे ध्यान आकर्षण भएको छ ।

६ लेन सडकको बीच भागमा बिजुलीको खम्बा राखेर कालोपत्रे गरिएकाे समाचार सार्वजनिक भएपछि प्राधिकरणकाे ध्यान आकर्षण भएकाे हाे । सडककाे ठेक्का सम्झौतामा नै नपरेको क्रसिङको विषय ठेक्का लगाउँदादेखि नै ध्यान नदिएको देखिएको छ । ठेक्कामा छुटेको कारण ठेकेदार कम्पनीले यो काम नगरेर कालोपत्रे गरेको भन्दै सडक बिस्तार आयोजना र विद्युत् प्राधिकरणसम्म यो बिषय पुगेको हो ।

रानी–धरान ६ लेन सडक निर्माणको काम २०६९-७० को बजेट पछि शुरु भएको हो । तर बजेट आउने र निर्माण हुने क्रम लामै समय भएपनि अहिलेसम्म कुनै ठाउँमा काम पूरा भएको छैन । ठेकेदार कम्पनीकाे मनपरी तथा अनुगमनको काम पनि फितलो भएको स्थानीयको बुझाइ छ ।

टंकीसिनवारीका स्थानीय कपिल सुनारले काममा लापरवाही भएको बताउनुभयो । आधा दर्जन बढी खम्बाहरु सडकको बीचमा नै छाडेर कालो पत्रे गरिएपछि परियोजना नै जिम्मेवार नदेखिएको उहाँले आरोप लगाउनुभयो ।

ठेकेदार कम्पनीले भने आएका समस्या समाधान गरिदिए काम पूरा गर्न समस्या नभएको बताउँदै आएको छ । अबको काम पूरा गर्दा डिभाइडरमा एउटा र दुई छेउमा १-१ वटा खम्बा रहनेछन् जसकाे उचाइ भनेको १३ मिटरको हुनेछ ।

डिभाइडर भनेको सडकको बीच भाग भएकाले त्यहीँ खम्बा गाडेर तत्काललाई समस्या समाधान निकाल्ने दाउमा परियोजना र विद्युत् प्राधिकरण छन् । आयोजनाका इन्जिनियर गौतम कुमार देवले तत्काल डिभाइडरमा खम्बा नगाडिए समस्याको समाधान ननिस्कले बताउनुहुन्छ ।

एकले अर्कोलाई आरोप लगाउने र आफू पञ्छिने प्रवृत्तिका कारण निर्माणाधीन सडकका कामहरु बेला बेला विवादमा पर्दै आएका छन् । ठेक्का लगाउने, सम्झौता गर्ने र कार्यान्वयन भए-नभएको सबै काम भनेको ६ लेन सडक आयोजनाको नै हो । तर समस्या आएपछि जोडिने भनेको सम्बन्धित कार्यालयहरु पनि हुन् ।

विवादसँग जोडिएको विद्युत प्राधिकरण विराटनगर वितरण केन्द्रले ठेक्का प्याकेजमा लगाइएकोले यो विषय आफ्नो नभएको दावी गर्दै आएको छ । कार्यालयका प्रमुख राजिवकुमार सिंहले सुपरिवेक्षण र लाइन मिलाउने मात्र काम आफ्नो भएको बताउनुभयो ।

‘मेरो जिम्मेवारी हैन भनेर चुप लागेर बस्ने कुरा आउँदैन । काममा हेलचेक्र्याइँ भयो भने त्यसलाई व्यवस्थित गर्नैपर्छ । म यो समस्या चाँडै समाधान गर्नको लागि लागिपरेको छु,’ सिंहले भन्नुभयो, ‘अबको केही दिन भित्रमा बीच सडकको खम्बा उखेलिने छ ।’

बिजुलीका पोलसँग सम्बन्धित निर्माण सामग्री समयमा उपलब्ध नगराउँदा पनि समस्या देखिएको बताइन्छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुमन तिमल्सिना

सुमन तिमल्सिना मोरङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्