‘श्रीमान विदेशबाट रित्तो हात फर्किए पनि केही गरौंला भन्ने आँट छ’

 असार १२, २०७६ बिहीबार १७:१५:३१ | मेरो कथा मेरो भोगाई

ज्ञानमाया राई/मोरङ, लेटाङ ।

धेरैको सपना हुन्छ विदेशमा गएर कमाउने । त्यसैले मन नमान्दा नमान्दै श्रीमानलाई सपनाको देश पठाउनुपर्ने हुन्छ । विदेश पुगेर श्रीमानले कमाए त ठिकै हो । तर कमाएनन्, समस्यामा परे भने श्रीमतीलाई घरमा ऋणमाथि पीर थपिन्छ । 

म त्यस्तै एक परदेशीकी श्रीमती हुँ । मेरो श्रीमान् ६ वर्षअघि साउदी जानुभयो । छरछिमेकदेखि साथीसम्म विदेश नजाने कोही थिएनन् । भारतमा गाडी चलाइरहेका मेरो श्रीमानले पनि अरु नै देश जाने रहर गर्नुभयो । भारतको काम छाडेर नेपाल आउनुभयो । 

गाउँकै एकजना एजेण्टले विदेश पठाउने मेलोमेसो मिलाइदिन्छु भने । होला भन्ने लाग्यो । कहिले के भन्या छ, कहिले के भन्या छ । काठमाण्डौ पनि धैरे पटक धाउनुभयो मेरो श्रीमान् । विदेश जानुअघि नै एक÷डेढ लाख रुपैयाँ त सकियो होला । 

६ पटक त मेडिकल मात्रै गरायो । त्यसपछि बल्ल साउदी उडायो । ड्राइभरको काममा भनेर पठाएको, तर उता पुगेपछि काम लगाइदिए छन् लेबरको । ऋण त छँदै थियो भनेअनुसारको काम र दाम नभएपछि अब पीर पनि थपियो । 

मैले श्रीमानलाई तपाईँले जे काम पाउनुभएको छ त्यो राम्रोसँग गर्नुस् भनेर भनेँ । उहाँलाई सम्झाएँ । पीर नगर्नुस्, काम गर्नुस् आरामले भनेर । तर उहाँले यहाँबाट के के सोचेर जानुभएको थियो, त्यस्तो नहुँदा चिन्ता धेरै लिनुभयो । 

मैले घर चलाएँ । कुखुरा पालेँ । बाख्रा पालेँ । घरव्यहार यसरी नै चलाएँ । उहाँ ६ वर्ष बस्नुभयो, साउदीमा । तर केही भएन । न ऋण तिरियो, न पीर सकियो ।

केही नभएपछि उहाँ फर्किएर आउनुभयो । अहिले त ढुक्क भएको छ । ऋण छ । खेतिपाती र आफ्नो केही पनि छैन । मुन्टो लुकाउने बास पनि आफ्नो छैन हाम्रो ।

तर पनि आफ्नो मान्छे साथैमा हुँदा त केही गरौंला भन्ने आँट आउँदो रहेछ । विदेशमा कमाएर घरबारी जोडौंला त भन्नु परेन, तर पनि अझैं केही गरौंला भन्ने आँट छ। 
जस्तो होस् जे होस् अब त श्रीमान् विदेश पठाउन्नँ । एक दिन त हाम्रो पनि दिन आउला नि । पृथ्वी गोलो छ सबैको एक दिन पालो आउँछ भन्छन् । म मेरो पालोको प्रतीक्षामा छु । 

अन्तिम अपडेट: मंसिर २९, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

1 Comments

  • Mekh rai

    June 27, 2019, 9:30 p.m.

    अबश्य पनि एकदिन आउनेछ चेली

  •  0 Reply

तपाईको प्रतिक्रिया

समाचार

लोकप्रिय

१

सालझण्डी–ढोरपाटन खण्डको काम १४ वर्षमा ३० प्रतिशत मात्र

२

जर्जियाको एक स्की रिसोर्टमा ११ जना भारतीय नागरिकसहित १२ जनाको शव भेटियो

३

रुसको राजधानी मस्कोमा भएको विस्फोटमा आणविक क्षेत्रका जनरलसहित दुई जनाको ज्यान गयो

४

इजरायलमा हाइपरसोनिक मिसाइल हानेको यमनको हुथी विद्रोहीको दाबी

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई