विश्वकपले अब के पाउला: दुर्इ नयाँ फाइनलिस्ट या दुर्इ पूर्व-च्याम्पियन ?

असार २४, २०७५ आइतबार १८:१०:५० | उज्यालो सहकर्मी

रुसमा जारी फिफा विश्वकपको २१ औं संस्करणले चार सेमीफाइनलिस्ट पाइसकेको छ ।

तर विश्वकपको इतिहासमा पहिलो पटक दक्षिण अमेरिकी टिम अन्तिम चारमा अटाउन सकेनन् ।

विश्व फुटबलका तीन ठूला टिम जर्मनी, ब्राजिल र अर्जेन्टिना एकैपटक सेमीफाइनल नपुगेको पनि यो पहिलो पटक नै हो ।

रुस विश्वकपमा यस्ता धेरै नसोचेका, अनुमान नगरिएका नतिजाहरु आउने क्रम अझै जारी छ । सेमीफाइनल समीकरण पूरा भएसँगै विश्वकपको उत्साह अझ थपिएको छ ।

सेमीफाइनलमा फ्रान्स र बेल्जियम तथा इंग्ल्याण्ड र क्रोएसियाबीच प्रतिस्पर्धा हुनेछ । यी चार टिममध्ये फ्रान्स र इंग्ल्याण्डले एक एक पटक विश्वकपको उपाधि जितेका छन् ।

यदि बेल्जियम र क्रोएसिया फाइनल पुगे भने विश्वकपले नयाँ च्याम्पियन पाउनेछ ।

फ्रान्सले क्वार्टरफाइनलमा दक्षिण अमेरिकी टोली उरुग्वेलाइ दुई–शून्य गोलले पराजित गर्दै १२ वर्षपछि सेमीफाइनलमा स्थान बनायो ।

मुख्य स्ट्राइकर इडिसन काभानीको चोट उरुग्वेका लागि महँगो सवित भयो ।

रफायल भाराने र एन्टोइन ग्रिजम्यानको गोलको मद्दतमा फ्रान्स विश्वकप उपाधि दोब्बर गर्ने लक्ष्यतर्फ अघि बढेको छ ।

त्यसैबीच अर्को क्वार्टरफाइनलमा हाइ प्रोफाइल टिम ब्राजिल र बेल्जियम आमने–सामने भएका थिए ।

पाँच पटकको च्याम्पियन ब्राजिललाई तुलनात्मक रुपमा बलियो मानिएको थियो । तर नतिजा बेल्जियमको पक्षमा आयो ।

जारी विश्वकपमा ब्राजिलले खेलेका खेल मध्ये बेल्जियमविरुद्ध उत्कृष्ट प्रदर्शन गरेको थियो ।
तर उसले बेल्जियमको चुनौति समाप्त पार्न सकेन ।

बेल्जियम दुइ–एक गोलले ब्राजिललार्इ पराजित गर्दै ३२ वर्षपछि सेमीफाइनलमा स्थान बनाउन सफल भयो ।
बेल्जियमले ५५ वर्षपछि ब्राजिलमाथि जित हात पारेको हो ।

रोबर्टो मार्टिनेजको टोली बेल्जियमका लागि उपाधि जित्ने यो विश्वकप जस्तो सुनौलो अवसर अर्को पटक नहुन सक्छ ।
ब्राजिलको हारसँगै रुस विश्वकपमा दक्षिण अमेरिकी टिमको यात्रा समाप्त भएको थियो ।

नेइमार, गाब्रिएल जिजस, फिलिपे कोउटिन्हो, विलियान, पाउलिन्हो जस्ता स्टार खेलाडीले भरिएको ब्राजिलले पनि अर्जेन्टिना, स्पेन र जर्मनीकै बाटो पछ्यायो ।
हारपछि पनि आफ्नो टिमको एकतामा कुनै कमी नहुने ब्राजिलियन प्रशिक्षकको भनाइ छ ।

अर्को सेमीफाइनलिस्ट इंग्ल्याण्डले प्रि–क्वार्टरफाइनलमा स्विडेनलाई दुई–शून्यले पराजित गर्यो ।

उत्कृष्ट लयमा देखिएको इंग्ल्याण्डले २८ वर्षपछि सेमीफाइनलमा स्थान बनाएको हो ।

१९६६ मा विश्वकप जितेयता कुनैपनि ठूलो प्रतियोगिता जित्न नसकेको इंग्ल्याण्डले यसपटक नयाँ इतिहास कोर्ने धेरैको अनुमान छ ।

ग्यारेथ साउथगेटको नेतृत्वमा रहेको इंग्ल्याण्डलाइ यसपटक ‘इट्स कमिङ होम’ को नारालाई यथार्थमा बदल्ने सुनौलो मौका पनि छ ।
आयोजक रुस र क्रोएसियाबीचको क्वार्टरफाइनल भने प्रतिस्पर्धात्मक र रोमाञ्चक बन्यो ।

निर्धारित समयमा एक एक गोल भएको खेलको अतिरिक्त समयमा दुवैले एक एक गोल गरेका थिए । थप गरिएको समयमा गोल भएको जारी विश्वकपमा यो पहिलो पटक हो ।

पेनाल्टी शुटआउटमा क्रोएसिया भाग्यमानी बन्दा घरेलु समर्थक स्तब्ध बने ।

१९९८ पछि क्रोएसियाले पहिलाेपटक सेमीफाइनल यात्रा तय गरेको हो । पराजय भोगे पनि रुसले मन भने जित्न सफल भयो ।

अब विश्व फुटबलको जिज्ञासु नजर मंगलबारबाट सुरु हुने सेमीफाइनलमा छ । याे थाह पाउन कि अब विश्वकपले दुइ नयाँ फानइलिस्ट पाउला या दुइ पूर्व च्याम्पियन ?

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्