वैदिक साहित्यमा मार्क्सवादी विवेचना भर्ने व्यक्तित्व दीक्षित

साउन ३०, २०७६ बिहीबार १४:२७:९ | रासस

प्रकाश सिलवाल/रासस ।

मदनमणि दीक्षित । वैदिक साहित्यलाई मार्क्सवादी विचारका आधारमा विवेचना गर्न सक्ने सीमित लेखकमध्ये अग्रपङ्क्तिमा लिइने नाम हो ।

रक्षाबन्धनका दिन बिहानै तिनै मूर्धन्य स्रष्टा दीक्षितको निधनको खबरले नेपाली राजनीति, साहित्य, पत्रकारिता र पाठक वर्ग स्तब्ध भएको छ । कृतिगत र समग्र योगदानको स्मरण गर्दै उहाँको निधनलाई बौद्धिक क्षेत्रमा अपूरणीय क्षतिका रुपमा लिइएको छ ।

पञ्चायतकालमा ‘समीक्षा’ पत्रिकाका माध्यमबाट उहाँले छरेको चेतना होस् वा ‘माधवी’ उपन्यासले खिंचेको वैदिक साहित्य दर्शनको चित्र होस्, सबैमा दीक्षितको व्यक्तित्व र सङ्घर्ष झल्कन्छ । ‘माड्साब’को त्यही योगदानलाई सम्झँदै देशका शीर्ष नेता र स्रष्टाहरूले उहाँलाई उच्च सम्मान दिएका छन् । प्रधानमन्त्री केपी शर्मा ओलीले उहाँलाई ‘प्राच्य साहित्य दर्शनका ज्ञाता’ का रुपमा लिँदै श्रद्धाञ्जलि व्यक्त गर्नुभएको छ ।

लामो समयदेखि मुटु, मिर्गौला र श्वासप्रश्वाससम्बन्धी समस्या भोगेका दीक्षितको ९७ वर्षका उमेरमा आज बिहान कमलपोखरीस्थित हिमाल अस्पतालमा निधन भएको थियो । गत साता उपचारका लागि ललितपुरको सुमेरु अस्पताल भर्ना गरिनुभएका उहाँलाई बुधबार कालिकास्थानस्थित निवासमा ल्याएको थियो ।

साहित्य र पत्रकारिता जीवनका क्रममा उहाँसँग राजा महेन्द्र र वीरेन्द्र, नेताहरू विपी कोइराला, गणेशमान सिंह, पुष्पलाल, मनमोहन अधिकारी, विश्वबन्धु थापा, डा तुल्सी गिरी आदिसँगका संवाद र उठबसलाई दीक्षितले अन्तर्वार्ता र स्मरणका माध्यमबाट समय–समयमा रोचक रूपमा सार्वजनिक पनि गर्दै आउनुभएको थियो ।

नेपाल प्रज्ञा –प्रतिष्ठानको उपकुलपतिको जिम्मेवारीसमेत निर्वाह गरिसक्नुभएका दीक्षितका ‘माधवी’, ‘द्रौपदी’, ‘अहिल्या’, ‘ग्यास च्याबरको मृत्यु’ जस्ता ४५ भन्दा बढी कृति प्रकाशित छन् । उहाँ पछिल्लो समयमा पनि आफ्ना सहयोगीमार्फत लेखनीमा सक्रिय हुनुहुन्थ्यो । उहाँले ‘माधवी’ उपन्यासको आठौँ संस्करणका लागि परिमार्जन पनि गर्नुभएको छ ।

माधवीले विसं २०३९ का लागि मदन पुरस्कार प्राप्त गरेको थियो । उहाँका ‘चरैवेति’ (निबन्ध २०४४), ‘त्यो युग’ (निबन्ध २०४७), ‘हाम्रा ती दिन’ (निबन्ध, २०२९), ‘म रुँदै बिर्सन्छु’ (संस्मरण, २०२७), ‘बर्लिन डायरीका पाना’ (यात्रावर्णन, सन् १९८४), ‘लाखौंँ शिशुहरू लिफ्ट मागिरहेछन्’, ‘मेरी आमाको प्रश्नलाई आज जवाफ चाहिएको छ’, ‘कसले जित्यो कसले हार्‍योे’ (कथा २०२१), ‘दश लाख हिरोसिमातिर’, ‘जीवन महाअभियान’, ‘ऋग्वेद : केही प्रमुख सूक्त (२०६५) ‘मेरी नीलिमा’ र ‘भूमिसूक्त’ आदि पुस्तक प्रकाशित छन् । विसं २०५२ मा तत्कालीन नेपाल राजकीय प्रज्ञा– प्रतिष्ठानको उपकुलपति भएपछि उहाँले ‘समीक्षा’ पत्रिका छोरा विनोदलाई हस्तान्तरण गर्नुभएको थियो । त्यसको केही समयपछि पत्रिकाले निरन्तरता पाउन सकेन ।

संस्कृति, पर्यटन तथा नागरिक उडड्यनमन्त्री योगेशकुमार भट्टराईले उहाँलाई नेपाली साहित्य, पूर्वीय दर्शन, पत्रकारिता र राजनीतिक क्षेत्रका अग्रज तथा सम्मानित व्यक्तित्व लिँदै २००७ सालअघिको जहानियाँ राणाशासन विरोधी आन्दोलन तथा पञ्चायत विरोधी प्रजातान्त्रिक आन्दोलनमा निर्वाह गर्नुभएको भूमिका सदा स्मरणीय हुने जनाउनुभएको छ । नेपाल कम्युनिष्ट पार्टीका संस्थापक नेता पुष्पलालको नेतृत्वमा कम्युनिष्ट आन्दोलनको विस्तारमा उहाँको सक्रियता प्रेरणादायी रहिरहने बताउनुभएको छ ।

वरिष्ठ साहित्यकार मोदनाथ प्रश्रित सुरुदेखि नै अत्यन्तै अध्ययनशील र मार्क्सवादी विचारयुक्त व्यक्तिका रुपमा दीक्षितलाई सम्झनुहुन्छ । प्रश्रित भन्नुहुन्छ, 'त्यही विचारका आधारमा उहाँले प्राचीन साहित्य र इतिहासको व्याख्या गर्नुभयो । इतिहास, संस्कृति र विज्ञान सबैलाई समेटेर लेख्न सक्ने पुरानो पुस्ताको एक हस्तीका रुपमा उहाँलाई लिनुपर्छ ।'

वरिष्ठ साहित्यकार प्रा. डा. अभि सुवेदीले नेपालमा विचारप्रधान र वामपन्थी पत्रकारिता गर्ने अग्रणी व्यक्तिका रुपमा लिँदै कुनै पनि पार्टीमा प्रत्यक्ष संलग्नता नरहेकाले दीक्षितका विचारमा कहिले वामपन्थ तथा कहिलेकाहीँ पञ्चायत र राजतन्त्रका कतिपय कामबारे प्रशंसा गरेको पाइने जनाउनुभयो ।

वरिष्ठ कवि एवं राससका कार्यकारी अध्यक्ष श्यामल अधिकारीले दीक्षितको निधनले नेपाली साहित्यमा वैचारिकताको पक्षमा हुने बहसको शृङ्खलामा एक प्रकारको रिक्तता महसुस हुने प्रतिक्रिया दिनुभयो । उहाँको मत छ, 'राजनीति, पत्रकारिता र साहित्यका त्रिवेणी दीक्षित हाम्रो अग्रपुस्ताका एक मनीषी हुनुहुन्थ्यो । उहाँको महाप्रस्थानसंँगै बहस र विवादबाट विचारमा निखार ल्याउन चाहने पुरानो पुस्ताको अब लगभग अन्त्य भयो ।'

प्रगतिशील लेखक सङ्घका पूर्व अध्यक्ष मातृका पोखरेल आफ्नो पहिलो कविता ‘सूर्य उदाऊ अब’ लाई २०४५ साल वैशाखमा ‘समीक्षा’ पत्रिकामा छापिदिएर आफूलाई प्रेरणा दिएको स्मरण गर्नुभयो । उहाँले भन्नुभयो, 'दीक्षितको निधन ठूलो बौद्धिक क्षति हो ।'

एकेडेमीमा शव राखिएन

दीक्षितलाई श्रद्धाञ्जलीका लागि उहाँको शव कमलादीस्थित प्रज्ञा प्रतिष्ठानमा राख्ने तयारी भए पनि निवास कालिकास्थानमै श्रद्धाञ्जलीका लागि दिइयो । उहाँको परिवारका केही सदस्य र शुभेच्छुकले प्रतिष्ठानको परिसरमा शव राख्न पहल गरेका थिए तर दीक्षितले जीवित छँदा आफ्नो शव त्यहाँ नराख्नू भन्नुभएकाले कमलादीमा नराखिएको हो ।

प्रतिष्ठानले केही वर्षअघि कुनै पनि दिवङ्गत स्रष्टाको शव आफ्नो परिसरमा नराख्ने निर्णय गरेको थियो । प्रतिष्ठानका सदस्य सचिव प्राध्यापक जगतप्रसाद उपाध्यायले दीक्षित प्रतिष्ठानकै पूर्व उपकुलपति भएको र प्रधानमन्त्री ओलीबाटै शव त्यस परिसरमा राख्न निर्देशन दिए पनि परिवारको चाहनाबमोजिम नराखिएको जानकारी दिनुभयो ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्