अंगीकृत नागरिकताकाे विषयमा सरकार गम्भीर छ, दाेहाेराे नागरिकता नहाेस् भन्नेमा पनि सचेत छ : गृहमन्त्री थापा

भदौ २७, २०७६ शुक्रबार १४:१७:५० | उज्यालो सहकर्मी

काठमाण्डौ – गृहमन्त्री रामबहादुर थापाले राष्ट्रियताको सुरक्षा र विकाससँग सम्बन्धित क्षेत्रमा असर पर्ने भएकाले अंगीकृत नागरिकताको विषयलाई सरकारले गम्भीर रुपमा लिएको बताउनुभएको छ ।

प्रतिनिधिसभा अन्तर्गत राज्य व्यवस्था तथा सुशासन समितिको शुक्रबार बसेको बैठकमा नागरिकता विधेयकमा गरिएको संशोधन सम्बन्धमा सरकारको धारणा राख्दै उहाँले यो विषयमा सरकार गम्भीर भएको बताउनु भयो ।

उहाँले सीमा सुरक्षा, राष्ट्रियता तथा सरकारले आफ्ना नागरिकलाई प्रदान गर्ने विभिन्न सुविधा र विकासका कार्यक्रमलाई असर नपर्ने गरी अंगीकृत नागरिकता प्रदान गर्ने विषयलाई आवश्यक संशोधन गरिएको स्पष्ट पार्नुभयो । सरकार दोहोरो नागरिकता नहोस् भन्नेमा पनि सचेत भएको उहाँले जानकारी दिनुभयो ।

गृहमन्त्री थापाले नेपाल–भारतबीचको विशेष सम्बन्ध र नागरिकतासम्बन्धी छिमेकी देशको व्यवस्थालाई समेत मध्यनजर गरी नेपाली पुरुषसँग विवाह गर्ने महिलालाई नेपाली अंगीकृत नागरिकता प्राप्त गर्ने समय ७ वर्ष तोकिएको स्पष्ट पार्नुभयो ।

सरकारले नेपाली पुरुषसँग विवाह गर्ने विदेशी महिला र नेपाली महिलासँग विवाह गर्ने विदेशी पुरुषका लागि अंगीकृत नागरिकता पाउनका लागि निर्धारण गरेको समय चित्त नबुझे जनप्रतिनिधिले आवश्यक संशोधन गर्न सक्ने गृहमन्त्री थापाको भनाइ थियो ।

नागरिकतासम्बन्धी विधेयक समितिमा झण्डै ६ महिनादेखि छलफलकै क्रममा रहेको छ । शुक्रबारको बैठकमा पनि मन्त्रालयले गरेको विधेयकमाथिको संशोधनबारे थप अध्ययन गर्नुपर्ने आवाज उठेपछि समिति विधेयक सम्बन्धमा निर्णयमा पुग्न सकेन ।

विधेयकमा नेपाली अंगीकृत नागरिकता पाउनका लागि नेपाली पुरुषसँग विवाह गर्ने विदेशी महिलालाई ७ वर्ष र नेपाली महिलासँग विवाह गर्ने विदेशी पुरुषलाई १५ वर्षको समय राखिएको छ ।

अन्तिम अपडेट: माघ ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्