‘सरकारले लिम्पियाधुरादेखि कालापानी र लिपुलेक क्षेत्रमा तत्काल सुरक्षा चाैकी स्थापना गर्नुपर्छ’

मंसिर ६, २०७६ शुक्रबार २०:५९:१० | उज्यालो सहकर्मी

काठमाण्डौ – नागरिक समाजका अगुवाहरुले लिम्पियाधुरादेखि कालापानी र लिपुलेक क्षेत्रमा तत्काल सुरक्षा चौकी स्थापना गर्न सरकारसँग माग गरेका छन् । उनीहरुले राज्यको तत्काल उपस्थिति प्रस्ट देखिनेगरी सरकारलाई सुरक्षा चौकी स्थापनाका लागि तत्काल कदम चाल्न आग्रह गरेका हुन् ।

रिपोर्टर्स क्लब नेपालमा शुक्रबार पत्रकार सम्मेलन गर्दै नागरिक समाजका २६ जना अगुवाहरुले सीमा रक्षार्थ सजग र सचेत रहन भन्दै १० बुँदे सार्वजनिक आह्वानसमेत गरेका छन् । ‘लिम्पियाधुरादेखि कालापानी र लिपुलेक क्षेत्रमा राज्यको उपस्थिति प्रस्ट देखिनेगरी नेपालको तर्फबाट सुरक्षा चौकीहरु तत्काल स्थापना गरियोस्’, आह्वानमा भनिएको छ ।

भारतले जारी गरेको नयाँ राजनीतिक नक्सापछि उत्पन्न भएको विवाद समाधान नभएसम्म आम नागरिकलाई एकताबद्ध भइ समस्या समाधान गर्न सरकारलाई निरन्तर दबाब दिइरहन समेत विज्ञप्तिमा भनिएको छ ।

कार्यक्रममा वरिष्ठ पत्रकार भैरव रिसालले कालापानी नेपालको भूभाग रहेको सबै ऐतिहासिक प्रमाण सुरक्षित रहेको बताउनुभयो । उहाँले २०१८ सालमा आफै त्यस क्षेत्रमा पुगेर जनगणना गरेको खुलाउनुभयो । लिम्पियाधुरादेखि कालापानी र लिपुलेकसम्मको क्षेत्रबाट भारतीय सेना फिर्ता गराउन तत्काल कुटनीतिक पहल गर्न सरकारलाई आग्रह गर्नुभयो ।

पूर्व सचिव डा. द्वारिकानाथ ढुंगेलले जलाधार, नक्सा र ऐतिहासिक तथ्य र प्रमाणका आधारमा लिम्पियाधुरा नै काली नदीको मुहान रहेको र नेपालको पश्चिमी सीमा लिम्पियाधुरासम्म रहेको बताउनुभयो । नेपाल सरकारले त्यो क्षेत्रसम्मको आधिकारिक नक्सा सार्वजनिक गरी भारतलाई जवाफ दिनुपर्ने उहाँको धारणा थियो ।

त्यस्तै भूगोलविद् प्रा‍. डा. नरेन्द्रराज खनालले विक्रम संवत १८५६ भन्दा अगाडिका सबै नक्साहरुमा लिम्पियाधुराबाट आउने नदीलाई नै महाकाली नदी देखाइएकाले त्यही नक्साका आधारमा सरकारले भारतसँग सप्रमाण वार्ता अगाडि बढाउनुपर्ने बताउनुभयो ।

राजनीतिक विश्लेषक श्याम श्रेष्ठले पनि अलमोडा गजेटमा ब्रिटिशहरुले नेपालको सिमाना लिम्पियाधुरासम्म रहेको स्वीकारेकाले त्यसलाई आधार मानेर तत्काल भारत सरकारसँग वार्ता अगाडि बढाउन आग्रह गर्नुभयो ।

जलाधार विज्ञ जगत भुषालले नदीको तीन वटा मूल सिद्धान्तका आधारमा सबैभन्दा लामो, धेरै शाखा मिसिएको र जलाधार धेरै भएको नदी नै सीमा नदी उल्लेख गरिएकाले लिम्पियाधुराबाट आउने नदी नै काली नदीको मुहान भएकोले सीमाको व्याख्याअनुसार त्यो क्षेत्र नेपालको भूभागमा पर्ने बताउनुभयो ।

यसैगरी नागरिक समाजका तर्फबाट सीमा बचाऊ अभियान, नक्सा समितिले एक हप्ताभित्र लिम्पियाधुरालाई पश्चिमी नेपालको सीमा मानेर नक्सा तयार पारी विश्वव्यापी रुपमा नक्सा सार्वजनिक गर्ने जानकारी दिएको छ ।

अन्तिम अपडेट: माघ २, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्