दाङकाे टिमुर पकेट क्षेत्रमा ‘टिमुर वर्ष’ कार्यक्रम सुरु : एक लाख बिरुवा उत्पादन हुँदै

मंसिर २४, २०७६ मंगलबार १७:३३:२८ | हेमराज शर्मा

दाङ - दाङको उत्तरतर्फका छरिएर रहेका बस्तीमा टिमुर र सुगन्धकोकिला मालागेडीकाे बिरुवा उत्पादन गर्ने कार्यक्रम सुरु गरिएको छ ।

रोजगारीका लागि बाहिरिनेको संख्या बढेर गाउँ नै खाली हुन थालेपछि स्थानीयलाई स्वरोजगार बनाएर आर्थिक वृद्धि गर्ने उद्देश्यले टिमुर र सुगन्धकोकिला मालागेडी रोप्ने कार्यक्रमका लागि बिरुवा उत्पादन गर्न लागिएकाे हाे।

डिभिजन वन कार्यालयले चालु आर्थिक वर्षलाई ‘टिमुर वर्ष’ का रुपमा अगाडि बढाएकाे र यस कार्यक्रम अन्र्तगत दाङ उपत्यकाको उत्तरी भेगमा रहेका पातलो ग्रामीण बस्तीमा एक लाख टिमुरका बिरुवा उत्पादन सुरु गरिएको छ ।

मसला बनाउन उपयोगी मानिने टिमुर बहुवर्षे जडिबुटी भएको र यसको बजार मूल्य पनि महंगो भएका कारण स्थानीयलाई स्वरोजगार बनाउन टिमुर रोप्ने कार्यक्रमलाई अभियानकै रुपमा अघि बढाइएको डिभिजन वन कार्यालय दाङका प्रमुख दिपक ज्ञवालीले जानकारी दिनुभयो ।

टिमुर रोप्ने कार्यक्रमका लागि डिभिजन वन कार्यालय दाङको डिभिजन वन नर्सरी अम्बापुरमा ५० हजार, तुल्सीपुरको नर्सरीमा २५ हजार र नारायणपुरको वन नर्सरीमा २५ हजार टिमुरमा बिरुवा उत्पादन सुरु गरिएको छ । तीन वटै नर्सरीमा २० हजार मालागेडीको बिरुवा उत्पादन समेत सुरु गरिएको छ ।

‘दुवै बहुवर्षे, बहुउपयोगी जडिबुटी हुन्’, डिभिजन वन कार्यालयका प्रमुख ज्ञवालीले भन्नुभयो, ‘हामीले केही वर्षमै दाङको उत्तरी भेगमा ५ लाख टिमुरका बिरुवा लगाउने गरी योजना बनाएका छौँ ।’

विस्तृत अध्ययनपछि टिमुर रोप्ने कार्यक्रम ल्याइएको डिभिजन वन कार्यालयले जनाएको छ । बिरुवा उत्पादनपछि पहिलो प्राथमिकता किसानलाई र किसानलाई पुगेपछि सामुदायिक वन र राष्ट्रिय वनको खाली जग्गामा समेत टिमुर लगाउने कार्यक्रम रहेको कार्यालय प्रमुख ज्ञवालीले बताउनुभयो ।

उहाँका अनुसार टिमुरका बिरुवा उत्पादन, ढुवानी र रोपनसम्म प्रति बिरुवा १८ रुपैयाँ छुट्टाइएको छ । किसानले ठूलो मात्रामा उत्पादन गर्ने टिमुर र मालागेडीको बजार खोज्ने, उचित मूल्य कायम गर्ने र सहज तरिकाले

निकासीका लागि समेत डिभिजन वन कार्यालयले सहजीकरण गर्ने गरी योजना बनाइएको कार्यालयले जनाएको छ ।

दाङको उत्तरी भेगमा पर्ने बंगलाचुली गाउँपालिका, घोराही र तुल्सीपुर उपमहानगरपालिकाका उत्तरी गाउँमा अहिले पनि किसानले आफ्नो र वनमा प्राकृतिक रुपमै टिमुर उत्पादन गर्दै आइरहेका छन् । माथिल्लो क्षेत्रलाई टिमुरको पकेट क्षेत्र बनाएर दीर्घकालीन स्वरोजगारी सिर्जनाका लागि काम थालिएको डिभिजन वन कार्यालयको भनाइ छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्