फोनको खर्च कटाएँ, दक्षिणाको पैसा बचाएँ (भिडियो)

साउन ६, २०७५ आइतबार १७:३७:४१ | मेरो कथा मेरो भोगाई

सुमित्राकुमारी लोप्चन/लालबन्दी, सर्लाही ।

मेरो श्रीमान माल्दिभ्समा हुनुहुन्छ । उहाँलाई बिदाई गर्दा मैले घर व्यवहार म मिलाउँछु चिन्ता नगर्नुस् भनेको थिएँ । सम्बन्ध भनेको विश्वास त हो नि । उहाँलाई मैले घर सम्हाल्छु भनेर विश्वास दिलाएर पठाएपछि त मैले आफ्नो जिम्मेवारी पूरा गर्नै पर्‍यो ।

घर व्यवहार राम्रोसँग चलाउने तरिका नजान्दासम्म सजिलो चाहिँ नहुँदो रहेछ । श्रीमानले विदेशमा कमाएको त जोगाउनुपर्छ भन्ने थाहा भए पनि जोगाउने तरिका नजान्दा भने जस्तो भएको थिएन ।

चार महिनाअघि गाउँमा विदेशमा हुनेका परिवारलाई वित्तीय साक्षरताका कक्षा सञ्चालन भयो । कक्षामा आम्दानी र खर्चको व्यवस्थापनका साथै बिभिन्न व्यवहारिक ज्ञान सिकाइन्छ भन्ने कुरा सुनें ।

त्यसपछि म पनि यो कक्षामा बसें । यो कक्षामा बसेपछि मैले आम्दानी के हो र खर्च के हो भन्ने कुरा राम्रोसित बुझें । आम्दानी र खर्चलाई व्यवस्थापन गरेर कसरी बचत गर्ने भन्ने कुरा पनि सिकें ।

मसँग आम्दानीको स्रोत त केही थिएन । त्यसपछि मैले आम्दानीको बाटो खोजें । माइतीमा आमा बुवाले टिका लगाएर दक्षिणा दिएको पैसा पनि जोगाउन थालें । श्रीमानले खर्च गर भनेर पठाएको पैसा पनि धेरथोर बचाउन थालें ।

त्यसरी बचाएको पैसाले एउटा बाख्रा किनेको छु । अब विस्तारै बाख्रा थप्दै जाने सोचाई छ । खेतबारीमा तरकारी खेती पनि बढाउन थालेका छौं । परिवारका सबै सदस्य मिलेर तरकारी खेती गर्छौं । सिजनको बेला त राम्रै आम्दानी पनि हुन्छ ।

तरकारी खेतीले घरखर्च पुर्‍याउन पाए विदेशमा कमाएको बच्थ्यो भन्ने लाग्छ । वित्तीय साक्षरताको कक्षामा बसेपछि त मैले श्रीमानसँग फोनमा बोल्दा हुने खर्च पनि घटाएको छु ।

पहिले महिनाको ७ सय खर्च गरेको रहेछु । अहिले यसलाई घटाएर तीनसयमा झारेको छु । यसको मतलब नबोल्ने भन्ने होइन, तर कसरी व्यवस्थापन गर्ने भन्ने कुरा जान्दा सजिलो हुँदो रहेछ ।

कक्षामा बसेपछि त मलाई खर्च घटाएर बचत चाहिँ कसरी गर्ने भन्ने कुरा मात्र लाग्छ । अनावश्यक खर्च गर्ने बानी छाडेर राम्रो ठाउँमा बचत गर्न सिकेको छु । बालबच्चा ठूला हुँदैछन् ।

उनीहरुलाई पनि पढाउन, बढाउन पर्‍यो । घर बनाउनु पर्‍यो । हामीले खर्च गर्दा भविष्यलाई सोचेर गर्नुपर्ने रहेछ । कक्षामा बसेर यस्ता कुरा सिकेपछि मैले आफूलाई सुधारेको छु ।

अन्तिम अपडेट: पुस ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्