ट्राफिक नियम उल्लङ्घन गर्ने चालकलाई डेढ घण्टाको सचेतनामूलक कक्षा

माघ २०, २०७६ सोमबार ७:३४:१४ | उषा तामाङ

दोलखा - गाडी दुर्घटना बढ्दै गएपछि जिल्ला ट्राफिक प्रहरी कार्यालय दोलखाले सचेतनामूलक कक्षा दिन सुरु गरेको छ । दोलखामा चालु आर्थिक वर्षको ६ महिनाको अवधिमै गाडी दुर्घटनाबाट १० जनाको ज्यान गएपछि ट्राफिक प्रहरी कार्यालयले गएको माघ २ गतेदेखि सचेतनामूलक कक्षा सञ्चालन सुरु गरेको हो ।

जिल्लाको विभिन्न ठाउँमा गरिएको ट्राफिक जाँचका क्रममा प्रत्यक्ष ट्राफिक नियम उल्लङ्घन गर्नेको संख्या धेरै पाइएपछि कक्षा सञ्चालन गर्न सुरु गरिएको हो ।

तीन पटक सञ्चालन गरिएको सचेतना कक्षामा अहिलेसम्म ७२ जना चालक सहभागी भइसकेका जिल्ला ट्राफिक प्रहरी कार्यालय दोलखाका इन्चार्ज प्रहरी नायव निरीक्षक गोकर्ण नेपालले जानकारी दिनुभयो ।

प्रत्यक बिहिबार डेढ घण्टाको कक्षा अनिवार्य लिएपछि मात्रै सवारी चालकको आवश्यक कागजात फिर्ता गरिदै आएको छ । सचेतनामूलक कक्षामा पहिलो पटक माघ २ गते बिहीबार ३५ जना, ९ गते २५ जना र १६ गते १२ जना सवारी चालक सहभागी भएका छन् ।

ट्राफिक नियम उल्लङ्घन गरी सचेतनामूलक कक्षामा सहभागी हुने चालकमध्ये सबैभन्दा बढी बोलेरो चालक रहेको जिल्ला ट्राफिक प्रहरी कार्यालय दोलखाका ट्राफिक प्रहरी हवल्दार जगदीश कार्कीले जानकारी दिनुभयो ।

सचेतनामूलक कक्षामा कानुनी कारबाही, सम्भावित दुर्घटनाका श्रव्य दृश्य सामग्री, लाईसेन्स नभएकालाई प्राप्त गर्ने तरिका, जाँडरक्सी पिएर गाडी चलाउँदा हुनसक्ने दुर्घटना लगायतका विषयमा जानकारी गराइएकाे छ ।

यसअघि नियम उल्लङ्घन गर्ने सवारी चालकलाई जरिवाना तिराई छाड्ने गरिए पनि अब भने सचेतनामूलक कक्षा अनिवार्य लिनुपर्ने व्यवस्था गरिएको हो।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उषा तामाङ

उज्यालोका दोलखा सहकर्मी उषा तामाङ कालीञ्चोक एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्