ललितपुरमा धमाधम अपाङ्गमैत्री फुटपाथ बन्दै

फागुन १८, २०७६ आइतबार १८:२९:५३ | मल्लिका थापा

ललितपुर – ललितपुर महानगरपालिकाभित्रका सडकमा अपाङ्गमैत्री फुटपाथ बन्न थालेका छन् । महानगरपालिकाले शारीरिक रूपमा अशक्त भएकाहरूका लागि 'ह्वीलचेयर' मैत्री फुटपाथ निर्माण गर्न थालेको हो ।

महानगरले पुल्चाेकको महानगरपालिकाको कार्यालय आसपासमा रहेको पुरानो फुटपाथ भत्काएर नयाँ फुटपाथ निर्माण गर्न थालेको महानगरपालिकाका प्रशासन महाशाखा प्रमुख रुद्र गौतमले जानकारी दिनुभएको छ ।

उहाँले महानगरपालिकाको क्षेत्राधिकार पर्ने आठ मिटरसम्मको सडकमा सकेसम्म सबै ठाउँमा अपाङ्गमैत्री सडक निर्माण गर्ने महानगरको योजना रहेको बताउनुभयो ।

चार लेनको सडकमा कम्तीमा १२ फिटको फुटपाथ हुनुपर्ने सडक मापदण्ड छ, बीचमा आँखा नदेख्ने व्यक्तिले लठ्ठीको टेकेर हिँड्न मिल्ने ट्र्याक हुनुपर्ने सडकको मापदण्ड हो ।

तर काठमाण्डौ उपत्यकाको धेरै मुख्य सडकको फुटपाथ मुश्किलले तीन फिट र कतिपय ठाउँमा त्योभन्दा पनि साँघुरो छ, त्यसैले फुटपाथमा सहजै हिँड्न सक्ने अवस्था छैन । फुटपाथमा रुखसँगै पसल पनि हुने गरेकाले पैदलयात्रुलाई हिँड्न समस्या हुने गरेको छ ।

यसै सन्दर्भलाई ध्यानमा राखेर मेयर चिरिबाबु महर्जनले महानगर अपाङ्गता भएकाहरूप्रति सकारात्मक भएको बताउनुभएको छ । उहाँले महानगरभित्र निर्माण भएका सार्वजनिक शौचालय अपाङ्गमैत्री भएको र निर्माणको क्रममा रहेका अरु शौचालयहरूलाई समेत अपाङ्गमैत्री बनाइने महानगरको योजना रहेको बताउनुभयो ।

अपाङ्गता भएकाको संवेदनशीलतालाई बुझेर काम गरेको भन्दै महानगरपालिकामा लिफ्ट पनि प्रयोगमा ल्याइएको उहाँँले बताउनुभयो । यस्तै छिट्टै अपाङ्गमैत्री विद्युतीय बस सञ्चालन गर्ने तयारी पनि महानगरले गरिरहेको छ ।

‘साधारण र अपाङ्गमैत्री फुटपाथ निर्माण गर्न यस वर्ष ५० लाख रुपैयाँ छुट्याएका छौँ', महानगरका प्रवक्ता राजु महर्जनले भन्नुभयो ।

यसैगरी सडक वरिपरी बत्ती राख्न नेपाल विद्युत् प्राधिकरणसँग स्मार्ट बत्तीका लागि सम्झौता भइसकेकाले सडक तथा फुटपाथमा अबको केही महिनामै बत्ती जडान हुने महर्जनले जानकारी दिनुभयो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मल्लिका थापा

थापा उज्यालाेमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्