कोरोनाबाट सावधानी अपनाउँदा अरु रोगको जोखिम कम

असार २२, २०७७ सोमबार १७:४:२९ | जानुका दुवाडी

काठमाण्डाै – अघिल्ला वर्षहरुमा यतिबेला गर्मी बढेसँगै अस्पतालमा बिरामीको घुइँचो हुन्थ्यो । धेरैलाई डेङ्गी, भाइरल ज्वरो, रुघाखोकी, टाइफाइड, दम, जन्डिस, झाडापखालालगायतका रोगले सताउँथ्यो । तर यो वर्ष गर्मी लागिसक्दा समेत अस्पतालमा बिरामीको चाप छैन । कोरोनाको उपचार हुनेबाहेक अरु अस्पताल सुनसान जस्तै छन् ।

यो वर्ष कोरोनाबाहेक अरु बिरामीको सङ्ख्यामा कमी आएको डाक्टरले बताएका छन् । असारको अन्तिम हप्ता हुनै लाग्दा पनि अस्पतालहरुमा अघिल्ला वर्षहरुमा जस्तो बिरामी नदेखिएको इपिडिमियोलोजी तथा रोग नियन्त्रण महाशाखाका निर्देशक डाक्टर वासुदेव पाण्डेले बताउनुभयो ।

गएको वर्ष डेङ्गीका कारण १६ हजारभन्दा धेरै बिरामी भएका थिए, पाँच जनाको ज्यान गएको थियो । तर यो वर्ष भने अहिलेसम्म एक सय ३५ जनामा मात्र डेङ्गी देखिएको डा. पाण्डेले बताउनुभयो । गएको वर्ष धरानबाट सुरु भएको डेङ्गीको सङ्क्रमण अरु विभिन्न जिल्लामा फैलिएको थियो । त्यस्तै झाडापखाला, स्क्रब टाइफसलगायतका बिरामी पनि देखिन थालिसकेका थिए ।

गएका वर्षको तुलनामा यो वर्ष डेङ्गी, झाडापखाला, निमोनिया, रुघाखोकी, मलेरिया, स्क्रब टाइफसलगायतका बिरामीको सङ्ख्यामा ५० प्रतिशतले कमी भएको डाक्टर पाण्डेले बताउनुभयो ।

अस्पतालमा बिरामी नजानुको एउटा कारण कोरोनाको डरले गर्दा पनि हुन सक्छ । ‘तर कोरोनाको डरले अस्पताल नगएको भए पनि गाउँठाउँमा कतै बिरामी भएका खबर थाहा हुनुपर्थ्याे, अहिलेसम्म हामीलाई त्यस्तो जानकारी आएको छैन’, डा. पाण्डेले भन्नुभयो, ‘कोरोनाको डरको कारण मात्र नभइ रोग नै कम लागेर हो भन्न सकिन्छ ।’

हरेक रोग सरसफाइ र खानपानसँग जोडिएर आउने भएकाले पछिल्लो समय मानिसले सरसफाइ र खानपानमा ध्यान दिएकाले पनि यस्ता रोगको जोखिम कम भएको उहाँ बताउनुहुन्छ ।

व्यक्तिगत दुरी कायम गर्ने, खानपानमा ध्यान दिने, माक्सको प्रयोग गर्ने, पटक–पटक हात धुने, अनावश्यक रुपमा मुख तथा नाकमा हात नलैजाने, भिडभाडमा नजाने, खानेकुराहरु राम्रोसँग पकाएर खाने गरेका कारण पनि यस वर्ष कोरोनाबाहेकका अरु रोगको सङ्क्रमण धेरै नदेखिएको उहाँले बताउनुभयो ।

तर गर्मी र वर्षाको सिजन बाँकी भएकाले सावधानी अपनाउन उहाँको सल्लाह छ । ‘यस वर्ष कोरोनाबाहेक अरु रोगको जोखिम धेरै छैन भनेर ढुक्क भएर बस्न चाहिँ हुँदैन’, उहाँले भन्नुभयो, ‘सम्भावित सङ्क्रमणबाट जोगिन सावधानी अपनाउनुपर्छ ।’

व्यक्तिगत सरसफाइ र खानपानमा ध्यान नदिँदा तथा लामखुट्टेलगायतका जीवाणुको टोकाइबाट बच्न नसकिएमा अझै पनि रोगको जोखिम हुन सक्ने भएकाले सावधानी अपनाउन उहाँको आग्रह छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जानुका दुवाडी

जानुका दुवाडी उज्यालाेमा कार्यरत हुनुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्