दोलखामा रेबिज लागेको कुकुरले टोकेपछि १६ दिनमा तीन जनाको ज्यान गयो

भदौ १०, २०७७ बुधबार १४:४५:२ | उषा तामाङ

दोलखा – दोलखामा रेबिज रोग लागेको कुकुरले टोकेपछि १६ दिनको अवधिमा एक बालकसहित तीन जनाको ज्यान गएको छ । गएको असार २६ गते मेलुङ गाउँपालिका वडा नम्बर ५ र ६ का १० जनालाई एउटै कुकुरले टोकेको थियो ।

त्यही कुकुरको टोकाइका कारण मेलुङ गाउँपालिका ६ को तिनपिप्ले गैरीगाउँका ३० वर्षीय युवकको ज्यान गएको छ । असार २६ गते कुकुरले टोकेपछि ललितपुरको पाटन अस्पताल भर्ना हुनुभएका ती पुरुषको उपचारको क्रममा बुधबार बिहान साढे ३ बजे ज्यान गएको हो । उहाँको रेबिज रोगकै कारण ज्यान गएको पुष्टि भएको छ । उहाँलाई भदौ ६ गते शनिबार उपचारको लागि पाटन अस्पताल लगिएको थियो ।

त्यसैगरी असार २६ गते नै त्यही कुकुरले मेलुङ गाउँपालिका ५ का सुँगुरेका १५ वर्षीय किशोेरलाई घरमै बसिरहेको अवस्थामा टोकेको थियो । कुकुरले टोकेपछि कुनै खोप नलगाएका उनलाई भदौ १ गते उपचारको लागि काठमाण्डौ लगिएको थियो । भदौ २ गते उपचारका क्रममा अस्पतालमै ज्यान गएको मेलुङ गाउँपालिकाको स्वास्थ्य शाखाले जनाएको छ ।

यस्तै वैत्येश्वर गाउँपालिका ६ का सात वर्षीय बालकको साउन २७ गते नै ज्यान गएको हो । मृतक बालकले दुई पटकसम्म रेबिज रोगविरुद्धको खोप लगाएका थिए । उपचारको लागि काठमाण्डौ लैजाँदै गर्दा उनको बाटोमै ज्यान गएको थियो ।

असार २६ गते गाउँपालिकाको वडा नम्बर ५ र ६ को विभिन्न स्थानमा पुगेको कुकुरले ६ पुरुष र चार महिलालाई टोकेको थियो । त्यो कुकुरलाई त्यही दिन स्थानीयवासीले मारेका कारण उपचारमा थप समस्या भएको मेलुङ गाउँपालिकाका स्वास्थ्य शाखा संयोजक हरेराम चापागाईँले जानकारी दिनुभयो । त्यही कुकुरले टोकेका चार जना महिला र तीन जना पुरुषमा अहिलेसम्म कुनै लक्षण नदेखिएको चापागाईँको भनाइ छ ।

कुकुरले टोकेपछि ज्यान गुमाएकामध्ये केहीले गाउँपालिकाको वडा नम्बर ६ मेलुङ बजारमा सञ्चालित एक निजी मेडिकलमा खोप लगाएको बताइएको छ । खोप लगाएर पनि ज्यान गएको भन्दै स्थानीयवासी बुधबार केही बेर आक्रोशित बनेको वडा नम्बर ६ का अध्यक्ष कुसुम लामाले जानकारी दिनुभयो ।

यसैबीच रेबिज लागेको कुकुरको टोकाइबाट १६ दिनको अवधिमा तीन जनाको ज्यान गएपछि यस सम्बन्धमा थप निर्णय गर्न बुधबार मेलुङ गाउँपालिकाको बैठक बस्दैछ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उषा तामाङ

उज्यालोका दोलखा सहकर्मी उषा तामाङ कालीञ्चोक एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्