ओखलढुङ्गा : अस्पताल बनाउन स्थानीयले दिए जग्गा

मंसिर ५, २०७७ शुक्रबार १९:३३:३४ | शिव ढुंगाना

ओखलढुङ्गा – मोलुङ गाउँपालिकाले निर्माण गर्न लागेको १५ शय्याको अस्पतालका लागि स्थानीयले जग्गा दिएका छन् । मोलुङ गाउँपालिका २ को रामपुर बजारमा अस्पताल बनाउन एक करोड ५० लाख मूल्य बराबरको नौ रोपनी जग्गा चार परिवारले निःशुल्क उपलब्ध गराएका हुन् ।

जग्गा प्राप्त भएपछि अस्पताल निर्माणको प्रक्रिया सुरु गर्न सहज भएको गाउँपालिकाका सूचना अधिकारी गोपाल नेपालले जानकारी दिनुभयो । अहिले रामपुरमा स्वास्थ्य चौकी मात्रै रहेको छ ।

रामपुर बजार सघन सहरी क्षेत्रका रुपमा विकास हुँदै गइरहेकाले जनसङ्ख्याको चाप पनि बढेको छ । गाउँपालिकाका सबै वडालाई पायक पर्ने गरी रामपुरमा अस्पताल निर्माणको प्रक्रिया अघि बढ्नु सुखद भएको स्थानीय युवा प्रकाश दाहालले बताउनुभयो । उहाँका अनुसार समाजसेवी राइटरबाजे भनेर चिनिएका गंगाप्रसाद दाहालको स्मृतिमा छोरा तथा नातिले जग्गा उपलब्ध गराएका हुन् ।

गाउँपालिकालाई रमा दाहाल, चतुर्भुज दाहाल, उत्तमकुमार दाहाल र सन्तोष दाहालले मिलेर उपलब्ध गराएको नौ रोपनी जग्गा रजिस्ट्रेशन पास गर्ने प्रक्रियामा रहेको छ । गाउँपालिका अध्यक्ष मणिराज राईले अस्पतालका लागि दिन लागेको जग्गा अनुगमन गरेर पास गर्ने प्रक्रिया अघि बढाउन सहजीकरण गर्नुभएको थियो ।

उपयुक्त जग्गाको खोजीमा रहेको गाउँपालिकालाई जग्गादाताहरूले निःशुल्क दिएर स्वास्थ्य क्षेत्रको विकासमा योगदान गरेको गाउँपालिकाका अध्यक्ष मणिराज राईले बताउनुभयो । अब चाँडै सङ्घीय सरकारले दिएको अनुदानबाट अस्पताल निर्माणको प्रक्रिया सुरु हुने पनि उहाँले जानकारी दिनुभयो ।

गाउँपालिका केन्द्र प्राप्चा तोकिएपछि असन्तुष्ट रामपुरवासी अस्पताल बन्ने भएपछि भने उत्साहित बनेका छन् । सङ्घीय आयोगले केन्द्र प्राप्चा तोकेपछि गाउँपालिका केन्द्र रामपुरमै राख्न उनीहरुले आन्दोलन गर्दै आएका थिए ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शिव ढुंगाना

शिव ढुंगाना ओखलढुंगाका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्