‘ओलीले बैठकमा भाग लिन्नँ भन्न पाउनु हुन्न, बैठकमा भाग नलिनेलाई नेतृत्व मान्न सकिँदैन’

दुई अध्यक्षबीच विवाद चर्किँदै गएका बेला दाहाल–नेपाल समूहका विद्यार्थी भेला

मंसिर १९, २०७७ शुक्रबार १७:४२:५० | उज्यालो सहकर्मी

काठमाण्डाै – सत्तारुढ नेपाल कम्युनिस्ट पार्टी (नेकपा) नेकपाकी स्थायी कमिटी सदस्य अष्टलक्ष्मी शाक्यले शनिबार सचिवालय बैठक बस्नैपर्ने बताउनुभएकाे छ । थापाथलीकाे इञ्जिनियरिङ क्याम्पसमा नेकपाका कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल पक्षका विद्यार्थीहरूकाे भेलालाई सम्बाेधन गर्दै उहाँले यस्ताे बताउनुभएकाे हाे ।

नेकपामा दुई अध्यक्षबीच विवाद चर्किँदै गएका बेला दाहाल–नेपाल समूहका विद्याथीहरू भेला भएका हुन् । विद्यार्थीहरूको भेलालाई नेकपाका स्थायी कमिटी सदस्य र केन्द्रीय नेताहरूले सम्बोधन गरेका छन् ।

प्रधानमन्त्रीसमेत रहनुभएका अध्यक्ष केपी शर्मा ओलीले बैठकमा भाग लिन्नँ भन्न नपाउने उहाँले बताउनुभयो । बैठकमा भाग लिएर निकास दिनुपर्ने शाक्यले बताउनुभयो । उहाँले भन्नुभयो, ‘भोलिको सचिवालयको बैठक हुनै पर्छ । अस्ति अध्यक्ष केपी शर्मा ओलीले सचिवालयको बैठकमा म आउँदिन, म बस्दिनँ, म छलफलमा भाग लिन्नँ भनेर भन्नुभयो । प्रचण्डको प्रतिवेदन पनि म मान्दिनँ भन्नुभयो । यो भन्न उहाँले पाउनु हुन्न । त्यसैले निकास बैठकबाटै हुनुपर्छ ।’

दुई वटा प्रतिवेदन आउँदैमा पार्टी विग्रहमा गइ नसक्ने पनि नेत्री शाक्यले बताउनुभयो । शनिबारकाे सचिवालयमा बसेर संयमताका साथ बहस गर्न नेताहरूलाई आग्रह गरिएको पनि शाक्यले बताउनुभयो । उहाँले भन्नुभयो, ‘दुई वटा प्रतिवेदन आयो भन्दैमा पार्टी विग्रहमा जान्छ भन्ने मलाई पटक्कै लाग्दैन । त्यसैले पहिलो कुरा भोलि सचिवालयको बैठकमा बस्ने र उहाँले दुई वटै प्रतिवेदन अगाडि राखेर अत्यन्तै संयमतताका साथ, नैतिकताका साथ लागेका कुराहरू खुलस्त ढङ्गले एकअर्कामा आलोचना नै गरेर प्रस्तुत भएर छलफल गर्ने हो भने एक/दुई दिन जान्छ होला । त्यसपछि एउटा निष्कर्ष आउँछ । अब कसरी एक ढिक्का बनाएर पार्टीलाई लैजाने भन्ने कुरामा निष्कर्षमा पुग्नै पर्छ । त्योभन्दा अरू विकल्प खोज्नुभयो भने नोक्सान हुन्छ ।’

अध्यक्ष प्रचण्डले प्रस्तुत गरेको दस्तावेज मान्दिनँ भन्नुभएको हो भने अर्का अध्यक्ष ओलीले प्रतिउत्तर किन दिनुभयो ? भन्दै शाक्यले प्रश्न गर्नुभयो । लिखित प्रतिउत्तर दिने तर छलफलमा बस्दिनँ भन्न नमिल्ने शाक्यले बताउनुभयो । ‘दस्तावेज मान्दिनँ भनेर भनेको हो भने उहाँले प्रतिउत्तर किन दिनुपर्‍याे । प्रचण्डले पेस गरिसकेपछि जे–जे त्यहाँभित्र छ, त्यसको प्रतिउत्तर उहाँले दिइ सक्नुभयो । लिखित प्रतिउत्तर दिने अनि छलफलमा भाग नलिने भनेर भाग्न मिल्छ ? बैठक छोडेर जान मिल्छ ? उहाँले समस्याको समाधान कसरी दिन खोजिराख्नु भएको छ, कहाँ गएर खोजिराख्नु भएको छ र बाहिरबाट समस्याको समाधान हुँदैन ।’

अध्यक्ष ओलीले नै पहल गरेर एकता भएको पार्टी भित्र देखिएका समस्याको समाधान गर्दै सबैलाई एक बनाएर लैजाने दायित्व पनि उहाँकै भएको बताउनुभयो । बैठकबाट भाग्ने विषय लोकतान्त्रिक चरित्र नभएको पनि शाक्यले बताउनुभयो ।

भेलालाई सम्बोधन गर्न पुग्नुभएकी अर्का स्थायी कमिटी सदस्य पम्फा भुसालले पनि पत्रकारहरूसँग कुराकानी गर्दै शनिबारको बैठकमा अध्यक्ष ओली उपस्थित हुने विश्वास व्यक्त गर्नुभयो । समस्याको समाधान गर्न बैठकमा भाग नलिनेलाई नेतृत्व मान्न नसकिने भुसालले बताउनुभयो ।

उहाँले भन्नुभयो, ‘प्रधानमन्त्रीले अस्तिको बैठकमा आउन्नँ भन्नुभएको हो । भोलिको बैठकमा आउनु हुन्नँ भन्ने लाग्दैन । आफैले ३८ पेजको प्रस्ताव पेस गर्नुभएको छ र उहाँसित सम्बन्धित भएर सचिवालयमा अरूले पनि प्रस्ताव राख्नुभएको छ । ती प्रस्तावहरूको छलफलमा सहभागी नबनेर त्यसबाट उम्केर समस्याको हल हुन्न । उहाँ आउनुहुन्छ, आउनुपर्छ र बसेर छलफल गरेर समस्याको सामना गर्नुपर्छ । समस्याको सामना नगर्ने नेतृत्व हुन सक्दैन ।’

उहाँले जसले समस्याको छलफल गर्न सक्छ वा अन्तर्विरोधको हल गर्न सक्छ, त्यो मात्रै सही नेतृत्व हुने बताउनुभयो । उहाँले बैठकहरू निरन्तर अगाडि बढाउने बताउनुभयो ।

भेलालाई दाहाल–नेपाल निकट स्थायी कमिटी सदस्यहरू अष्टलक्ष्मी शाक्य, पम्फा भुसाल, केन्द्रीय सदस्यहरू रामकुमारी झाँक्री, लेखनाथ न्यौपाने, ठाकुर गैह्रे लगायतले सम्बोधन गर्नुभयो । भेलामा पत्रकारहरूलाई प्रवेश गर्न दिइएको थिएन ।

अन्तिम अपडेट: पुस २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

‘ओलीले बैठकमा भाग लिन्नँ भन्न पाउनु हुन्न, बैठकमा भाग नलिनेलाई नेतृत्व मान्न सकिँदैन’

दुई अध्यक्षबीच विवाद चर्किँदै गएका बेला दाहाल–नेपाल समूहका विद्यार्थी भेला

फाइल फाेटाे

तपाईको प्रतिक्रिया