चरन क्षेत्र बने सामुदायिक वन : घट्यो भेडापालन, लोप हुँदै परम्परागत राडीपाखी

पुष २९, २०७७ बुधबार १२:४६:३१ | सुवास दर्नाल

सोलुखुम्बु : भेडापालनको लागि आवश्यक पर्ने चरन क्षेत्र सामुदायिक वन बनेपछि भेडाको उनबाट बन्ने पराम्परागत राडीपाखी लोप हुने अवस्थामा पुगेको छ ।

आधुनिक गलैंचाले बजार ओगटेको र भेडाको उन समेत पाउन मुस्किल परेको राडीपाखी व्यवसायीहरु बताउँछन् । केही वर्ष अघिसम्म गाउँघरमा भेडा तथा च्याङग्राको उनबाट बन्ने राडीपाखीको माग राम्रै थियो । तर अचेल भेडा पालन व्यवसाय घटेसँगै उन र राडीपाखीको उत्पादन समेत घटेको सोलुदुधकुण्ड नगरपालिका ८ केरुङका टेक बहादुर मगरको भनाइ छ ।

थुलुङ दुधकोसी गाउँपालिकाका संगम राईका अनुसार स्थानीय राडीपाखीलाई बजारमा आएको रङ्गीचङ्गी गलैंचाले समेत विस्थापित गरेको छ । झट्ट हेर्दा मानिसको ध्यान तान्ने र राडीपाखी भन्दा सस्तोमा समेत पाइने गलैँचातर्फ प्रयोगकर्ताको ध्यान केन्द्रित भएकाले परम्परागत राडीपाखी लोप भएको उहाँ बताउनुहुन्छ ।

विशेष गरी गुरुङ जातिको पुर्ख्याैली पेशासँग जोडिएको राडीपाखीको महत्व जन्म देखि मृत्यु संस्कारसँग समेत गाँसिएको हुन्छ । स्वास्थ्यको दृष्टीकोणले पनि अन्य धागोको कपडा भन्दा उनबाट बनेको राडीपाखी उपयुक्त हुने स्थानीय अनुभवीहरु बताउँछन् । तर पछिल्लो पिंढीले यसकाे महत्व बुझ्न नसक्नु र सम्बन्धित निकायले समेत चासो नदिनुले यसको प्रयोग कम हुँदै गएको स्थानीय बुढापाका बताउनुहुन्छ ।

‘अहिलेका पुस्ताले यसको महत्व बुझ्दैनन्, झिल्के कपडा लगाउन थाले, राडीपाखीलाई त बिर्सिहाले नि’, ओखलढुङगा, रुम्जाटारका नरदेवि गुरुङ चिन्ता व्यक्त गर्नुहुन्छ ।

राडीपाखीको उत्पादन र बजार बढाउन सके सयौंलाई रोजगारी दिन सकिने सम्भावना छ । त्यसका लागि भेडापालक किसान र राडीपाखी व्यवसायीलाई स्थानीय सरकारले सघाउनुपर्ने राडीपाखी व्यवसायीहरुको माग छ ।

सोलुखुम्बु र ओखलढुंगामा मात्रै बर्सेनि लाखौँ मूल्य बराबरको राडीपाखी उत्पादन हुने गरेको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुवास दर्नाल

उज्यालोका सोलुखुम्बु सहकर्मी सुवास दर्नाल हिमाल एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्