इजरायल रोजगारीको परीक्षामा कुनै प्रकारको चलखेल हुँदैन, ढुक्क हुनुहोस् : विभाग

भदौ २८, २०७८ सोमबार १२:५८:१५ | उज्यालो सहकर्मी

काठमाण्डौ – इजरायल रोजगारीको लागि पैसाको चलखेल भयो भन्ने कुरा अप्रमाणिक र अफवाह भएको वैदेशिक रोजगार विभागले जनाएको छ ।

वैदेशिक रोजगारीको सम्बन्धमा अत्यन्तै ठगी भएको कारणले गर्दा नै इजरायल सरकार र नेपाल सरकारबीच प्रोटोकलमा साइन गरेर यसलाई निष्पक्ष गराउन दुवै पक्ष लागिपरेकाले चलखेलको सम्भावना नै नरहेको विभागले प्रष्ट पारेको छ ।

अप्टिकल मार्क रिडर (ओएमआर) प्रविधिबाटै प्रश्न सोधिने र कम्प्युटरबाटै जाँच हुने भएकाले त्यसमा चलखेल हुने बाटो नरहने विभागका निर्देशक तथा सूचना अधिकारी कमल ज्ञवालीले बताउनुभयो ।

इजरायल सरकारसँग गरेको सम्झौताअनुसार जाँच भएको ढिलोमा दुईदिनभित्र रिजल्ट निकाल्नुपर्ने उहाँको भनाइ छ । पहिलो चरणमा ७० प्रतिशत महिला र ३० प्रतिशत पुरुष गरि १६ सय ८० जनालाई छनौट गरिन्छ । १६ सय ८० बाट छनौट भएका १४ सय जनालाई इजरायल दूतावासमा पठाइन्छ । दूतावासले अन्तर्राष्ट्रिय मान्यताप्राप्त डिजिटल लट्रीबाट एक हजार जना छनौट गर्दछ । एक हजार जनामा पनि महिला र पुरुषबीच ७० र ३० प्रतिशतको नै अनुपात रहन्छ । यस्तो अवस्थामा कुनै पनि चलखेल नहुने विभागको दावी छ । परीक्षा योग्यता तथा भाग्य ‘मेरिट एण्ड लकबेस’ दुवै तरिकाले हुने भएकाले ठगी हुने कुनै आधार नभएको निर्देशक ज्ञवाली बताउनुहुन्छ ।

‘लिखित परीक्षाको छनौट मेरिट बेसको आधारमा गरिने हो त्यसरी छनौट भएकालाई इजरायको दूतावासले अन्तर्राष्ट्रिय मान्यताप्राप्त डिजिटल लट्रीबाट एक हजार जना छनौट गर्दछ, त्यसैले यसमा ठगी हुने, चिटिङ हुने कुनै ठाउँ रहँदैन’, उहाँले भन्नुभयो ।

यदि चलखेल भएको देखेमा वा त्यस्तो कुनै प्रमाण भएमा विभागमा आएर उजुरी गर्न विभागले आग्रह गरेको छ । त्यस्तो गरेको पाइएमा तत्कालै कारबाही गरिने विभागले जनाएको छ ।

सुरक्षाको घेरामा परीक्षा

विभागले पारदर्शीतालाई मध्यनजर गरेर नै परीक्षा केन्द्रमा पनि विभागको कुनै पनि कर्मचारीलाई नखटाइएको जनाएको छ । कुनै पनि व्यक्ति कुनै पनि प्रकारले चलखेल गरेको पाइएमा सख्त कारबाही हुने सूचना अधिकारी ज्ञवालीले बताउनुभयो । यस्तै परीक्षा केन्द्रमा अनियमितता तथा चिटिङ नहोस् भन्नको लागि तीन तहको सुरक्षाको घेरा अपनाइएको छ ।

इजरायलमा रोजगारीका लागि आवेदन दिएकाकाे भाषा परीक्षा आज

‘यसमा इजरायल दूतावास, मुख्य सचिव, परराष्ट्र मन्त्रालयका सचिव, श्रम मन्त्रालयका सचिव, वैदेशिक रोजगार विभागका महानिर्देशक लगायत सम्बन्धित क्षेत्रका उच्च पदस्थहरुले पनि निरीक्षण गर्ने कार्यक्रम पनि भएकाले चलखेलको कुनै आशंका रहँदैन’, सूचना अधिकारी ज्ञवालीले बताउनुभयो ।

कति लाग्छ लागत ?

वैदेशिक रोजगार विभागले अहिलेसम्म अनुमान गरेअनुसार एक लाख ६३ हजार रुपैयाँ लाग्ने जनाएको छ । यसमा अझै घट्न पनि सक्ने विभागका निर्देशक कमल ज्ञवालीको भनाइ छ ।

यस्तै विभागले इजरायल जान पाउने आशामा कसैलाई पनि पैसा नबुझाउन आग्रह गरेको छ । यो सरकारी प्रक्रियाअन्तर्गत हुने भएकाले सरकारले तोकेको अवस्थाबाहेक दोस्रो व्यक्ति कसैलाई पैसा नदिन आग्रह गरेको हो । यदि कसैले त्यसरी मागेको पाइएमा अख्तियार दुरुपयोग अनुसन्धान आयोग र प्रहरीको सहयोगमा उपयुक्त कारबाही प्रक्रिया पनि अगाडि बढाइने विभागले जनाएको छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्