रसुवागढी नाकाबाट नाै महिनामा १९ लाख ८५ हजार रुपैयाँकाे छुर्पी आयात

वैशाख १, २०७९ बिहीबार १९:१२:१२ | उज्यालो सहकर्मी

रसुवा – रसुवागढी नाकाबाट चालु आर्थिक वर्ष २०७८/७९ को नौ महिनामा आठ टनभन्दा बढी छुर्पी आयात भएको छ । आर्थिक वर्षको साउनदेखि चैतसम्ममा तीन सय १३ टन खाद्य सामग्री आयात भएकोमा आठ टनभन्दा धेरै चिनियाँ छुर्पी आयात भएको हो । नाै महिनामा १९ लाख ८५ हजार ६ सय रुपैयाँ बराबरकाे छुर्पी आयात भएकाे हाे ।

खाद्य आयात तथा निर्यात गुणस्तर प्रमाणीकरण कार्यालय रसुवाका अनुसार पछिल्लो समय छुर्पीको आयात बढ्दै जान थालेको छ । यस अवधिमा सबैभन्दा बढी फल तथा सागपातजन्य सामग्रीको आयात बढी भएको छ । यसमा सोया सस र अचार ९२ टनभन्दा धेरै आयात भएको छ ।

कार्यालयको तथ्याङ्कअनुसार फूल तथा सागपातजन्य ९२, खाद्यान्न दलहन तथा अन्य ३७, मसलाजन्य झन्डै १५, मासुुजन्य २५, दुग्धजन्य आठ, चिया तथा कफीजन्य झन्डै साढे ३८, माछाको अचार १४ टन तथा बदाम, सिजनिङ पाउडर, अजिनामोटो, रेड विन पेस्ट, डोमा लगायतका ७७ टनभन्दा धेरैसामग्री आयात भएको हो ।

चीनबाट सोया सस, भिनेगर, अचार, पिठो, सिन्के चाउचाउ, सिजनिङ पाउडर, छुर्पी, डोमा, भोटे चिया, चिकेन सुप, भेजिटेबल सुप, रेड विन पेस्ट, चामल आदि सामग्रीको आयात हुने गरेको छ । नाकाबाट खाद्यान्न दलहन तथा अन्य प्रकारका सामग्रीको आयात बढी हुने गरेको कार्यालयले जनाएको छ ।

चालु आर्थिक वर्षको साउनदेखि चैतसम्ममा गएको वर्षको तुलनामा खाद्य सामग्रीको आयात बढेको खाद्य अनुसन्धान अधिकृत नवीन देउजाले बताउनुभयो । अहिले एकद्वार प्रणाली लागू भएपछि इर्पोट पर्मिट नलिएकाहरूको प्रणालीले नै भन्सार गर्न नमिल्ने भएकाले परीक्षण गर्नेको सङ्ख्या पनि बढेको हो ।

रसुवागढी नाकाबाट आयात भएका चिनियाँ खाद्य सामग्रीको नमुना परीक्षण बढेको छ । कार्यालयका अनुसार साउनदेखि चैतसम्ममा कार्यालयले दुई सय ९७ थान खाद्य सामग्रीको नुमना परीक्षण गरेको छ । गएको वर्ष एक वर्षमा दुई सय तीन थान सामग्रीको मात्र परीक्षण भएको थियो । कार्यालयले साउनमा ३१, भदौमा २८, असोजमा ३५, कात्तिकमा ६, मङ्सिरमा २८, पुसमा २५, माघमा ४६ र फागुनमा ७१ थान खाद्य सामग्रीको नमुना परीक्षण गरेको हो । आएका सामग्री सबै मापदण्डअनुसारका छन् । ‘कार्यालय स्थापनाको समयमा मापदण्ड पूरा नभएका खाद्य सामग्रीसमेत आउँथे’, खाद्य अनुसन्धान अधिकृत देउजाले भन्नुभयो, ‘अहिले गुणस्तरहीन सामग्री आएको छैन ।’

गएको आर्थिक वर्ष २०७७/७८ मा दुई सय सात टन चिनियाँ खाद्य सामग्री आयात भएको कार्यालयको तथ्याङ्क छ । कार्यालयले २०७५ माघदेखि चीनबाट आएका खाद्य सामग्रीको नमुना परीक्षण गर्दै आएको छ । कोभिड–१९ भन्दा पहिले दैनिक दुई सय ५० भन्दा बढी गाडी आवतजावत गर्ने गरेका थिए । तर अहिले दैनिक १४ वटा चिनियाँ गाडी सामग्री लिएर आउने गरेका छन् ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्