दीपक मनाङेबाट सिक्नुपर्छ, विगतलाई हेरेर टिप्पणी गर्नु हुँदैन : बेदुराम भुसाल

मंसिर २०, २०७९ मंगलबार १८:३:५० | उज्यालो सहकर्मी

काठमाण्डाै – नेकपा (एकीकृत समाजवादी) का महासचिव डा. बेदुराम भुसालले गण्डकी प्रदेशका युवा तथा खेलकुदमन्त्री राजीव गुरुङ (दीपक मनाङे) बाट सिक्नुपर्ने बताउनुभएको छ ।

आज मङ्गलवार काठमाण्डाैकाे तीनकुनेमा रहेकाे पार्टी केन्द्रीय कार्यालयमा स्वागत गर्दै भुसालले प्रदेशमन्त्री भएर गुरुङले राम्रो काम गरेको उल्लेख गर्दै त्यसबाट सिकेर अघि बढ्नुपर्ने बताउनुभएको हो । गुरुङले आफ्नो विगतलाई बदलेर राजनीतिलाई जनसेवाको रूपमा अघि बढाउने प्रतिबद्धता जनाएको उल्लेख गर्दै भुसालले त्यसलाई सकारात्मकरूपमा लिनुपर्ने तर्कसमेत गर्नुभयो । गुरुङको विगतलाई लिएर कतिपयले टिप्पणी गरेको भन्दै महासचिव भुसालले अब भने वर्तमानमा गरेको कामलाई हेरेर साथ दिनुपर्ने पनि बताउनुभयो ।

उहाँले भन्नुभयो, ‘उहाँ आफैँले भन्नु भएको छ– राजनीति सेवा हो । जनसेवा हो । त्यो जनसेवामा एक्लै बसेर हुँदैन । पार्टीमा आबद्ध भएर जानुपर्ने रहेछ भन्ने महसुस गरेर म यो पार्टीमा आएको हुँ भन्नुभएको छ । उहाँको विगतलाई लिएर टिप्पणी गर्ने गरिएको पाइन्छ । तर हामीले के बुझ्नु पर्छ भने मान्छे मान्छे नै हो, जसले राम्रो काम पनि गर्छ । कहिलेकाँही काम गर्दै जाँदा गल्ती पनि गर्छ । मान्छेलाई, मान्छेको इतिहासलाई विगतको आँखाले मात्रै हेर्न हुँदैन । विगत, वर्तमान र भविष्य सबै हुन्छ हाम्रा अगाडि । त्यसैले विगतमा के थियो भन्ने कुरा भन्दा पनि वर्तमानमा के छ भनेर हेर्नुपर्छ । राजीवजीले आफ्नो विगतलाई बदलेर जनसेवाको भावनाले राजनीति गर्छु, अगाडि बढ्छु भन्ने प्रतिबद्धताका साथ अगाडि बढ्नुलाई सकारात्मक ढङ्गले लिनु पर्दछ । उहाँले गरेका कामबाट सिक्नुपर्छ भन्ने मलाई लाग्छ ।

कार्यक्रममा बोल्दै गुरुङले गण्डकी प्रदेशमा गठबन्धनको सरकार बन्ने र त्यसमा आफू पर्ने भएकाले कसैले पनि मन्त्रीका लागि आफूलाई सिफारिस गर्नु नपर्ने दाबी गर्नुभयो । उहाँले युवा तथा खेलकुद मन्त्रीको रूपमा आफूले गण्डकी प्रदेशमा अरू प्रदेशले भन्दा धेरै काम गरेको जिकिरसमेत गर्नुभयो । राष्ट्रिय खेलकुद प्रतियोगितालाई सम्पन्न गराउन आफूले मन्त्रीको रूपमा महत्त्वपूर्ण भूमिका निर्वाह गरेको उहाँको भनाइ थियो ।

मनाङ प्रदेश सभा (ख) का स्वतन्त्र सांसदसमेत रहनुभएका गुरुङ हिजाे साेमवार नेकपा (एकीकृत समाजवादी) मा प्रवेश गर्नुभएको थियो । उहाँले आफू यस पार्टीमा प्रदेशको मुख्यमन्त्री पाउन र मन्त्री बन्नका लागि नआएको उल्लेख गर्नुभयाे ।

अन्तिम अपडेट: पुस २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्