वैशाख १ गतेदेखि श्रम स्वीकृतिको आवेदन पालिकामा रहेका रोजगार सेवा केन्द्रमार्फत दिन सकिने

चैत १६, २०७९ बिहीबार १७:११:१९ | उज्यालो सहकर्मी

काठमाण्डौ – आउँदो वैशाख १ गतेदेखि वैदेशिक रोजगारीमा व्यक्तिगत रूपमा जाने र पुनः श्रम स्वीकृति लिनेहरूको श्रम स्वीकृतिको आवेदन पालिकास्तरमा रहेका रोजगार सेवा केन्द्रले नै भरिदिने भएका छन् ।

अनलाइन प्रणालीबाट आवेदन दिनु पर्ने हुँदा विभिन्न श्रम कार्यालय अघिल्तिर रहेका साइबर र बिचौलियाहरूबाट श्रमिक ठगीमा परेको भन्दै रोजगार सेवा केन्द्रबाट नै आवेदन भरिदिने व्यवस्था गरिएको श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले जानकारी दिनुभयो ।

सरकारले यो व्यवस्था गरेसँग अब वैशाख १ गतेदेखि देशभरका ७५३ वटै पालिकामा रहेका रोजगार सेवा केन्द्रमार्फत श्रम स्वीकृतिको आवेदन दिन सकिन्छ ।

संस्थागत रूपमा वैदेशिक रोजगारीमा जानेहरूको श्रम स्वीकृतिको आवेदन म्यानपावर कम्पनीले नै आवेदन गर्ने भए पनि व्यक्तिगत रूपमा श्रम स्वीकृति लिएर पहिलो पटक वैदेशिक रोजगारीमा जाने र पुनः श्रम स्वीकृति लिनेहरू आफैँले अनलाइन आवेदन दिन पर्छ ।

तर कयौँ श्रमिक इन्टरनेटको पहुँच, सूचना प्रविधिबारे ज्ञानको अभाव लगायत विविध कारणले अनलाइनबाट श्रम स्वीकृतिको आवेदन दिनकै लागि मोटो रकम बुझाउन बाध्य छन् । श्रम तथा रोजगार कार्यालय अघिल्तिर श्रमिकको आवेदन भरिदिने भन्दै चर्को शुल्क लिने साइबर र एजेण्टहरु पनि भेटिन्छन् ।

यही समस्यालाई मध्यनजर गर्दै श्रमिकको सहजताका लागि आफ्नो गाउँपालिका वा नगरपालिकामा रहेको रोजगार सेवा केन्द्रमा गएर २०८० सालको वैशाख १ गतेदेखि श्रम स्वीकृतिका लागि आवेदन दिन सकिने व्यवस्था श्रम सचिव अर्यालको अग्रसरतामा बिहीबार प्रधानमन्त्रीस्तरीय निर्णय भएको हो ।

‘अनलाइनमार्फत नै श्रम स्वीकृति पाइने व्यवस्था भएपछि कार्यालयमा लाइन लाग्नु पर्ने बाध्यताको त अन्त्य भयो तर अनलाइन आवेदन दिनै श्रमिक ठगिन पर्ने बाध्यता रह्यो’ श्रम सचिव अर्यालले भन्नुभयो ‘अब नयाँ वर्षदेखि रोजगार सेवा केन्द्रका कर्मचारीले नै उहाँहरूको आवेदन फारम भरिदिनुहुन्छ, त्यसका लागि काठमाण्डौ धाउन पर्दैन ।’

पछिल्लो समय सबै खाले श्रम स्वीकृति अनलाइनबाट नै प्रदान हुन्छ । श्रम स्वीकृति लिनका लागि श्रम तथा रोजगार कार्यालयहरूमा धाउन र लाइन लाग्न पर्दैन । विदेशबाट नेपाल आउन पनि पर्दैन ।

विदेशमै रहेका नेपालीले आफैँले अनलाइनबाट र कुनै समस्या भएमा त्यहाँ रहेको नेपाली नियोगको सहायतामा श्रम स्वीकृति लिन सक्छन् । दूतावासबाटै पनि श्रम स्वीकृति लिन मिल्ने व्यवस्था मन्त्रालयले यसअघि नै गरिसकेको छ । अनलाइनबाट आवेदन दिएपछि अनलाइनमार्फत नै श्रम स्वीकृतिको निस्सा प्राप्त हुन्छ ।

रोजगार सेवा केन्द्रका कर्मचारीलाई अनलाइन प्रणाली र आवेदन दिने प्रक्रियाबारे तालिम दिने र वैशाख १ गतेदेखि आवेदन लिने प्रक्रिया सुरु हुने पनि सचिव अर्यालले जानकारी दिनुभयो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

1 Comments

राम काजी कार्की
March 30, 2023, 5:37 p.m.
यो एकदमै सर्हानिय काम भयो , अब आफ्नो पालिका कार्यालय मै सेवा पाइने भयो,साच्चै नै श्रमिक ठगिन बाट बचेका छन , भ्रमित खाले बोर्ड लेखेर अथवा बटुवा लाई समाएर श्रम को कार्यालय नै एहि हो भन्ने भान पारेर बाटो कुरेर बसेका दलाल र तिनका सहयोगी हरु अब आफै आफ्नो श्रम गरेर बिदेश नलाग्लान भन्न सकिन्न।
0 Reply

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

वैशाख १ गतेदेखि श्रम स्वीकृतिको आवेदन पालिकामा रहेका रोजगार सेवा केन्द्रमार्फत दिन सकिने

1 Comments

राम काजी कार्की

तपाईको प्रतिक्रिया

तपाईको प्रतिक्रिया