वैदेशिक रोजगारी : १० महिनामा एजेण्टहरुबाट झण्डै ७६ करोड रुपैयाँ ठगी, महिनामै एक सयभन्दा बढी उजुरी

जेठ ४, २०८० बिहीबार १५:३०:५६ | उज्यालो सहकर्मी

काठमाण्डौ – वैदेशिक रोजगारीको प्रलोभन देखाएर चालु आर्थिक वर्षको १० महिनामा गैरकानुनी बिचौलिया र एजेण्टहरुले झण्डै ७६ करोड रुपैयाँ ठगी गरेका छन् ।

वैदेशिक रोजगार विभागमा चालु आर्थिक वर्षको साउनदेखि वैशाखसम्म दर्ता भएको नौ सय २५ उजुरीमा ७५ करोड ७७ लाख ४१ हजार २१४ रुपैयाँ ठगी रकम दाबी गरिएको विभागले जनाएको छ ।

यो रकम दाबी वैदेशिक रोजगारीमा श्रमिक पठाउन अनुमति नै नपाएका गैरकानुनी एजेण्ट र बिचौलियाबाट भएको ठगीको हो । वैदेशिक रोजगारीमा श्रमिक पठाउनकै लागि भने विभागसँग अनुमति लिएका म्यानपावर कम्पनी बाहेक कोही पनि एजेण्टले रोजगारीका लागि श्रमिक पठाउन नपाउने सरकारी नियम छ । तर सरकारको नियम विपरीत एजेण्ट र बिचौलियाबाट हुने ठगी भने बर्सेनि बढ्न थालेको छ ।

अघिल्लो वर्षको तुलना चालु आर्थिक वर्षमा ठगीमा पर्नेहरू बढेका छन् । विभागका अनुसार पछिल्लो केही समययता वैदेशिक रोजगारीमा श्रमिक पठाउन इजाजत नै नलिएका व्यक्तिहरूबाट भएको ठगीको उजुरी महिनामै सयभन्दा बढी पर्न थालेका छन् ।

गएको वैशाख महिनामा मात्रै एजेण्ट र बिचौलियाबाट भएको ठगीको एक सय चार वटा उजुरी परेको छ । चालु आर्थिक वर्षको १० महिनामा नौ सय २५ वटा एजेण्ट र बिचौलियाबाट भएको ठगीको उजुरी विभागमा दर्ता भएका छन्।

यो सङ्ख्या अघिल्लो वर्षमा निकै कम थियो । गएको आर्थिक वर्षमा एजेण्टहरुबाट भएको छ सय ९५ उजुरी विभागमा परेको थियो । यो उजुरी उपर ५० करोड ४४ लाख ६१ हजार २०३ रुपैयाँ रकम दाबी गरिएको थियो ।

विभागका अनुसार अघिल्लो आर्थिक वर्ष २०७८/०७९ देखि अहिलेसम्म एजेण्ट र बिचौलियाबाट एक अर्ब २६ करोड २२ लाख दुई हजार ४१७ रुपैयाँ ठगी भएको छ । विभागमा परेको १६ सय २० उजुरी उपर यो रकम दाबी गरिएको हो ।

चालु आर्थिक वर्षको १० महिनामा परेका नौ सय २५ उजुरी मध्ये ७७ वटा मुद्दा अदालतमा दायर गरिएको छ भने १७६ बिचौलियालाई प्रहरीले पक्राउ गरेको छ ।

यस्तै विभागकै रोहबरमा १३५ जनाले मिलापत्र गरेका छन् । मिलापत्रमार्फत नौ करोड ४३ लाख ५६ हजार एक सय रुपैयाँ एजेण्टहरुले फिर्ता गरेका छन् ।

गैरकानुनी एजेण्ट र बिचौलियामार्फत भएको ठगीको उजुरी उपर विभागले अनुसन्धान गर्ने, प्रमाण जुटाएर अदालतमा मुद्दा दायर र मिल्छु भन्नेहरूलाई मिलापत्र गराउने पनि गर्छ ।

तर यसरी गैरकानुनी रूपमा भएको ठगीमा अहिलेसम्मको रेकर्डले न्याय पाउने सम्भावना भने ३५ प्रतिशत जति मात्र हुने विभागले जनाएको छ ।

व्यक्तिगत रूपमा भएको ठगीमा अदालतले पीडितकै पक्षमा फैसला गर्दा पनि ठगी गर्ने पिडकले रकम फिर्ता नदिने, लामो समयसम्म झुलाउने लगायतको समस्या रहेको विभिन्न सरकारी प्रतिवेदनले नै देखाएको छ ।

इजाजतप्राप्त म्यानपावरबाट ५३२ ठगी

वैदेशिक रोजगारीमा श्रमिक पठाउन विभागसँग इजाजत लिएका म्यानपावर कम्पनीले चालु आर्थिक वर्षमा गरेको ठगीका पाँच सय ३२ उजुरी विभागमा दर्ता भएका छन् ।

यी उजुरी उपर एक करोड ३४ लाख ६५ हजार २८५ रुपैयाँ दाबी गरिएको छ । जसमध्ये विभागले ७५ वटा उजुरीको फरफारक गरिसकेको छ भने तीन वटा उजुरी उपर मिलापत्र गराएको छ ।

अहिले पनि तीन सय ८५ उजुरी प्रक्रियामा रहेको विभागले जनाएको छ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्