विना इञ्जिनीयरिङ बनेका ग्रामीण सडकका कारण मध्यपहाडी लोकमार्गमा क्षति

साउन १, २०८० सोमबार १३:४३:३९ | रासस

बाग्लुङ - राष्ट्रिय गौरवको आयोजना मध्यपहाडी लोकमार्गअन्तर्गत बाग्लुङमा पर्ने प्रायजसाे खण्ड कालोपत्र भइसकेको छ । पूर्व मालढुङ्गादेखि पश्चिम पातीहाल्नेसम्म करिब एक सय ४२ किलोमिटरमध्ये अहिलेसम्म १४ किलोमिटर बाहेक सबै सडक कालोपत्र भएको छ ।

कालोपत्र भएको सडक विभिन्न ठाउँमा क्षतविक्षत बनेको छ । विना इञ्जिनीयरिङ निर्माण भएका ग्रामीण सडकले लोकमार्गमा ठूलो क्षति पुर्याएको छ । सडकमा क्षति पुर्याउनुका साथै सामान्य वर्षा हुने बित्तिकै अवरुद्धसमेत हुने गरेका छन् । सामान्य वर्षाले नै सडक अवरुद्ध हुँदा यात्रु मर्कामा पर्ने गरेका छन् ।

बाग्लुङ सदरमुकामदेखि काठेखोला, बडिगाड, ढोरपाटन हुँदै निसीखोलासम्म पर्ने मध्यपहाडी लोकमार्गका ठाउँ–ठाउँबाट शाखा सडक निर्माण भएका छन् । शाखा सडक निर्माण गर्दा डोजरले नै केही भागमा कालोपत्र उप्काएको छ भने केही भागमा भत्काएर अप्ठ्यारो बनाएको छ ।

कालोपत्र सडकलाई भत्काएर अप्काएर ग्रामीण सडक बनाउने गरेको यात्रुको आरोप छ । बडिगाडका निर्मल सुवेदीले कालोपत्र भएको लोकमार्ग दुई/तीन वर्ष नहुँदै क्षतविक्षत हुनु स्थानीय पालिकाको कमजोरी रहेको बताउनुभयो ।

'यति राम्रो कालोपत्र लोकमार्गबाट पालिकाले शाखा सडक निर्माण गर्छन्, निर्माण गर्ने बेला थोरै सजकता अपनाएको भए सडकको अवस्था यस्तो हुने थिएन', उहाँले भन्नुभयो, 'सरोकारवाला निकायकै लापरबाहीले लोकमार्गको हालत यस्तो भएको छ, ठूला गाडी त जसोतसो गुड्छन्, साना मोटरसाइकल र ट्याक्सीलाई निकै समस्या हुने गरेको छ, दुर्घटनाको जोखिम पनि बढाएको छ ।'

लोकमार्गको सबैभन्दा बढी गलकोट र बडिगाड खण्डको धेरै ठाउँमा सडक बिग्रिएको छ । कालोपत्र सडकको बीच भागमै ठूलाठूला खाडल बनेका छन् । खाडलमा गाडीका टायर फस्दा पार्टपुर्जा बिग्रिने, पट्टा भाँचिने गरेको गाडी चालक शेरबहादुर विकले बताउनुभयो । बर्खाको समय सडकमाथिबाट आउने लेदोसहितको बाढीले बढी समस्या गराउने गरेको उहाँको भनाइ छ ।

विकले भन्नुभयो, 'गाउँ–गाउँमा मोटरबाटो पुगेका छन्, नाली निर्माण गरेका छैनन्, पानी पर्यो भने गाउँको सडकको माथि सबै बगाएर कालोपत्र भएको सडकमा ल्याउँछ, जहाँ–जहाँ स–साना खोल्सा छन् त्यहाँ बढी क्षति पुगेको छ, बर्खामा त गाडी कालोपत्र बाटोमा पनि गाडी चलाउनै मुस्किल हुन्छ, सडकको ठाउँ ठाउँमा ठूला–ठूला ताल बनेका छन्, गाडी भासिन्छ, बिग्रिन्छ, धेरै खर्च निस्किन्छ ।'

अक्षतेदेखि बिहुँसम्मको खण्ड कालोपत्र गर्न बाँकी रहे पनि बिहुँ हुँदै गलकोट–बडिगाड–बुर्तिबाङसम्मको खण्ड २०७२ सालमा कालोपत्र सम्पन्न गरिएको थियो । कालोपत्र गरिएका ती खण्डका प्रायजसाे भाग भलले उप्काइदिएको छ । त्यसबाट करोडौँको क्षति पुगेको छ । हटिया–बुर्तिबाङ र बुर्तिबाङ–पातिहाल्नेसम्मको सबै खण्ड कालोपत्र भइसकेको छ ।

मध्यपहाडी लोकमार्गको बाग्लुङ खण्डमा पर्ने एक सय ४२ किलोमिटरमध्ये करिब एक सय ३० किलोमिटर सडक कालोपत्र भइसकेको छ । प्रायजसाे सडक खण्डमा नाली पुरिएकाले भल सडकको बीच भागबाट बग्ने गर्दछ । जीर्ण बनेको घोडाबाँधे–हटिया सडक खण्ड मर्मतका लागि ४० करोड रुपैयाँ विनियोजन भइ त्यसबाट धमाधम काम भइरहेको छ । बाग्लुङका छ पालिकामा प्रत्यक्ष जोडिएको मध्यपहाडी लोकमार्ग जिल्लाको विकासको मेरुदण्ड मानिए पनि दुरावस्था हुँदा यात्रु सास्ती भोग्न बाध्य भएका छन् ।

कालोपत्र हुन बाँकी रहेका सडकको कालोपत्र गर्न, क्षतविक्षत बनेको सडकको तत्काल मर्मत सम्भार गरी जोखिम न्यूनीकरण गर्न स्थानीयको माग छ । लोकमार्गको बिहुँ खण्ड लामो समय निर्माण कम्पनीले कालोपत्र गर्न नसक्दा कारबाही गरिएको छ । लोकमार्ग आयोजना कार्यालयले ठेक्का सम्झौता पनि छाडेको छ । ट्र्याक खुलेको २६ वर्ष बितिसक्दा पनि यो खण्ड कालोपत्र नहुँदा स्थानीय हिलो र धुलोका कारण बसाइँसराइ गर्न बाध्य भएको स्थानीय नगेन्द्र कँडेलले बताउनु भयाे ।

सडक कालोपत्रका लागि बारम्बार निर्माण कम्पनी र सरोकारवाला निकायलाई आग्रह गर्दा गर्दै केही समय अगाडि ठेक्का नै तोडिएपछि कालोपत्र गर्ने कार्य अनिश्चित बनेको उहाँको भनाइ छ । कँडेलले सडक छेउछाउका धेरै बस्ती विस्थापित हुनुपरेको गुनासो पोख्नुभयो ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्