नेपाललाई मेडिकल कलेजको 'हब' बनाउनुपर्छ : अध्यक्ष ओली

मंसिर २१, २०८० बिहीबार १३:४५:३० | प्रताप बानियाँ

म्याग्दी – नेकपा एमालेका अध्यक्ष केपी शर्मा ओलीले नेपाललाई मेडिकल कलेजको 'हब' बनाउनुपर्ने बताउनुभएको छ । एमालेले शुरु गरेको 'झुलाघाट–चिवाभञ्ज्याङ समृद्धिका लागि सङ्कल्प यात्रा–२०८०' अभियानअन्तर्गत आज (बिहीवार) बाग्लुङ बजारमा आयोजित सन्देश सभालाई सम्बोधन गर्दै उहाँले यस्तो बताउनुभएको हो ।

अध्यक्ष ओलीले नेपालमा मेडिकल कलजेहरू खोल्न आवश्यक रहेको बताउनुभयो । विदेशीका एजेन्टहरूले पैसा खाएर नेपालमा अहिले मेडिकल कलेज खोल्न नदिएको भन्दै उहाँले नेपालमा मेडिकल कलेज नहुँदा बर्सेनि विद्यार्थी लाखाैँ रुपैयाँ खर्च गरेर विदेशिनुपरेको हुँदा नेपालभित्रै मेडिकल शिक्षा दिनुपर्ने उल्लेख गर्नुभयाे ।

नेपालमा सञ्चालित शिक्षण अस्पतालहरूलाई मेडिकल कलेजको रूपमा स्थापित गरेर विदेश पढ्न जाने मेडिकल शिक्षाका विद्यार्थीलाई स्वदेशमै अध्ययनको वातावरण मिलाउनुपर्नेमा अध्यक्ष ओलीले जोड दिनुभयो । उहाँले एमाले नेतृत्वको सरकारले स्वदेशमै युवा र विद्यार्थीलाई रोक्ने वातावरण बनाएको भए पनि वर्तमान गठबन्धनको सरकारले युवा विद्यार्थीलाई विदेशिन बाध्य पारेको आरोप लगाउनुभयो । अहिलेको सरकार रहेसम्म विदेश जाने युवा विद्यार्थी नरोकिने उहाँको भनाइ छ ।

ओलीले आफू नेतृत्वको एमाले सरकारले भारतले नाकाबन्दी लगाएको समयमा चीनसँग पारवहन सन्धि सम्झौता गरेर नेपाललाई समुद्रसँग जोड्ने अवस्था सिर्जना भएको बताउनुभयो । उहाँले हिमाली जिल्ला मुस्ताङमा युरेनियम रहेको पत्ता लगाएर अहिले त्यसको सुरक्षाका लागि नेपाली सेनालाई जिम्मा लगाइएको बताउँदै एमालेको नेतृत्वमा सरकार बनेमा नेपालमा रहेका प्राकृतिक स्रोत र साधनको उत्खनन तथा परिचालन गरेर देश निर्माण गर्ने दाबी गर्नुभयाे । देशभित्र रहेका खनिज पदार्थको उत्खनन गरी युवालाई रोजगारको सिर्जना गरिने उहाँले बताउनुभयो ।

एमाले नेतृत्वको सरकारले पूर्व–पश्चिम राजमार्गको स्तरोन्नति, मध्यपहाडी पुष्पलाल लोकमार्गको द्रुत विकास, हुलाकी राजमार्ग र मदन भण्डारी राजमार्गलगायत थुप्रै सडकको निर्माण अगाडि बढाएको अध्यक्ष ओलीले बताउनुभयो । उहाँले एमालेको सरकार रहँदा आफैँले शिलान्यास गरेको पोखरा अन्तर्राष्ट्रिय विमानस्थलको निर्माण सम्पन्न भई अहिले सञ्चालनमा आए पनि वर्तमान सरकारले विदेशी पर्यटक आउनका लागि स्वीकृति दिन नसकेको आरोपसमेत लगाउनुभयो ।

अध्यक्ष ओलीले एमालेको सरकारले नेपालमा थुप्रै विकास निर्माणका काम गरेको भन्दै नेपालको कुनै पनि भू–भाग अब दुर्गम नरहेको जिकिर गर्नुभयाे । उहाँले अब देशको विकास गर्नका लागि पनि नेकपा एमाले नै चाहिने भएकाले 'मिसन ०८४' को अभियान लिएर अहिले देश दौडाहामा रहेको उल्लेख गर्नुभयाे ।

अन्तिम अपडेट: मंसिर १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्