काठमाण्डौ – स्वतन्त्र ऊर्जा उत्पादकहरूको संस्था नेपाल (इप्पान) का अध्यक्ष गणेश कार्कीले नेपालमा विदेशी लगानी भित्राउनका लागि तत्काल नीतिगत सुधार गर्न आवश्यक रहेको बताउनुभएको छ ।

अध्यक्ष कार्कीले सरकारले आउँदो वैशाख १६ र १७ गते गर्न लागेको लगानी सम्मेलनअघि नै वन, जग्गा तथा अन्य ऐन कानुनहरूमा देखिएका नीतिगत समस्या सुधार गर्नुपर्ने बताउनुभएको हो । उहाँले विदेशबाट धेरै लगानी ल्याउनुपर्ने अवस्था रहेकाले विदेशी बैंकले पनि नेपालको जलविद्युतको क्षेत्रमा लगानी गर्नसक्ने वातावरण बनाउनुपर्ने बताउनुभयो । विद्युतमा बैंकको पनि लगानी ल्याउनुपर्ने भएकाले सरकारले नेपाली बैंकलाई २० प्रतिशत लगानी जलविद्युतकाे क्षेत्रमा गर्नुपर्ने व्यवस्था गर्न आवश्यक रहेको कार्कीकाे भनाइ छ ।

अध्यक्ष कार्कीले इक्विटी फन्डिङ कम्पनीलाई पनि नेपालमा लगानी ल्याउन सहज बनाउनुपर्ने बताउनुभयो । उहाँले सरकारले धेरै आयोजनाको लाइसेन्स दिएर पीपीए तत्काल खुला गरे आउँदो १० वर्षमा २८ हजार पाँच सय मेगावट पुर्‍याउन सकिने दाबी गर्नुभयाे ।

इप्पानका अध्यक्ष कार्कीले सरकारले २८ हजार पाँच सय मेगावट बिजुली उत्पादन र १३ हजार मेगावट देशभित्रै खपत गर्न ४६ खर्ब रुपैयाँ आवश्यक रहेको बताउनुभयो ।