कञ्चनजङ्घा आरोहण गर्न गएका दुई भारतीय नागरिकको ज्यान गयो, एक जना सम्पर्कविहीन

 जेठ २, २०७६ बिहिबार १२:८:३५ | उज्यालो सहकर्मी
unn.prixa.net

काठमाण्डौ – विश्वको तेस्रो अग्लो हिमाल कञ्चनजङ्घा आरोहण गर्न गएका दुई भारतीय नागरिककाे ज्यान गएको छ । अन्य एकजना आरोही सम्पर्कविहीन भएका छन् । 

ज्यान गुमाउने आरोहीहरुमा पश्चिम बंगालका ४६ वर्षीय कुन्तल कार्नार र ४८ वर्षीय विप्लव वैद्य रहेको पुष्टि भएको छ । 

बुधबार ८ हजार ५ सय ८६ मिटर अग्लो कञ्चनजङ्घा मुख्य शिविरमा पुगेर फर्कने क्रममा वैद्यको चौथो शिविरमाथिको क्षेत्रमा ज्यान गएको हो । त्यसैगरी कार्नारको आरोहणकै क्रममा ज्यान गएको आरोहणको जिम्मा लिएको 'पिक प्रमोशन कम्पनी' का प्रबन्ध निर्देशक केशव पौडेलले उज्यालोलाई बताउनुभयो ।   

त्यसैगरी आरोहण गर्ने क्रममा चिप्लिएर सम्पर्कविहीन भएका एकजनाको खोजी कार्य भैरहेको छ । 

ज्यान गुमाउनेहरुको शव उद्धारको प्रयास भैरहेको छ । पर्वतारोहण मौसमको समयमा सयौँको संख्यामा पर्वतारोहीहरु हिमाल आरोहण गर्न आउने गर्दछन् ।

कञ्चनजङ्घालाई विश्वको अति जोखिमपूर्ण हिमालको रुपमा लिइन्छ । मौसमको केही फेरबदल हुँदा पनि यहाँ जोखिम बढ्ने गर्दछ । 
 

अन्तिम अपडेट: फागुन ३०, २०८०

तपाईको प्रतिक्रिया