आत्मघाती गाेलबाट अग्रता लिएकाे एपीएफले पुलिसलाई हरायाे, वालिङ विराटनगरसँग स्तब्ध

फागुन ३, २०७७ सोमबार १९:२७:३३ | उज्यालो सहकर्मी

काठमाण्डाै – आत्मघाती गोलबाट अग्रता लिएको एपीएफले पुलिसमाथि दुई–एकको सङ्घर्षपूर्ण जित निकाल्दै महिला राष्ट्रिय लिगमा अपराजित यात्रालाई सोमबार पनि निरन्तरता दिएको छ ।

ललितपुरको अखिल नेपाल फुटबल सङ्घ (एन्फा) मुख्यालयको मैदानमा सम्पन्न दिनको पहिलो खेलमा एपीएफले पुलिसलाई दुई–एकले हराउँदै जितको लयलाई निरन्तरता दिएको हो । पहिलो हाफ गोलरहित बराबरी खेलेका विभागीय डर्बीमा पुलिसले ६९ औँ मिनेटमा आत्मघाती गोल दिएपछि आफै दबाबमा परेको थियो । घिमकुमारी गुरुङले गोल गर्दा एपीएफले अग्रताको अवसर पाएको थियो । दबाब दिँदै खेल पस्किएको पुलिसका लागि अमृता जैशीले ७५ औँ मिनेटमा गोल गर्दै एपीएफविरुद्ध खेल बराबरीमा ल्याएकी थिइन् ।

अघिल्ला खेलमा फराकिलो जित निकाल्दै अपराजित यात्रालाई कायम राखेको एपीएफका लागि खेल सकिन चार मिनेट बाँकी रहँदा वैकल्पिक खेलाडी रविना गोलले गोल गर्दै अग्रता दुई–एकमा पुर्‍याइन् । त्यसपछि दबाबमा परेको पुलिसले खेलमा फर्किन निकै प्रयास गरे पनि सफल हुन सकेन र एपीएफले पुलिसविरुद्ध सङ्घर्षपूर्ण जित निकाल्न सफल भयो ।

रोमाञ्चक जित निकालेको एपीएफले १० औँ खेलमा अपराजित यात्रालाई निरन्तरता दिँदा उपाधि नजिकसमेत पुगेको छ । १० खेलबाट स्पष्ट ३० अङ्क जोडेको एपीएफ शीर्ष स्थानमा यथावत् रहँदा अङ्क गुमाएको पुलिसको १० खेलबाट १४ अङ्क भएको छ । पराजयसँगै पुलिसको उपाधि उचाल्ने समीकरण समाप्त भएको छ ।

लिगअन्तर्गत सोमवारै सम्पन्न भएको दोस्रो खेलमा विराटनगर महानगरपालिकाले वालिङ नगरपालिका स्याङ्जालाई एक–शून्यले स्तब्ध बनाएको छ । ३५ औँ मिनेटमा भारतीय खेलाडी आशा कुमारीले गरेको गोल निर्णायक बनेको थियो । विपक्षी खेलाडीले लडाएपछि प्राप्त फ्रिकिकमा आशा कुमारीले बललाई जाली चुमाउन सफल भएकी थिइन् । पहिलो हाफमा लिएको अग्रतापछि दोस्रो हाफमा खेलमा फर्किने सङ्घर्ष गरेको वालिङले पाएका केही राम्रा अवसरलाई सदुपयोग गर्न नसक्दा अङ्क सुम्पिन बाध्य भएको हो ।

जितसँगै विराटनगरले १० खेलबाट १३ अङ्क जोडेको छ । विराटनगर तालिकाको पाँचौँ स्थानमा रहँदा अङ्क सुम्पिएको वालिङको १४ अङ्क छ । वालिङ तालिकाको तेस्रो स्थानमा छ । पुुलिससँग समान अङ्क भए पनि गोल अन्तरका आधारमा वालिङ तेस्रो स्थानमा अटाएको हो ।

अन्तिम अपडेट: कात्तिक २०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्