विकृत बन्दै गाईजात्रा : ‘घिनिताङ्ग घिनिताङ्ग’लाई छाडेर ‘सेक्सी लेडी’ मा रमाउँदै युवा

 भदौ ११, २०७५ सोमबार १६:५१:२२ | उज्यालो सहकर्मी

भक्तपुर – गाईजात्रा पर्वमा ‘घिनिताङ्ग घिनिताङ्ग घिन्ताङघिसी त्वाङ्ग’ भनेर सांस्कृतिक गीत गाएर भक्तपुरमा नाचिने प्रसिद्ध घिन्ताङघिसी नाचमा चरम विकृति भित्रिएको छ ।

प्राचीन नाचको रुपमा लिइने आकर्षक यो नाचलाई युवा पुस्ताले अश्लील शब्दकौ रुपमा परिणत गरेर गाउन थालेपछि सस्कृतिमा छाएको विकृति देखेर स्थानीयबासिन्दा तथा संस्कृतकर्मीहरु समेत चिन्तित बनेको छन् ।

युवापुस्ताले सोमबार भक्तपुरमा मनाएको परम्परागत गाईजात्रामा युगौदेखि चल्दै आएको गीत ‘घिनिताङ्ग घिनिताङ्ग घिन्ताङघिसी त्वाङ्ग’ लाई बिगारेर अश्लील शब्दहरु समेत राखेर युवा युवतीले लाठी नाच नाचेपछि संस्कृतकर्मीहरु समेत चिन्तामा परेका हुन् ।

लाठी नाच नाच्दा युवा पुस्ताले ‘घिनिताङ्ग घिनिताङ्ग घिन्ताङघिसी त्वाङ्ग’ को सट्टामा ‘सेक्सी लेडी सेक्सी लेडी, आई लभ यू’, ‘ल्यासेल्याम्हो ल्यासेल्याम्हो तरुणी, जिता मरुनी’, ‘वी वान्ट वी वान्ट आई लभ यू’, ‘रप्पयौ रप्पयौ जेरी, आधा पाउँ’, ‘तितेपाती, तितेपाती झ्याप झयाप..........’ जस्ता शब्द प्रयोग गरेर युवायुवती तथा किशोर किशोरीलेसँगै गीत गाएर लाठी नाच नाचेका छन् ।

परम्परागत सस्कृतिलाई जोगाउने जिम्मेवारी बोकेको युवापुस्ताले नै परम्परागत गीतलाई बिगारेर अश्लिल गीत बनाएर गाउन थालेपछि परम्परागत संस्कृति माथि युवापुस्ताले प्रहार गरेको संस्कृतकर्मी ओम धौभडेल बताउनुहुन्छ ।

संस्कृतकर्मी धौभडेल भक्तपुरका बालकदेखि वृद्धसम्म र पुरुषदेखि महिलासम्मले नाच्दै आएका प्रसिद्ध गीतलाई बिगारेर अश्लिल बनाइएकाले परम्परा लोप हुने र पछिल्लो पुस्ताले संस्कृतिको गलत अर्थमा बुझ्न सक्ने भएकाले युवा पुस्ताले यस्ता बिकृतिलाई हटाउनुपर्ने बताउनुभयो । जात्रामा संस्कृतिको नाममा विकृति भित्रिएको पुराना पुस्ताले बताएका छन् ।

भक्तपुरका ८७ वर्षीया आशालाल चिंकबञ्जारले जात्रामा घिन्ताङघिसी गीतलाई बिगारेर अपशब्द र अश्लील शब्दसमेत प्रयोग भएकामा दुःख लागेको बताउनुभयो । ‘संस्कृति युवापुस्ताबाटै बिग्रदै छ, युवापुस्ताले नजोगाए संस्कृतिको अवस्था कस्तो होला’, उहाँले चिन्ता व्यक्त गर्नुभयो ।

त्यसैगरी जात्रामा युवतीहरूले प्रयोग गरेका आधुनिक एवं छोटा पहिरनले जात्राको महत्व खस्काएको संस्कृतकर्मीहरु बताउछन् । संस्कृतिको नाममा विकृति भित्रिन थालेपछि जात्राको वास्तविक रूप जोगाउन जरूरी रहेको उनीहरु बताउछन् ।

नाच नाचिरहेका कतिपय युवाले हात–हातमा मदिराका बोतल लिएर आपसमा खाँदै–खुवाउँदै अझ रहुसिएका देखिन्थे । ‘हातमा जाँड, रक्सी र बियरको बोतल लिएर घिन्ताङघिसी नाँचसँगै नाचेर थप विकृति भित्र्याएका छन् युवा पुस्ताले’, पर्यटन विकास समितिका अध्यक्ष दिवानचन्द्र धौभडेल चिन्ता व्यक्त गर्नुहुन्छ ।

गाईजात्रामा बाँसुरी बाजा, घिन्ताङघिसी नाच, बाँसमा कपडाले बेरेर बनाइएको तामचा, माटो र पित्तलको गाईसमेत देखाई बजार परिक्रमा गरी सेलाउने परम्परा रहेको छ ।

त्यस्तै गाईजात्रामा ब्याण्ड बाजाहरु समेत बजाएर विकृति भित्र्याएको छ । ब्याण्ड बाजा यो जात्रामा बजाउने परम्परा छैन, तर केही वर्ष यता यस्ता बाजाले ठूलै ठाउँ ओगट्न थालेपछि संस्कृति लोप हुने अवस्थामा पुगेको उनीहरु बताउँछन् ।

केही वर्ष यता घिन्ताङघिसी नाचमा विदेशी पर्यटकको पनि ज्यादै सहभागिता रहेन थालेको छ । पर्यटन प्रवर्धन गर्न स्थानीय युवा क्लबले सञ्चालन गरेको नाचमा विभिन्न देशका पर्यटकले हातहातमा लौरो लिएर घिन्ताङघिसी नाच नाचेका थिए ।

यसले जात्राको रौनक बढाउनुका साथै पर्यटनको विकास र पर्यटकलाई संस्कृतिको जानकारी दिन टेवा पुगेको पर्यटन विकास समिति भक्तपरका अध्यक्ष धौभडेलले बताउनुभयो ।

केही वर्ष अघिसम्म महिलाले नाच्न नहुने परम्परा रहे पनि अहिले भने व्यापक रूपमा युवती तथा किशोरीहरुको घिन्ताङघिसी नाच नाचेका छन् । यसवर्ष नाचका बालबालिकाको पनि उल्लेख्य सहभागिता रहेको थियो ।

जात्राको आकर्षणको रूपमा रहेको घिन्ताङघिसी नाचसँगै हनुमान नाच र माक प्याखं अर्थात बाँदर नाच समेत टोलटोलमा प्रदर्शन गरिएको छ । यसका साथै लाखे नाच, भैरव नाचलगायत देवीदेवताका नाच समेत प्रदर्शन गरिएको छ ।

आर्थिक अवस्था कमजोर हुनेले पनि कुमार–कुमारी बनाएर घुमाउने तथा जिउँदो गाई मात्रै भए पनि घुमाउने परम्परा रहेको छ । विभिन्न घरबाट निकालिएको जात्रा दरबार स्क्वायर, बालाखु गणेश, चोछेँ, भोलाछेँ, महालक्ष्मी, नागपोखरी, क्वाठण्डौ, नवदुर्गास्थान, सूर्यमढि, दत्तात्रय, सुकुलढोका, गोलमढी, तौमढी, पोटरीस्क्वायर, वंशगोपाल, इताछेँ, खौमाको परिक्रमा गराउने गर्दछन् ।

जात्रा समापनको क्रममा तौमढीबाट साँझ परालबाट बनेको तमाचा र त्यससँगै भैरव नाचसमेत निकालिएको थियो । तौमढीस्थित भैरव मन्दिरबाट निकालिएको तमाचा, यसपछि सोही टोलभित्रभरिबाट निकालिएको अन्य तमाचा र सबैभन्दा पछि नकिङजु अजिमाको तमाचा निकाली वंशगोपाल हुँदै विभिन्न ठाउँमा परिक्रमा गरी दरबार स्क्वायर चोकमा तीनपटक परिक्रम गरेपछि आजको जात्रा समापन भएको छ ।

यसपछि परालबाट बनेको भैरव र अजिमाको तमाचा निस्किएपछि अन्य तमाचा निकाल्न नहुने परम्परा रहेको छ । जात्रामा विभिन्न कार्टुन तथा व्यङ्ग्य चित्र समेत हातहातमा बोकेर प्रदर्शन गरिएको थियो ।

आठ रात नौ दिनसम्म मनाइने भक्तपुरको गाईजात्रा कृष्ण जन्माष्टमीको दिन तलेजुको जात्रा गरी समापन गरिन्छ । भोलिदेखिको जात्रामा भने दिउँसो विभिन्न व्यङ्ग्य चित्र, कार्टुन र घिन्ताङघिसी लगायतका नाचहरू प्रदर्शन गर्ने परम्परा छ । 


 

 

अन्तिम अपडेट: कात्तिक १४, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

1 Comments

  • shyam kuinkel

    Aug. 27, 2018, 5:17 p.m.

    गाईजात्रा महोत्सवलाई फिस्स हाँसेर ग्रुप फोटो खिच्ने, फेसबुकमा अपलोड गर्ने अनि शेयर गर्ने, इतिहास देखाउने भन्दा भड्किलो शैली जमघट बाँच्छ कि भन्ने पीर /

  •  0 Reply

तपाईको प्रतिक्रिया

समाचार

लोकप्रिय

१

इङ्ल्यान्डलाई ६ विकेटले हराउँदै ‘द हङकङ सिक्सेस’मा नेपालको विजयी शुरुवात

२

इङ्गल्याण्डलाई पराजित गरेको नेपाल एक खेलअघि नै हङकङ सिक्सेस प्रतियोगिताको दोस्रो चरण प्रवेश

३

रूसले गुगललाई विश्वको जीडीपीभन्दा धेरै जरिवाना तोक्यो

४

थाई एयर एशियाले पर्सि आइतवारदेखि काठमाण्डौ र भैरहवाबाट उडान गर्ने

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई