कृषिकर्ममा भूपू लाहुरे: माछा, कुखुरा र तरकारीबाट लाखौं रुपैयाँ आम्दानी

पुष ११, २०७५ बुधबार १५:४०:७ | श्यामशितल परियार

लमजुङ – लगन, मेहनत र अनुशासनको पाठ सेनामा छँदै सिक्नुभयो, तनहुँ व्यास नगरपालिका–८, समीफेँदका जयन्द्र शाहीले । उहाँको पुख्र्यौली थलो लमजुङको कुन्छा हो । जयन्द्र १८ वर्षअघि कुन्छाबाट तनहुँको समीफेँदमा बसाइ सरेर आउनुभएको हो ।

शाहीले १८ वर्षसम्म नेपाली सेनामा रही देशको सेवा गर्नुभयो । नेपाली सेनाबाट ‘पेन्सन’ निस्केपछि उहाँ पैसा कमाउन मलेसिया हानिनुभयो । ३ वर्ष उतै बस्नुभयो ।

परदेश छोडी घरदेशमा कृषि

‘परदेशमा होईन देशको माटोमा श्रमपसिना बगाउनुपर्छ, देशको सेवा गर्नुपर्छ’ भन्ने देशभक्ति भाव मनमा सजाउँदै उहाँ स्वदेश फर्किनुभयो ।

त्यसपछि व्यावसायिक माछापालन सुरु गरिहाल्नुभयो । २०७३ सालबाट उहाँले माछा पाल्न थाल्नुभएको हो । सुरुका वर्षमा एक हजार माछाका भुरा मात्रै हुर्काउनुभयो, उहाँले । सुरुका वर्षमा माछा बिक्रीबाट ६५ हजार रुपैयाँमात्र हात परेको उहाँ बताउनुहुन्छ ।

अहिले उहाँले घर अगाडि रहेको ४ रोपनी खेतीयोग्य जमिनमा २ वटा माछापोखरी बनाउनुभएको छ ।

एउटा माछापोखरीमा माछा हुर्कँदै छन् भने अर्कोमा छिट्टै माछाका भुरा हाल्ने तयारीमा हुनुहुन्छ उहाँ । पछिल्ला वर्षमा माछापालनबाट वार्षिक एकदेखि डेढ लाखसम्म कमाइ हुने गरेको उहाँ बताउनुहुन्छ ।

‘अरुलाई प्रेरणा जगाउनुका साथै देशमै केही उद्यम गरी देशको सेवा गर्नुपर्छ भन्दै कृषिमा लागेको हुँ । कृषिमा मेरो मन रमेको छ । दुःख गरेअनुसारको कमाई पनि भएकै छ,’ उहाँले भन्नुभयो ।

उहाँको माछापोखरीमा कमन कार्प, ग्रास कार्पलगायतका माछा पालिएका छन् । उत्पादित माछा घरबाटै प्रतिकेजी ५ सय रुपैयाँमा बिक्री हुन्छ ।

उहाँले माछापालनसँगै बा्रेइलर कुखुरासमेत पाल्नुभएको छ । एक हजार चल्ला हुर्काउन सक्ने क्षमताको दुईवटा कुखुराका खोरहरु छन् ।

तरकारीले बारीमा हरियाली

उहाँले व्यावसायिक तरकारी खेतीसमेत गर्नुभएको छ । घर अगाडिको बारीमा साग, मुला, काउली, आलु फलाइएको छ ।
‘एक रोपनी जग्गामा तरकारी फलाएको छु । उत्पादित तरकारी पनि माछाजस्तै घरबाटै बिक्री हुन्छ ।

तरकारी स्थानीय बजारसम्म पनि पुग्छ । कमाई सन्तोषजनक नै छ,’ उहाँले थप्नुभयो । २ छोरा र एक छोरीका पिता जयन्द्रलाई कृषि कर्म अघि बढाउन श्रीमतीको पनि साथ मिलेको छ ।

आफूले व्यास नगरपालिकाबाट पनि सहयोग प्राप्त गरेको बताउँदै उहाँले भन्नुभयो,‘आगामी दिनमा कृषिलाई नै निरन्तरता दिने विचार गरेको छु,’

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्