आत्तिएर सभामुख महराले भने – ‘हुन्न भन्ने पक्षका माननीय सदस्यको बहुमत भएकाले... अङ्ग बनेको घोषणा गर्दछु’

माघ ११, २०७५ शुक्रबार १८:५६:५३ | विशाल कार्की

काठमाण्डौ - सभामुख कृष्णबहादुर महराले शुक्रबारको प्रतिनिधिसभा बैठकमा ‘हुन्न भन्ने पक्षका माननीय सदस्यको बहुमत भयो’ भन्दै विधेयक पारित भएको घोषणा गर्नुभयो ।

राष्ट्रिय चिकित्सा शिक्षा विधेयक पारित हुन नदिने कांग्रेसको विरोधले आत्तिएझै देखिनुभएका सभामुखले ‘प्रस्तावको पक्षमा हुने माननीय सदस्यले हुन्छ भन्नुस्’ भनेपछि सत्ता पक्षका सांसदले हुन्छ भन्दै हात उठाए ।

फेरि ‘यसको विपक्षमा हुने माननीय सदस्यले हुन्न भन्नुस्’ भन्दा प्रतिपक्षी सांसदले संसदमा नारा लगाइरहेका थिए ।

विपक्षीको कुनै प्रतिकृया नआएपछि सभामुखले निर्णय सुनाउदै भन्नुभयो ‘हुन्न भन्ने पक्षका माननीय सदस्यको बहुमत भएकाले विधेयकको दफा २ देखि ५३ सम्म (राष्ट्रिय चिकित्सा शिक्षा विधेयक २०७५) को अंग बनेको घोषणा गर्दछु ।’

प्रमुख प्रतिपक्षी कांग्रेसले रोष्ट्रम घेर्दै नाराबाजी गरिरहे पनि सभामुख महराले शिक्षामन्त्री गिरिराजमणि पोखरेललाई विधेयक छलफलका लागि पेश गर्न अनुमति दिनुभएको थियो ।

संसदमा टेबल गराउँदै शिक्षामन्त्री पोखरेलले विधेयकमाथि छलफल गरियोस् भनी प्रस्ताव पेश गर्नुभयो । लगत्तै सभामुख महराले संसदमा प्रस्तुत भएको विधेयकको पक्ष र विपक्ष रहेका सदस्यले हुन्छ वा हुन्न भन्नुस् भन्दै कारबाही अगाडि बढाउनुभयो ।

विधेयकमा बोल्न चाहने सदस्यले सभामुखको ड्याससँगै बसेका कर्मचारीलाई आफ्नो नाम टिपाउन आग्रह गर्नुभएको थियो । तर बोल्न कसैले पनि नाम नटिपाएपछि विधेयकलाई सभामुखले निर्णयार्थ प्रस्तुत गर्नुभएको थियो ।

सत्ता पक्षसँग झण्डै दुई तीहाई बहुमत रहेको सभामुखलाई अवगत भएरै उहाँले हलमा हेर्दै नहेरी फटाफट विधेयक पारित गराउन प्रकृयाहरु अघि बढाइरहनुभएको थियो ।

सभामुख महराले पढेर सुनाएको निर्णयमै गलत बोले पनि फेरि त्याहाँ सच्याउने काम भएन । तत्काल आवश्यक सल्लाह दिनका लागि सभामुखसँगै प्रतिनिधि सभा बैठकमा सचिव रहने व्यवस्था छ । तर सभामुखले हतार हतारमा बोलेको उक्त कुरा कसैले पत्तै पाएनन् । तर यो कुरा संसदको रेकर्डमा रहने छ ।

चिकित्सा शिक्षा विधेयक पारित गराउने हडबडमा सभामुखले ‘हुन्न भन्ने पक्षमा बहुमत भएको भन्दै विधेयक पारित भएको भन्नुले उल्टो अर्थ पनि लगाइदिएको छ ।

अन्तिम अपडेट: पुस २०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।