जथाभावी भर्ना शुल्क उठाउँदै बझाङका सामुदायिक विद्यालय

वैशाख २६, २०७६ बिहीबार ८:४७:१५ | डीबी बिष्ट

बझाङ – बझाङका सामुदायिक विद्यालयहरुले विभिन्न वाहानामा विद्यार्थीबाट चर्को शुल्क लिने गरेका छन् ।

पटक–पटक जिल्लाका सामुदायिक विद्यालयहरुले चर्को शुल्क लिने गरेको अभिभावकबाट जनगुनासो आए पनि यस्ता विद्यालयहरुलाई कारबाही हुन सकेको छैन । यस वर्षको शैक्षिक शत्र सुरु भएसँगै यहाँका विद्यालयहरुले विविध समस्या देखाउँदै विद्यार्थीबाट गैर कानुनी ढंगले भर्ना शुल्क असुल्ने गरेको पाइएको छ ।

कक्षा १ देखि १२ सम्म नेपाल सरकारले निःशुल्क शिक्षा भने पनि जिल्लाका अधिकांश सामुदायिक विद्यालयहरुले अहिले कक्षा ६ देखि १० सम्म भर्ना शुल्क, परीक्षा शुल्क, गयल शुल्क, खेलकुद शुल्क, जस्ता वाहानामा चर्को रकम असुल्दै आइरहेका छन् ।

तल्कोट गाँउपालिका– १ सुनिकोट घर भएका मिलन ऐडी स्थानीय सुनिकोट माविमा कक्षा ७ मा पढ्नुहुन्छ । उहाँले आफ्नो भाई अशोक ऐडीलाई त्यही विद्यालयमा भर्ना गर्दा ३४० रुपैयाँ शुल्क लिएको गुनासो गर्नुभयो । उहाँ जस्तै सुनिकोटका अन्य अभिभावकहरुले पनि आफ्ना बालबालिकाको भर्ना गर्दा रकम तिर्नु परेको बताए ।

सुनिकोट जस्तै जिल्लाकै नमूना मानिएको सदरमुकाम चैनपुर नजिकै रहेको सत्यवादी मावि भोपुरले समेत भर्ना शुल्क लिएको अभिभावकहरुले गुनासो गरेका छन् । सत्यवादी माविमा कक्षा ७ मा २ छोरीको भर्ना गर्दा ९५० रुपैयाँ र कक्षा १० मा पढ्ने छोराको भर्ना शुल्क ५५० तिरेको जयपृथ्वी नगरपालिका वडा नम्बर–११ की महिला सदस्य पद्मादेवी सार्कीले बताउनुभयो । पैसा नदिएसम्म शिक्षकहरुले छोरा छोरीको भर्ना नै नगरेपछि बाध्य भएर भर्ना शुल्क तिर्नु परेको उहाँले बताउनुभयो ।

सत्यवादी मावि भोपुरका प्रधानाध्यापक रामदत्त उपाध्यायले विद्यालयको शैक्षिक सुधारका लागि केही शिक्षकहरु निजी स्रोतबाट राखेको हुँदा विद्यार्थीबाट सहयोग स्वरुप भर्ना रमक लिएको बताउनुभयो ।

सत्यवादीमा कक्षा ७ मा भर्ना भएकी विमला बादीले पनि ४५० भर्ना शुल्क तिरेको बताउनुभयो । ‘घरको आर्थिक अवस्था कमजोर छ, अरुले नै सहयोग गरेर कापी कलम किन्न दिएको पैसा भर्ना शुल्क तिर्नुपरेको छ’ कक्षा ७ मा अध्ययनरत प्रमिला बादीले भन्नुभयो ।

यस्तै जालपा माध्यमिक विद्यालयले पनि भर्ना शुल्क लिएको विद्यालय व्यवस्थापन समितिका सदस्यसमेत रहेका रमेश धामीले बताउनुभयो । उहाँले विद्यालय व्यवस्थापन समितिमा कुनै सल्लाह अथवा जानकारी नै नगराई शिक्षकहरुले मनोमानी भर्ना शुल्क लिने गरेको बताउनुभयो ।

यो विद्यालयले कक्षा ६, ७ र ८ को ३००, कक्षा ९ को ३२५ र कक्षा १० मा भर्ना हुने विद्यार्थीबाट ३५० रुपैयाँ भर्ना शुल्क लिइरहेको छ ।

जयपृथ्वी नगरपालिका शिक्षा संयोजक तथा श्रोतव्यक्ति खगेन्द्रप्रसाद जोशीले बझाङका सामुदायिक विद्यालयहरुले निमय विपरीत शुल्क असुल्ने गरेको स्वीकार गर्दै धेरै जस्तो विद्यालयहरुमा निजी क्षेत्रबाट नै शिक्षकका् व्यवस्था गरेकोले उनीहरुलाई तलब खुवाउन भर्ना शुल्क लिने गरेको बताउनुभयो ।

यस विषयमा प्रमख जिल्ला अधिाकरी सुरेश सुनारले जिल्लामा रहेका विभिन्न सामुदायिक विद्यालयहरुले भर्ना शुल्क लिएको जानकारी आएकोले जिल्ला शिक्षा समन्वय इकाईसँग बुझेर भर्ना शुल्क लिएको फेला परे नियम अनुसार कारवाही गर्ने बताउनुभयो ।

भर्ना शुल्क नलिन विद्यालयलाई प्रजिअको निर्देशन

शैक्षिक शत्रको सुरुमा जिल्लाका विभिन्न विद्यालयहरुले विद्यार्थीबाट सहयोग स्वरुप भन्दै बिना रसिद भर्ना शुल्क लिएको ब्यापक जनगुनासो आएपछि बझाङका प्रमुख जिल्ला अधिकारी सुरेश सुनारले यस्तो कार्य तत्काल रोक्न निर्देशन दिनुभएको छ ।

गएको शुक्रबार प्रमुख जिल्ला अधिकारी आफैँ सदरमुकाम नजिकै रहेको सत्यवादी माविमा गएर भर्ना शुल्क नलिन शिक्षकहरुलाई आग्रह गर्नुभएको थियो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्