आफैले दिएको पैसा फिर्ता माग्दा खुर्सानीको धुलो छर्केर हत्या गर्न खोज्ने ३ युवा पक्राउ

जेठ ३, २०७६ शुक्रबार १६:४९:३६ | राजु लामिछाने

रुकुम पश्चिम – घटना सुन्दा कुनै चलचित्रमा देखिएको कथा जस्तो लाग्छ । आफूले लिएको पैसा फिर्ता गर्नुको साटो ज्यान मार्ने योजना । त्यो पनि आँखामा खुर्सानीको धुलो छर्केर, टाउकोमा सिरानीको खोल छिराएर ढुङ्गा र दाउराले कुटेर !

शुक्रबार जिल्ला प्रहरी कार्यालय रुकुम पश्चिमले पत्रकार सम्मेलनमार्फत त्यस घटनाका आरोपीलाई सार्वजनिक गरेको छ । प्रहरीले रुकुम पूर्वका एक दम्पतीको आँखामा खुर्सानीको धुलो हाली कुटपिट गरेर ज्यान लिन खोजेको आरोपमा ३ जना युवालाई पक्राउ गरेको हो ।

भुमे गाउँपालिका वडा नं. ६ बस्ने डम्बर बुढा र उहाँको श्रीमती सीता घर्तीको आँखाको खुर्सानीको धुलो हालेर कुटपिट गर्ने ३ जना पक्राउ परेका हुन् । पक्राउ पर्नेहरुमा रुकुम पश्चिमको आठबिसकोट नगरपालिका वडा नं. १ बस्ने २० वर्षीय टेकबहादुर बुढा, १९ वर्षीय प्रकाश बुढा र २२ वर्षीय कर्णबहादुर बुढा रहेको जिल्ला प्रहरी कार्यालय रुकुम पश्चिमले जनाएको छ ।

घटनामा संलग्न कृष्ण बुढा भनेर फरार रहेका छन् । जिल्ला प्रहरी कार्यालय रुकुमका प्रमुख प्रहरी नायब उपरीक्षक सुमित खड्काका अनुसार, पक्राउ परेकामध्ये टेकबहादुरले डम्बर र उहाँको श्रीमती सीताबाट रातो च्याउ उपलब्ध गराइदिने भन्दै ८५ हजार लिएको र फिर्ता माग्दा ज्यान मार्नेगरी योजना बनाएका थिए ।

टेकबहादुरले ‘बिहान पैसा दिन्छु’ भन्दै आठबिसकोट नगरपालिका वडा नं. ६ स्थित एक होटेलमा बोलाएका थिए । गएको बुधबार बिहानै बास बसेको होटेलबाट बोलाएर वडा नं. ६ मा रहेको ढाडथलको पुल नजिक पुर्‍याएर दुवैको आँखामा खुर्सानीको धुलो छर्केर कुटपिट समेत गरेका थिए ।

डीएसपी खड्काका अनुसार, पक्राउ परेका टेकबहादुरले प्रकाश, कर्ण र कृष्णसँग बसेर योजना बनाइ घटना गराएका थिए । आँखामा खुर्सानी छर्केर सिरानीको खोल टाउकोमा छिराई दुवै जनालाई दाउरा र ढुङ्गाले हानेका थिए ।

‘डम्बरलाई मर्यो भनेर फालेका रहेछन्’, डीएसपी खड्काले भन्नुभयो, ‘सीतालाई पनि मार्ने योजनाअनुसार पुलबाट नदीमा फाल्न खोज्दा हारगुहार गरेपछि स्थानीयले थाहा पाएको देखिन्छ ।’ पीडित डम्बर र सीताले टेकबहादुरबाट पैसा फिर्ता माग्ने र यार्सागुम्बा खोजीमा त्यतैबाट डोल्पामा जाने याेजनामा त्यहाँ पुगेका थिए ।

त्यसपछि भागेका उनीहरुलाई प्रहरीले बुधबार दिउँसो नै पक्राउ गरेको थियो । फरार रहेका कृष्ण बुढाको खोजी कार्य भैरहेको प्रहरीले जनाएको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राजु लामिछाने

राजु लामिछाने रुकुमका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्