सुत्केरीको ज्यान गएपछि नोबेल अस्पतालमा तनाव: चिकित्सकले लापरबाही गरेकाे आफन्तकाे आराेप

साउन १५, २०७६ बुधबार २०:४०:५६ | सुमन तिमल्सिना

माेरङ - विराटनगरको नोबेल शिक्षण अस्पतालमा सामान्य प्रसूतिबाटै बच्चा जन्माएकी एक महिलाको मृत्यु भएपछि नोबेल अस्पताल तनावग्रस्त भएको छ ।

सुनसरीको रामधुनी नगरपालिका झुम्का-३ की ३४ वर्षीया पार्वती कार्कीलाई बुधबार बिहान साढे तीन बजे अस्पतालले मृत घोषणा गरेको हो । ‘नर्मल डेलिभरी’ बाट दोस्रो सन्तान छोरी जन्माएकी उनको उपचारका क्रममा चिकित्सकले लापरबाही गरेका कारण मृत्यु भएको आरोप लगाउँदै आफन्तले शव बुझ्न अस्वीकार गरेका छन् ।

घटनाको विरोधमा आफन्तले अस्पतालमा नाराबाजी र प्रदर्शन गर्दै उपचारमा संलग्न चिकित्सकलाई कारबाही हुनुपर्ने माग गरेका छन् । अहिले अस्पतालमा ठूलो संख्यामा प्रहरी परिचालन गरिएको छ ।

पार्वतीलाई प्रसूतिका लागि सोमबार भर्ना गरिएको थियो । मंगलबार दिउसो १२ बजे उनले दोस्रो सन्तानका रुपमा छोरी जन्माएकी थिइन् । तर रक्तस्राव अत्यधिक भएको भन्दै चिकित्सकले उनलाई दिउँसो २ बजे पाठेघरको शल्यक्रिया गर्न अप्रेशन थिएटरमा लगेका थिए ।

शल्यक्रियापछि १५ पिन्ट रगत चढाइएकी उनलाई बुधबार बिहान भने अस्पतालले मृत घोषणा गरेको मृतकका भाइ खेमराज राउतले बताउनुभयाे । ‘सामान्य प्रसूतिबाट बच्चा जन्माएकी महिलाको चिकित्सककै लापरबाहीले ज्यान गयो, रगत अत्यधिक बगे पनि दुई घण्टासम्म चिकित्सकले वास्तै गरेनन्’,’ उहाँले गुनासाे गर्नुभयाे ।

एक्कासी बेहोस भएपछि पाठेघरको शल्यक्रिया गर्नुपर्छ भन्दै अप्रेशन थिएटर तिर लगेको मृतकका परिवारको भनाइ छ । शल्यक्रियाका क्रममा पनि त्रुटि भएको र समयमै ध्यान दिएर चिकित्सकले उपचार सुरु गरेको भए सुत्केरीको मृत्यु नहुने मृतकका भिनाजु कृष्ण विष्टको भनाइ छ ।

विष्टका अनुसार बच्चा जन्माएको केही समयपछि पार्वतीले खान समेत खान खोजेकी थिइन् । खाना खुवाउन खोज्दा उनी बेहोस भएर ढलेपछि मात्रै रगत धेरै बगेको भन्दै पाठेघर फ्याल्नु पर्ने भनेर चिकित्सकले लगेको उहाँको भनाइ छ ।

बच्चाको स्वास्थ्य अवस्था भने सामान्य रहेको अस्पतालले जनाएको छ । वैदेशिक रोजगारीका लागि कतार गएका मृतकका श्रीमान दीपक कार्की घटनाबारे जानकारी पाउनसाथ नोबेल अस्पतालमा आइसक्नुभएकाे छ। कार्की दम्पतीको पहिलो सन्तान ७ वर्षकी छोरी छिन् ।

अस्पतालका जनसम्पर्क अधिकृत नारायण दाहालले चिकित्सकका भनाइ अनुसार उपचारमा कुनै लापरबाही नभएको बताउनुभयाे । याे घटनामा धेरै रगत बगेका कारण मृत्यु भएको जानकारी चिकित्सकहरुले अस्पताल प्रशासनलाई गराएको दाहालले बताउनुभयाे ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुमन तिमल्सिना

सुमन तिमल्सिना मोरङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्