१०० नम्बरमा ‘ब्लफ कल’ आउन थालेपछि प्रहरीलाई सास्ती

साउन १८, २०७६ शनिबार १५:५५:४२ | विमल बिष्ट

डोटी – जिल्ला प्रहरी कार्यालय डोटीमा नागरिकलाई सूचना दिन सजिलो होस् भनेर राखेकाे पैसा नलाग्ने १०० नम्बरको फोनमा अनावश्यक फोन आउन थालेपछि प्रहरीलाई निकै सास्ती भएको छ ।

पैसा नलाग्ने १०० नम्बरमा गलत सूचना तथा अनावश्यक फोन आउन थालेपछि जिल्ला प्रहरी कार्यालय डोटीको कन्ट्रोल रुममा बस्ने प्रहरीहरु हैरान भएका छन् ।

घटना, दुर्घटना र समस्याको विषयमा जानकारी गराउने प्रहरीको टोल फ्री नम्बरमा घटना, दुर्घटनासम्बन्धी गलत सूचना दिने, गाली गर्ने तथा महिला प्रहरीको ड्युटी भएको समयमा गलत व्यक्तिले जिस्काउन थालेपछि केही समय यता डोटी प्रहरी कार्यालयले सास्ती बेहोर्नु परिरहेकाे छ ।

जिल्ला प्रहरी कार्यालय डोटीका अनुसार प्रहरीको १०० नम्बरमा दैनिक २ सयको हाराहारीमा फोन आउने गर्दछ । गाउँमा भएका घटनाको बारेमा त्यही फोन मार्फत समयमै जानकारी पाएर समस्या समाधानको लागि तत्कालै कारबाही अगाडि बढाउनुपर्नेमा गलत सूचना आएपछि हैरान भएको जिल्ला प्रहरी कार्यालय डोटीका प्रहरी प्रवक्ता तथा प्रहरी नायब उपरीक्षक लालबहादुर धामीले बताउनुभयो ।

उहाँले भन्नुभयो, ‘सही सूचना आउनुको साटो गलत खबर टिपाइदिँदा प्रहरीलाई त्यसको पुष्टि गर्नमै समस्या हुने गरेको छ, गलत तथा अनावश्यक खबरले जिल्लालाई नै तरंगित बनाउने गर्दछ ।’

दिनहुँ ‘ब्लफ कल’ आउन थालेपछि प्रहरी जवानलाई फोन उठाउने काम पनि असजिलो लाग्न थालेको जिल्ला प्रहरी कार्यालय डोटीका प्रहरी निरीक्षक सुरेन्द्र बमले बताउनुभयो । ‘१०० नम्बरमा फोन गर्दा पैसा नलाग्ने भएपछि सानादेखि ठूला मान्छेले फोन गर्ने र गलत खबर दिने गरेकाले हैरानी बनाएको छ’, उहाँले भन्नुभयो ।

‘ब्लफ कल’ का कारण निकै सास्ती बेहोर्नुपरेको गुनासो गर्दै महिला प्रहरी जवान कुसुम कार्कीले भन्नुभयो, ‘मध्यरातमा फोन गर्छन्, फोन उठाउँदा सिधै अश्लील कुरा गर्छन्, कहाँबाट को बोलेको भनेर सोधेपछि झ्याप्पै फोन राख्छन् ।’ उहाँका अनुसार पुरुष मात्र नभइ महिलाले पनि गाली गर्न थालेका छन् ।

प्रहरीका अनुसार यस्ता गाली गर्ने तथा गलत सूचना दिनेहरुले प्रायजसो एनसेलको सिम कार्ड प्रयोग गर्ने गरेका छन् । फोनको ड्युटीमा खटिने प्रहरीका अनुसार अनावश्यक कुरा गर्दै फोन गर्ने गरेको र यताबाट झपारेपछि मात्र फोन राख्ने गरेका छन् ।

गलत सूचना दिने तथा गाली गरेको भन्दै जिल्लाको केआईसिंह गाउँपालिकाका एक जनालाई प्रहरीले केही समय अगाडि पक्राउ गरे पनि उनले त्यस्तो नगरेको प्रमाणित भएपछि छोडिएको थियाे ।

यता जिल्ला प्रहरी कार्यालय डोटीका प्रहरी उपरीक्षक विद्यान्नद माझीले यस्ता अनावश्यक सूचना दिने तथा फोन गर्नेलाई पक्राउ गरी कारबाही प्रक्रिया अघि नबढाएसम्म समस्या समाधान नहुने बताउनुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्