कर्मचारीले विवरण छुटाउँदा सामाजिक सुरक्षा भत्ताबाट लाभग्राही वञ्चित !

असोज २८, २०७६ मंगलबार १९:४७:५२ | अमर सुनार

दैलेख – कर्मचारीको लापर्वाहीका कारण नारायण नगरपालिकाका केही जेष्ठ नागरिक र एकल महिला सामाजिक सुरक्षा भत्ता पाउनबाट बञ्चित भएका छन् ।

पहिलेदेखि सुविधा पाउँदै आएका रेका लाभग्राहीहरुको विवरण अध्यावधिक गर्न छुटाएका कारण भत्ता रोकिएको सेवाग्राहीले गुनासो गरेका छन् ।

नारायण नगरपालिका वडा नं. १ का ७२ वर्षीय चन्द्रबहादुर सुनार बिहान ९ बजेदेखि लाइनमा बसेपछि ११ बजे पालो आयो तर नगरपालिकाले सामाजिक सुरक्षा भत्ता वितरण निम्ति खाता खुलाएको एनएमबी बैंकले ‘तपाईँको भत्ता आएको छैन’ भन्याे ।

सामाजिक सुरक्षा भत्ताकै लागि खोलिएको खातामा रकम पोष्टिङ्ग नभएकाे देखिएपछि नगरपालिकाले पठाएको नामावली हेर्दासमेत उहाँको नाम नभेटेपछि नगरपालिकामा सम्पर्क गर्न पठाइएको भुक्तानी शाखाका सहायक नेत्र जोशीले बताउनुभयो । बैंकका अनुसार अरुको पनि नाम छुटेको अनुमान गरिएको छ ।

चन्द्रबहादुरले नगरपालिकाको वडा नम्बर-१, का सचिव गोपाल श्रेष्ठलाई भेटेपछि त्यहाँबाट नगरपालिकामा नाम पठाइएको देखियो तर अभिलेख अध्यावधिक गर्दा पञ्जीकरण शाखाबाट नाम छुटेको पत्ता लाग्यो ।

पञ्जीकरण शाखाले अनलाइनमा लाभग्राहीहरुको नाम अध्यावधिक गर्दा इण्टरनेट स्लो भएको र कामको अधिक चापले नाम छुट्न गएको नारायण नगरपालिकाका पञ्जिकाधिकारी मोहन थापाले प्रतिक्रिया दिनुभयो । उहाँले दोश्रो चौमासिकमा समेटेर यो समयको सुविधा समेत थपेर पठाइने बताउनुभयो ।

चन्द्रबहादुरले २०६४ सालदेखि जेष्ठ नागरिक सामाजिक सुरक्षा भत्ता पाउँदै आउनुभएको हो । उहाँकी श्रीमती ७४ वर्षीया जैसरा सुनारले भने असोज २८ गते पहिलो चौमासिकको १२ हजार रुपैयाँ पाउनुभयाे ।

नारायण नगरपालिकाले बैंकमा रकम ढिला पठाएको कारण जेष्ठ नागरिक, एकल महिला, अपाङ्ग र दलित बालबालिका समेत २५ सयभन्दा बढी लाभग्राही मध्ये झण्डै ३ सय जनाले मात्र दशैँ अघि बैंकबाट सामाजिक सुरक्षा भत्ता झिक्न पाएका थिए ।

सरकारले सामाजिक सुरक्षा भत्ता पाउने सबै जेष्ठ नागरिक, एकल महिला, अपाङ्गहरुको सम्बन्धित व्यक्ति र दलित बालबालिकाको हकमा अभिभावकको नाममा खाता खोल्न अनिवार्य गरे पनि नारायण नगरपालिकाका १–९ वडाका लाभग्राहीहरुको मात्र बैंक खाताबाट रकम दिने गरेको छ ।

पुनर्संरचनापछि नारायण नगरपालिकामा थपिएको वडा नम्बर १० भवानी, ११ बिन्ध्यवासिनी र अरु बाँकी १० वटा स्थानीय तहहरुले जेष्ठ नागरिक, एकल महिला, अपाङ्ग र दलित बालबालिकाहरुलाई हातहातमै नगद सामाजिक सुरक्षा भत्ता रकम बाँडिरहेका छन् । गाउँगाउँमा बैंक भए पनि खाता खुलाएका छैनन् ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अमर सुनार

दैलेखका उज्यालो सहकर्मी अमर सुनार मानवअधिकारको क्षेत्रमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्