पौरखी वडाध्यक्ष भन्छन् : काम गरेर खान के को लाज ?

मंसिर ९, २०७६ सोमबार १६:३८:४० | प्रेमनारायण आचार्य

अर्घाखाँची – बिहानको आठ बजेको समय, त्यसमाथि नरपानीको चिसो । सबै जना जाडोमा ‘सिउसिउ’ गरिरहेका थिए । त्यही चिसो मौसममा सन्धिखर्क नगरपालिका ६ का वडाध्यक्ष कृष्णबहादुर आचार्य नरपानीको बजारमा मोटरसाइकलमा दूध बेचिरहनु भएको थियो ।

गएको ५ वर्षदेखि आचार्यले सन्धिखर्क नगरपालिका ६ नरपानीको जगातमा रहेको आफ्नो घरमा उत्पादन भएको दूध नरपानीमा लगेर बेच्ने गर्नुभएको छ । झरी, बादल, पानी केहीले पनि उहाँलाई रोकेको छैन । वडाध्यक्ष भएर पनि उहाँले दूध बेच्ने कामलाई निरन्तरता दिनुभएको छ ।

‘आफ्नो काम गरेर खान के को लाज ? कृषकको छोरा हूँ, कृषि नै मेरो मुख्य पेसा हो । दूध, तरकारी बेचेरै मेरो घर खर्च चलेको छ । त्यसैले यो कामलाइ निरन्तरता दिएको छु,’ वडाध्यक्ष आचार्यले भन्नुभयो ।

जनप्रतिनिधिहरु कामभन्दा पनि पैसा कमाउन लागिरहेका छन् भन्ने समाचार आइरहँदा सन्धिखर्क नगरपालिका ६ का वडाध्यक्ष आचार्य भने दैनिक बिहान दूध बेच्न मोटरसाइकलमा नरपानी पुग्नुहुन्छ ।

‘समाज भन्छ– दूध बेचे गोठालो रे, तरकारी बेचे कृषक रे, जनताको सेवा गरे नेता रे, फरक यतिमात्र हो । नेतालाई सबैले नमस्कार गर्छन् । कृषक दूध लिएर बजार र गल्लीको ढोकाढोकामा पुग्दा हेराइ नै फरक पर्छ । म आफू वडाध्यक्ष भएर यी तीन वटै कामलाई निरन्तरता दिएको छु’, उहाँले भन्नुभयाे ।

आफैले नगरेसम्म अरुलाई भनेर मात्र हुँदैन, परिवर्तन आफैबाट गर्नुपर्छ भन्ने मान्यता लिएर सुरु गरेको कृषि पेसाबाट आचार्यले मनग्य आम्दानी गर्न सफल हुनुभएको छ । उहाँले कृषिबाट आम्दानी गर्न गर्नुभएको छैन, सबै राजनीतिकर्मी र जनप्रतिनिधिको उदाहरणको पात्र समेत बन्नुभएको छ ।

उहाँको घरमा अहिले दुई वटा उन्नत जातका मुर्रा भैँसी र एउटा जर्सी गाई दुहुनो छ । दैनिक बिहान सरदर १२ लिटर दूध नरपानी लगेर बेच्ने गरेको उहाँले बताउनुभयो । उहाँ दूध बेच्न घरघर पुग्नुहुन्छ । बेलुकाको दूध घरबाटै बिक्री हुन्छ । उहाँले भन्नुभयो, ‘दूध बेचेरै खर्च कटाएर महिनामा २० हजार बचाएको छु ।’

उहाँ घरबाट मोटरसाइकलमा दूध बोकेर आठ किलोमिटर कच्ची बाटो पार गर्दै बजारसम्म पुग्नुहुन्छ । ‘अरुले भाषण मात्र गर्छन्, म काम पनि गर्छु । काम नगरि हुँदैन भन्ने अनि केही पनि नगर्ने प्रवृत्तिका कारण देश बिग्रिएको हो’, आचार्यले गुनासो गर्नुभयो ।

दूधसँगै उहाँले तरकारी बेचेर पनि मनग्य आम्दानी गर्दै आउनु भएको छ । बेमौसमी तरकारी खेती गरेर वर्षमा खर्च कटाएर चार लाख रुपैयाँ आम्दानी हुने उहाँले बताउनुभयो । ‘सबै काम नपाएर विदेशिएका छन् । गर्ने हो भने हाम्रै माटोमा सुन फलाउन सकिन्छ । मात्र जाँगर हुनपर्छ’, उहाँले भन्नुभयो ।

उहाँ बिहान, बेलुका घरमा भैँसी र गाईको स्याहार गर्नुहुन्छ । दिउँसो वडा कार्यालयमा गएर काम गर्नुहुन्छ । बिदा र फुर्सदको समयमा तरकारी बारीमा काम गर्नुहुन्छ । समय मिलाएर सबै क्षेत्रमा काम गर्दै आइरहनु भएको छ ।

‘वडाध्यक्षहरु काम नगर्ने अनि भाषण गरेर अरुलाई सिकाउने मात्रै गर्छन् । अध्यक्ष भएपछि त काम गर्नुहुँदैन भन्ने सोच राखेका हुन्छन् । राजनीति गर्ने मानिसले अरुलाई देखाउन र आकर्षित गर्न केही गर्नुपर्छ । राजनीति गर्न आफू सक्षम हुनुपर्छ, आफै व्यवसाय गरे मात्र अरुलाई सिकाउन सकिन्छ’, उहाँले भन्नुभयो ।

काम गर्न समय छैन भन्नेका लागि आचार्य उदाहरणीय पात्र बन्नुभएको छ । यसबाट अन्य जनप्रतिनिधिले सिक्न सक्छन् ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रेमनारायण आचार्य

प्रेमनारायण आचार्य अर्घाखाँची उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्