इञ्चार्ज चीनमै रोकिए, नारायणगढ - बुटवल चार लेन सडकमा ‘कोरोनाको कहर’ !

फागुन १२, २०७६ सोमबार ९:२२:२० | उज्यालो सहकर्मी

काठमाण्डौ - चीनमा फैलिएको कोरोना भाइरसको संक्रमणले नेपालमा पनि धेरै आयोजना प्रभावित भएका छन् ।

जलविद्युत, विमानस्थल, खानेपानी सडक लगायतका आयोजना कोरोना भाइरसका कारण प्रभावित छन् । चिनियाँ कामदार र उपकरण नभएपछि आयोजनाको काम पछाडि धकेलिएका छन् ।

कोरोना भाइरसको कारण चिनियाँ कम्पनीले निर्माणको जिम्मा पाएको नारायणगढ–बुटवल सडक बनाउने काम पनि प्रभावित भएको छ । १ सय १३ किलोमिटर लामो सडकलाई गैँडाकोट–दाउन्ने ६४ किलोमिटर पूर्वी खण्ड र दाउन्ने–वुटबल ४८ किलोमिटरलाई पश्चिम खण्डमा बर्गीकरण गरिएको छ ।

२०७५ सालको पुसमा ठेक्का सम्झौता भएको सडकमा अहिले धेरै काम भैसक्नुपर्ने थियो । १ वर्षसम्म रुख कटानको विवादले काम सुरु हुन सकेन । २०७६ सालको पुसदेखि सरासर काम हुन थालेको थियो, तर चीनमा कोरोना भाइरस फैलिएपछि यो आयोजना प्रभावित भएको छ ।

ठेकेदार कम्पनी चाइना स्टेट कन्स्ट्रक्सन एन्ड इञ्जिनियरिङ कर्पोरेसनका २ इञ्चार्जसहित १५ जना मुख्य व्यक्ति चीनमै रोकिएका छन् । जसका कारण पूर्ण क्षमतामा काम हुन सकेको छैन ।

‘दुबै खण्डका इञ्चार्ज चीनमै रोकिएका छन्, आयोजनाको मुख्य निर्णय गर्ने र पैसा परिचालन गर्ने व्यक्ति चीनमै रोकिँदा काममा असर परेको छ, काम पूर्ण क्षमतामा हुन सकेको छैन’ आयोजनाका पूर्वी खण्डका प्रमुख सुजन अधिकारीले भन्नुभयो।

इञ्चार्जले अहिले तत्कालै आफू आउन नसक्ने र चीनमा बैंक तथा अन्य कार्यालय बन्द रहेकाले पैसा पठाउन पनि नसक्ने जानकारी दिएको अधिकारीले बताउनुभयो ।

आयोजनामा अहिले ३० किलोमिटर क्षेत्रमा रुख काट्ने काम सकिएको छ, २५ वटा कल्भर्ट र केही पुलको काम सुरु भएको छ । केही ठाउँमा माटो भर्ने काम चल्दैछ ।

तर ठेक्का सम्झौता भएको २०७५ सालको पुसदेखि साढे ३ वर्षभित्र अर्थात २०७९ सालको जेठ महिनामा सडक आयोजना सक्नको लागि अहिले निकै तीव्र गतीमा काम हुनुपर्नेमा त्यसो हुन सकेको छैन ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्