कर्णाली प्रदेश : पालिकाहरुमै आइसोलेशन कक्ष बनाउने तयारी

जेठ २०, २०७७ मंगलबार ६:५७:३० | मुना हमाल

सुर्खेत - कर्णाली प्रदेशमा पालिकामै आइसोलेशन कक्ष बनाउने तयारी गरिएको छ ।

कोरोना सङ्क्रमितको संख्या बढ्दै गएपछि प्रदेश सरकारले प्रदेशका विभिन्न ठाउँमा आइसोलेशन कक्ष बनाउने निर्णय गरेको हो । सोमबार बसेको मन्त्रीपरिषद्को बैठकले प्रदेशका २४ ठाउँमा एक हजार ६० बेडको आइसोलेशन कक्ष बनाउने निर्णय गरेको समाजिक विकासमन्त्री दल रावलले जानकारी दिनुभयो ।

कर्णाली प्रदेशमा सोमबारसम्म एकसय २३ जनाका कोरोना सङ्क्रमण देखिएको छ । सङ्क्रमित हुने प्राय गाउँकै क्वरेन्टीनमा बसेका छन । सरकारले स्थानीय तहमै उपचारको व्यवस्था गर्नका लागि तयारी थालेको मन्त्री रावलले जानकारी दिनुभयो ।

उहाँले यसका लागि तत्तकाल चार करोड ९३ लाख बजेट स्थानीय स्तरमा निर्माण गरिने आइसोलेशनका लागि पठाउने निर्णय भएको बताउनुभयो ।
लक्ष्ण नदेखिएका सङ्क्रमितलाई स्थानीय स्तरमै उपचार गर्ने र क्रिटिकल अवस्थामा आएकालाई विशिष्ट अस्पतालमा ल्याउने गरी सरकारले तयारी थालेको उहाँको भनाई छ ।

उहाँका अनुसार सल्यान कुपिण्डेमा देवस्थलमा एकसय बेड, बागचौर २ मा र कपुरकोट ३ मा धनबाडा स्वास्थ्य चौकीमा ५०-५० बेडको आइसोलशन बनाइनेछ ।

यस्तै जाजरकोटमा दुई ठाउँ छेडागाडको दशेरा स्वास्थ्य चौकी र त्रिवेणी नगरपालिकाको दल्ली प्राथमिक स्वास्थ्य केन्द्र ५०-५० बेडको आइसोलशन कक्ष र रुकुमपश्चिम आठबिसकोट नगरपालिकामा ५० बेडको आइसोलेशन कक्ष बनाउने तयारी गरिएको छ ।

सुर्खेतको पञ्चपुरीको सालकोटमा ५०, चौकुने गाउँपालिका ३०, गुर्भाकोट नगरपालिकाको मेहेलकुना अस्पतालमा ५०, चिनगाड गाउँपालिकाको अवलचिङमा ५० र वीरेन्द्रनगरमा रहेको मध्यपश्चिमाञ्चल विश्वविद्यालयको एउटा भवनमा ५० बेडको आइसोलेशन कक्ष बनाउने तयारी गरिएको छ ।

दैलेखको नारायण नगरपालिकाको नारायण क्याम्पसमा, ठाटीकाँध गाउँपालिकाको लकान्द्रा प्राथमिक स्वास्थ्य केन्द्रमा र आठबिसकोट गाउँपालिकाको राकम कर्णाली स्वास्थ्य चौकीमा, र दुल्लु नगरपालिकाको दुल्लु अस्पतालमा ५०-५० बेडको आइसोलेशन कक्ष तयार गर्ने भनेर निर्णय गरिसकेको उहाँले जानकारी दिनुभयो ।

कालिकोटको पचलाझरना गाउँपालिकाको राम्नाकोट स्वास्थ्य चौकी, तिलागुफा नगरपालिका र नरहरीनाथ गाउँपालिकामा ५०-५० बेडको आइसोलन बनाउने तयारी छ ।

जुम्लाको तातोपानी गाउँपालिका र सिजा गाउँपालिकामा ५०-५० बेडको आइसोलशन कक्ष बनाउने तयारी गरिएको छ । तत्काल कोरोना परीक्षणका लागि ६ हजार किट किन्ने मन्त्रिपरिषदले निर्णय गरेको छ ।

सोमबार प्रदेशसभामा बोल्दै मन्त्री रावलले अझै पनि कोरोना नियन्त्रण गर्न सकिने भन्दै सबैको सहयोग र साथ आवश्यक रहेको बताउनुभयो । समुदायमा कोरोना सङ्क्रमण नफैलिएकोले समुदायमा हुन नदिन सबैको सहयोग आवश्यक रहेको उहाँको भनाई छ ।

मन्त्री रावलले कोरोना भाइरस रोकथाम र नियन्त्रणमा सरकार प्रयत्न गरिरहेको बताउनुभयो । हालसम्म प्रदेशमा पाँच सय ५० आइसोलेशन बेड तयारी अवस्थामा रहेको छन ।

‘भारतबाट नागरिक आफ्नो ठाउँमा आउन थालेपछि कोरोना सङ्क्रमण सँगै आयो । सरकार रोकथाम, नियन्त्रण र उपचारमा लागिपरिरहेको छ’ उहाँले भन्नुभयो, ‘ यसका लागि सिंगो सरकार, सदन र नागरिकको सहयोग आवश्यक छ ।

तयारी ढिलो भएको होइन । हामीले आंकलन गरे भन्दा पनि बढी नागरिक आएपछि हाम्रो क्षमताले नभ्याएको हो । अब हामी सबैको सहयोगको आवश्यक छ ।’ उहाँले कोरोना प्रतिकार्यकै लागि हालसम्म प्रदेश सरकारले१६ करोड २५ लाख बजेट उपलब्ध गराइसकिएको जानकारी दिनुभयो ।

रोजगारीको लागि भारत गएका फर्किन थालेपछि कर्णालीमा कोरोनाको जोखिम बढेको छ । हालसम्म २२ हजार ८३ जना क्वरेन्टीनमा छन् । क्वरेन्टीनमा २९ हजार ३७ बेड संख्याको क्वारेन्टीन, प्रदेश भर ४४ वटा आईसियू तयारी अवस्थामा छन् ।

हाल प्रदेशमा तीन वटा पीसीआर मेसिन भएकाले अब दुई वा मेनिस थप्ने तयारी गरिएको उहाँले जानकारी दिनुभयो । सुर्खेत र दैलेखमा पीसीआर मेसिन थप्ने तयारी गरिएको उहाँको भनाई छ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मुना हमाल

मुना हमाल सुर्खेतका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्