मलेसियाबाटै गिट्टी कुट्ने निधो गरेर फर्किएका दिनेश कामदारबाट साहु भए

साउन १८, २०७५ शुक्रबार १४:५६:२७

तारानाथ फुयल/खोटाङ ।

‘जति पढेपनि विदेश नै त जानुपर्ने हो भन्ने लागिरहन्थ्यो’ दिनेश राईले केटाकेटी बेलाको सोच सुनाउनुभयो । तर त्यही केटाकेटी सोचले ठूलो हुँदा पनि छोडेन । एसएलसी पास भएदेखि नै उहाँ विदेश जाने सुर कसेर काठमाडौं धाउन थाल्नुभयो ।

४ पटक काठमाडौं आउँदा जाँदा २५ हजार सकियो । पाचौं पटक काठमाडौं आएका दिनेश २०६३ साल फागुनमा मलेसिया उड्नुभयो । बानेश्वरमा रहेको केएनके ओभरसिजलाई ६५ हजार रुपैयाँ तिरेर फर्निचरको काममा जानुभयो ।

जाने बेला म्यानपावरलाई दिएको ६५ हजारसँगै लागेको अरु पैसा सयकडा ३ रुपैयाँ ब्याजमा लिएको ऋण थियो । म्यानपावरले उहाँलाई ४८१ रिंगिट हुन्छ भनेको थियो । मलेसिया पुगेपछि दिनेशले ४१६ रिंगिट पाउनुभयो । त्यसमा पनि लेभी त्यही तलबबाटै काटिन्थ्यो । खाने, बस्ने खर्च पनि आफ्नै । त्यसैले जाँदा दिएको ऋण तिर्न उहाँलाई दुई वर्ष लाग्यो ।

दुई वर्ष कटेपछि तलब बढ्यो । काम पनि सजिलो हुँदै गयो । त्यसैले ५ वर्ष बसेर बिदामा घर आउनुभयो । बिदा सकेर फर्किएका दिनेशका थप ४ वर्ष उतै बिते । ८ वर्ष कटेपछि दिनेशलाई विदेशको बसाई उपलब्धीमूलक लाग्न छोड्यो ।

‘म पैसा कमाउन विदेशमा छु, तर गाउँमै पनि केही गरेर कमाउन सकिन्छ होला नि भन्ने लाग्थ्यो’ दिनेश सुनाउनुहुन्छ ‘पैसाका लागि अर्काको खटनमा बस्नुपर्ने अनि परिवारभन्दा टाढा यही कुरा दिमागमा आइरहन्थ्यो ।’

यही कुराले पिरोल्न थालेपछि उहाँ मलेसियाको बसाई सधैंलाई टुङ्ग्याएर घर फर्किनुभयो । ‘फर्किने बेला केही भएन भने गिट्टी कुटेर भएपनि खान्छु भन्ने सोचेको थिएँ’ गिट्टी कुट्ने योजना बनाएर फर्किएका दिनेशले त्यही नै काम थाल्नुभयो गाउँमा । त्यो पनि घर आइपुगेको एक हप्ता पनि नबित्दै ।

विदेशबाट फर्किएलगत्तै गिट्टी कुट्न थाल्दा राम्रो गरिसभन्ने भन्दा पनि नाक खुम्च्याउने धेरै थिए गाउँमा । तर उहाँले त्यो टिप्पणीलाई त्यति धेरै वास्ता गर्नुभएन । ‘जसले जे भनेपनि म मेरो काम छोड्दिन भनेर लागिरहें’ दिनेश भन्नुहुन्छ ।

उहाँले काम थाल्ने बेला पहिला पहिला गिट्टी कुट्नेहरुले पनि काम छोडिसकेका थिए । तर पनि उहाँ न आत्तिनुभयो न हतास नै हुनुभयो । कामले काम सिकायो अनि कामले पैसा कमाउन पनि सिकायो दिनेशलाई ।

यही निरन्तरताले उहाँलाई अहिले गिट्टी कुट्ने कामदारबाट गिट्टी उद्योगको साहु बनाएको छ । दुई वर्ष गिट्टी कुटेपछि उहाँले आफैं घर बनाउने ठेक्का पनि लिन थाल्नुभयो । २०७२ सालको भूकम्पले धेरै घर भत्किएर बनाउनुपर्ने भएपछि उहाँले धेरै काम पाउनुभयो ।

मजदूरका रुपमा गिट्टी कुट्न सुरु गरेका दिनेश राईलाई यही कामले १० जनालाई रोजगार दिने साहु बनाइदिएको छ । एक जना कामदारलाई महिनाको २५ हजार रुपैयाँ तलब दिनुहुन्छ । उहाँ आफू चाहिँ अहिले महिनाको ४० हजार रुपैयाँ कमाउनुहुन्छ ।

परिवारसँग बसेर कमाइरहेका दिनेश खुशी हुनुहुन्छ । त्यो भन्दापनि खुशी त उहाँलाई समाजको हेर्ने दृष्टिकोण फेरिएकोमा लाग्छ । उतिबेला गिट्टी कुट्ने भन्नेहरु अहिले उहाँको प्रशंसा गर्छन् ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्