तुइन प्रकरणबारे भारतसँग गम्भीर आपत्ति जनाउन सरकारलाई माओवादी केन्द्रकाे आग्रह

साउन १७, २०७८ आइतबार १६:५०:२१ | उज्यालो सहकर्मी

काठमाण्डाै – नेकपा माओवादी केन्द्रले केही दिनअघि महाकाली नदीमा भारतीय एसएसबीले नेपाली नागरिक तर्दातर्दैका तुइन खुस्काइ दिएका कारण एक जना बेपत्ता भएको घटनाको तत्काल छानबिन गर्न सरकारसँग माग गरेकाे छ । आइतवार पार्टी केन्द्रीय कार्यालय पेरिसडाँडामा बसेको स्थायी कमिटी बैठकले घटनाका दोषीमाथि कारबाही गर्न र भारत सरकारसँग गम्भीर आपत्तिसहित आवश्यक कारबाही प्रक्रिया अगाडि बढाउन मागसमेत गरेको छ ।

पार्टी प्रवक्ता श्रेष्ठले भन्नुभयो, ‘समाचारमा आए अनुसार, सूचना प्राप्त भए अनुसार भारतीय एसएसबीको तुइन खुस्काइ दिने गतिविधिको कारणले नै नेपाली नागरिकले महाकाली नदीमा खस्ने र बेपत्ता हुने स्थिति उत्पन्न भएको छ । त्यसका बारेमा तत्काल छानबिन गरी सम्बन्धित व्यक्तिलाई कारबाही गर्न र त्यसबारे भारत सरकारसँग गम्भीर आपत्तिसहित आवश्यक कारबाहीको प्रक्रिया अगाडि बढाउन पनि माग गर्ने निर्णय गरेको छ ।’

यस्तै नेकपा माओवादी केन्द्रले साउन ३० गतेभित्र देशभरमा वडा कमिटी गठन गर्न निर्देशन दिएको छ । बैठकले पार्टीका सबै कमिटीलाई साउन ३० गतेभित्र सबै वडा कमिटीको गठन गर्न र पार्टीको आउँदाे केन्द्रीय कमिटीको बैठकमा आउने केन्द्रीय सदस्यहरूले प्रदेश कमिटीबाट अद्यावधिक विवरण लिएर आउन निर्देशन गरेको पार्टी प्रवक्ता श्रेष्ठले बताउनुभयो ।

उहाँले भन्नुभयो, ‘पार्टीका सबै कमिटीलाई यही साउन ३० गतेभित्र देशभरिका सबै वडा कमिटी गठन गर्न र त्यसको अद्यावधिक विवरण केन्द्रीय कमिटीको बैठकमा आउँदा केन्द्रीय कमिटीका सदस्यहरुले सम्बन्धित प्रदेशबाट लिइ आउन निर्देशन दिने निर्णय पनि गरेको छ ।’

बैठकले पार्टीको केन्द्रीय कमिटी बैठक १० दिन पर धकेल्ने निर्णय पनि गरेको छ । यसअघि पार्टीको केन्द्रीय कमिटी बैठक साउन २० गतेदेखि बस्ने भनिए पनि आवश्यक तयारी गर्न अझै केही समय लाग्ने भएकाले केन्द्रीय कमिटी बैठक साउन ३० गतेदेखि बस्ने निर्णय गरेको प्रवक्ता श्रेष्ठले जानकारी दिनुभयो । सरकार गठनका लागि माओवादीको तर्फबाट पठाउने मन्त्रीहरूको सम्बन्धमा निर्णय लिन माओवादीको स्थायी कमिटी बैठक भाेलि सोमवार दिउँसाे ३ बजे फेरि बस्ने प्रवक्ता श्रेष्ठले बताउनुभयो ।

उहाँले भन्नुभयो, ‘स्थायी कमिटीको बैठक सरकार गठनको पूर्णतासम्बन्धी विषयलाई छलफल गर्न भोलि फेरि ३ बजे स्थायी कमिटीको बैठक बस्ने निर्णय गरिएको छ । आज अध्यक्ष प्रचण्डले सम्बन्धित घटकहरूसँग छुट्टाछुट्टै र सामूहिक रूपमा पनि वार्ता गर्ने निर्णय पनि गरिएको छ ।’

सञ्चारकर्मीको जिज्ञासाको जवाफ दिँदै प्रवक्ता श्रेष्ठले लुम्बिनी प्रदेश सरकारले संविधान र लोकतान्त्रिक मूल्य, मान्यताका विरुद्ध गतिविधि गरिरहेको भन्दै माओवादीले संवैधानिक ढङ्गबाट लोकतान्त्रिक मूल्य, मान्यताअनुसारकाे नयाँ सरकार गठन गर्ने पहल गरिरहेको पनि बताउनुभयो ।

अन्तिम अपडेट: पुस २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्