जुम्ला कांग्रेस जिल्ला अधिवेशन दशैँपछि हुने

असोज १८, २०७८ सोमबार २०:३:३० | नेत्र शाही

जुम्ला – नेपाली कांग्रेस जुम्लाले जिल्ला अधिवेशन स्थगित गरेको छ । आज आइतवार असोज १८ गते हुने भनिएको जिल्ला अधिवेशन स्थगित गरिएको हो ।

दशैँ पनि नजिकिएको, अधिवेशनको आवश्यक व्यवस्था र प्रमुख निर्वाचन अधिकृत हसिना प्रधानको समय नमिलेकाले जिल्ला अधिवेशन स्थगित गरिएको पार्टी सभापति दीपबहादुर शाहीले जानकारी दिनुभयो । आउँदो कात्तिक ३ गते गर्ने गरी जिल्ला अधिवेशन तोकिएको तर यसमा पार्टी केन्द्रले एक÷दुई दिन अघिपछि पनि गर्न सक्ने उहाँले बताउनुभयो ।

वडा पालिका, प्रदेश क र ख सबै अधिवेशन सकिएको र अब जिल्ला अधिवेशन मात्रै बाँकी रहेको सभापति शाहीले जानकारी दिनुभयो ।

जुम्लाका आठ पालिकामध्ये सिंजा र गुठीचौर गाउँपालिकामा देउवा पक्षले पालिका सभापति पाएको छ । चन्दननाथ नगरपालिकाका साथै हिमा, कनकासुन्दरी, पातारासी, तातोपानी र तिला गाउँपालिकामा पौडेल समूहले पालिका सभापति प्राप्त गरेको हो ।

धेरैजसो पालिका र वडामा सहमतिमा सभापति चयन गरेको कांग्रेसले क्षेत्रीय अधिवेशनमा सहमति गर्न सकेन ।

२३ सदस्यीय प्रदेश क्षेत्रीय कार्यसमितिमा जुम्ला प्रदेश ‘क’ र ‘ख’ दुवैमा पौडेल समूहले संस्थापनलाई किनारा लगाएको छ । यसैगरी १६ प्रदेश क्षेत्रीय प्रतिनिधिमा पनि सबै पौडेल पक्षका उम्मेदवारले जितेका छन् । कांग्रेस प्रदेश ‘क’ र ‘ख’ मा पौडेल पक्षको जितसँगै संस्थापनलाई जुम्लामा झट्का लागेको छ ।

वर्तमान सभापति दीपबहादुर शाही पौडेल समूहका सभापति आकाङ्क्षी हुनुहुन्छ भने देउवा समूहबाट सभापतिका लागि पार्टी सचिव कर्णबहादुर शाहीको नाम चर्चामा छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नेत्र शाही

जुम्लामा बसेर पत्रकारिता गर्ने नेत्र शाही उज्यालोका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्