नेपालबाट विदेश पुर्‍याइएका मूर्ति फिर्ता ल्याउन पहल भइरहेको छ : मन्त्री आले

फागुन १८, २०७८ बुधबार १९:५०:५४ | विमल बिष्ट

काठमाण्डौ – संस्कृति, पर्यटन तथा नागरिक उड्डयन मन्त्री प्रेमबहादुर आलेले नेपालबाट चोरीलगायत विभिन्न कारणबाट विदेश पुर्याइएका मूर्तिहरू फिर्ता ल्याउन पहल भइरहेको बताउनुभएको छ ।

नेपालबाट हराइ (चोरी भइ) अमेरिका पुगेका तीन थान मूर्ति फिर्ता ल्याइ आज बुधवार सार्वजनिक गर्ने कार्यक्रममा मन्त्री आलेले नेपालबाट चोरी भएका वर्षाैँ पुराना मूर्तिहरू विभिन्न देश र त्यहाँका सङ्ग्रहालयमा रहेका भन्ने खबर आएकाले फिर्ता ल्याउन पहल भइरहेको बताउनुभयो ।

उहाँले भन्नुभयो, ‘चोरी वा अन्य कुनै कारणबाट हाम्रा देशका वर्षाैँ पुराना मूर्तिहरू विभिन्न देशमा रहेको खबर पाएका छौँ, आवश्यक प्रमाणसहित परराष्ट्र मन्त्रालयको सहकार्य तथा इन्टरपोलमार्फत नेपाल ल्याउने छौँ ।’ यस्तै मन्त्री आलेले नेपालबाट हराएका अन्य मूर्तिहरू फिर्ता ल्याउनका लागि परराष्ट्र मन्त्रालय, सञ्चारकर्मी तथा सरोकारवाला निकायहरूलाई आवश्यक सहयोग र पहल गर्नसमेत आग्रह गर्नुभयो ।

आज सार्वजनिक गरिएका तीन वटा मूर्तिहरु १७ औँ शताब्दीको मल्लकालीन ध्यान मुद्रामा रहेको प्रस्तरको बुद्ध मुर्ति, १३ औँ शताब्दीको कलात्मक काष्ठ तोरण मूर्ति र १४ औँ शताब्दीको उडिरहेको गन्धर्वको आकृति कुँदिएको काष्ठकला रहेका छन् । यी मूर्ति अमेरिकाको न्युओर्कमा रहेको रुबियन म्युजियम अफ आर्टले फिर्ता गरेको हो ।

मूर्तिहरू आफ्नै खर्चमा नेपाल ल्याउनुभएकोमा मन्त्री आलेले रुबियन म्युजियम अफ आर्टका कार्यकारी निर्देशक डा. जोरिट बिट्सगी र मिशेल बेनेट सिमोरेलालाई धन्यवाद दिनुभयो । यो म्युजियमले आफ्नै खर्चमा २० हजार डलरमा ती मूर्तिहरू फिर्ता ल्याएको हो ।

नेपालबाट हराएका मूर्तिहरूमध्ये अहिलेसम्म बेलायतबाट १९ थान, अस्ट्रियाबाट एक थान, अमेरिकाबाट १४ थान, तिब्बतबाट २८ थान, कोलकताबाट १३ थान, जर्मनीबाट एक थान फिर्ता भइसकेको पुरातत्त्व विभागले जनाएको छ । यस्तै अमेरिका, फ्रान्स, बेलायत, अस्ट्रेलियालगायतका देशमा थप केही मूर्ति र कलात्मक वस्तुहरु रहेकाले फिर्ता ल्याउन कुटनीतिक पहल भइरहेको विभागले जनाएको छ ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

विमल बिष्ट

विमल बिष्ट डोटीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्