दसैँमा सुदूरका पहाडी जिल्लामा खाद्यान्न ढुवानी हुन सकेन

असोज २२, २०७५ सोमबार १२:५६:४५ | तपेन्द्र बिष्ट

डडेल्धुरा – नेपालीहरुको महान पर्व दसैँ नजिकिए पनि सुदूरपश्चिम प्रदेशका भोकमरी ग्रस्त विकट पहाडी जिल्लाहरुमा खाद्यान्न ढुवानी हुन सकेको छैन ।

टेन्डरमै ढिलाइ भएकाले चालू आर्थिक वर्षमा पहाडी जिल्लामा चामल ढुवानी गर्न ढिलाइ भइरहेको नेपाल खाद्य संस्थान धनगढीले जनाएको छ । यो कार्यालयले अहिलेसम्म अछाममा पाँच सय ६१ क्वीन्टल, बाजुरामा पाँच सय र दार्चुलाको खण्डेश्वरीका लागि दुई सय क्वीन्टल चामल पठाउनबाहेक अन्य जिल्लामा पठाउन नसकेको जनाएको छ ।

चामल पठाउन बाँकी रहेको ठाउँका लागि दसैं अगाडि नै चाडपर्वलाई पुग्ने चामल पठाउने प्रयास गरिरहेको संस्थानका प्रमुख प्रेमनारायण भण्डारीले बताउनुभयो । ‘हामीले चामल पठाउन नसके पनि समस्या भएको छैन’, उहाँले भन्नुभयो–‘तर, सकेसम्म दसैं अगाडि नै आवश्यक चामल ढुवानी गर्ने प्रयास गरिरहेका छौं ।’

प्रदेशमा सबैभन्दा बढी गरिबी रहेको बाजुराको मार्तडीको लागि वार्षिक सात हजार क्वीन्टल चामल पठाउने कोटा रहेको छ । बाजुराकै कोल्टी डिपोको वार्षिक कोटा १० हजार क्वीन्टल चामल रहेको छ । वार्षिक तीन हजार कोटा रहेको दार्चुलाको खण्डेश्वरीमा दुई सय क्वीन्टल चामल पुगेको छ । सुनसेरा र पारिवगरको लागि भने चामल गएको छैन । दुवै ठाउँको वार्षिक कोटा दुई/दुई हजार क्वीन्टल चामल रहेको छ ।

अछामको विनायक र कमल बजारको लागि पनि चालू आर्थिक वर्षमा चामल गएको छैन । दुवै ठाउँको लागि वार्षिक तीन हजार क्वीन्टल चामल आवश्यक हुने कोटा निर्धारण गरिएको छ । बैतडीको पुलाउ, पुर्चौडी र मेलौलीका लागि पनि चामल ढुवानी हुन सकेको छैन ।

खाद्य संकटमा रहेको बझाङको सदरमुकाम चैनपुर, बिसौना, तल्कोट, काँडामा समेत संस्थानको चामल गएको छैन । सुदूरपश्चिम प्रदेशको पहाडी जिल्लामा वार्षिक ४० देखि ४५ हजार क्वीन्टल चामल खपत हुने गरेको संस्थानले जनाएको छ । डडेल्धुरा डिपोमासमेत मागअनुसार चामल ढुवानी नहुँदा कठिनाई भैरहेको खाद्य संस्थानको डिपोले जनाएको छ ।

अन्तिम अपडेट: कात्तिक २५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपेन्द्र बिष्ट

डढेलधुराका उज्यालो सहकर्मी तपेन्द्र विष्ट रेडियो अमरगढीमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्